କନିଷି,୯ ।୬(ଡି.ଏନ.ଏ.)-ରଙ୍ଗେଇଲୁଣ୍ଡା ବ୍ଲକ କୋଳଥିଗାଁରେ ରବିବାର ଗ୍ରାମବାସୀ ପାଣି ସମସ୍ୟା ନେଇ ସ୍ଥାନୀୟ ସରପଞ୍ଚଙ୍କ ଘର ସମ୍ମୁଖରେ ଧାରଣା ଦେଇଥିଲେ। ଏଥିପାଇଁ ସକାଳ ୭ଟାରୁ ୧୦ଟା ପର୍ଯ୍ୟନ୍ତ ଶତାଧିକ ମହିଳା, ପୁରୁଷ ହାଣ୍ଡି, ମାଠିଆ ଧରି ବସିଥିଲେ। ଏହି ସମୟରେ ପଞ୍ଚାୟତର ଅନ୍ୟ ଜଣେ ଜନପ୍ରତିନିଧି ଉକ୍ତ ରାସ୍ତା ଦେଇ ଯାଉଥିବା ବେଳେ ଶତାଧିକ ମହିଳା ତାଙ୍କୁ ଅଟକାଇଥିଲେ। ପରେ ସମ୍ପୃକ୍ତ ଜନ ପ୍ରତିନିଧି ଜଣକ ତାଙ୍କ ବାପା ଓ ଭାଇଙ୍କ ସହ ମିଶି ଜଣେ ଆନ୍ଦୋଳନରେ ସାମିଲ ହୋଇଥିବା ଝିଲି ଦଳବେହେରାଙ୍କ ଘରକୁ ଯାଇ ଗାଲିଗୁଲଜ କରିବା ସହ ତାଙ୍କୁ ମାଡ଼ ମାରିଥିବା ଗୋଲନ୍ଥରା ଥାନାରେ ଅଭିଯୋଗ ହୋଇଛି। ଏପରିକି ପୁଅକୁ ମଧ୍ୟ ମାଡ ମରାଯାଇଥିବା ଝିଲି ଅଭିଯୋଗ କରିଛନ୍ତି। ତେବେ ଘଟଣାର ତଦନ୍ତ ପରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ପୋଲିସ କହିଛି।
ପ୍ରକାଶ ଯେ, ୩ ମାସ ହେଲା ପାନୀୟ ଜଳ ଯୋଗାଇବା ପାଇଁ ସ୍ଥାନୀୟ ସରପଞ୍ଚ ପ୍ରତି ଘର ପିଛା ୧ ହଜାର ଟଙ୍କା ଆଦାୟ କରିଥିଲେ। ହେଲେ ବର୍ତ୍ତମାନ ସୁଦ୍ଧା ଗ୍ରାମରେ ଜଳ ବ୍ୟବସ୍ଥା ହୋଇନାହିଁ ବୋଲି ଗ୍ରାମବାସୀ ଅଭିଯୋଗ କରିଛନ୍ତି। ତେଣୁ ଶତାଧିକ ମହିଳା, ପୁରୁଷ ଏକାଠି ହୋଇ ଶୀଘ୍ର ପାନୀୟ ଜଳ ଯୋଗାଅ ନ ହେଲେ ଆମ ଟଙ୍କା ଫେରାଅ ଅଭିଯୋଗ କରି ଧାରଣାରେ ବସିଥିଲେ।
ଖରାଦିନ ଯୋଗୁ ଗ୍ରାମର ପୋଖରୀ, ନଳକୂପ ଶୁଖିଗଲାଣି। ପ୍ରାୟ ୩ କିଲୋମିଟର ଦୂରରୁ ଲୋକଙ୍କୁ ପାଣି ଆଣିବାକୁ ପଡୁଛି। ସରପଞ୍ଚ ଯାହା ଟଙ୍କା ଆଦାୟ କରିଛନ୍ତି ସେଥିରୁ କେତେ ନିଜ ଲୋକଙ୍କୁ ବାଣ୍ଟି ଦେଇଥିବା ବେଳେ ବଳକା ଟଙ୍କା ହେରଫେର ହୋଇଥିବା ଜଣାପଡ଼ିଛି। ସରପଞ୍ଚ ଗୀତାଞ୍ଜଳି ପାତ୍ରଙ୍କ ସ୍ବାମୀ ଧାରଣାସ୍ଥଳକୁ ଆସି ଏକ ସପ୍ତାହ ସମୟ ମାଗିଛନ୍ତି। ଆମେ ଯାହା ଟଙ୍କା ଆଦାୟ କରିଥିଲୁ ବର୍ତ୍ତମାନ ଅଳ୍ପ ଟଙ୍କା ପାଖରେ ଅଛି। ବଳକା ଅନ୍ୟମାନଙ୍କ ପାଖରେ ରହିଛି। ତୁରନ୍ତ ସେମାନଙ୍କ ନିକଟରୁ ଟଙ୍କା ଆଣି ମଟର ଓ ପାଇପ୍ ଲାଇନ ମରାମତି କରି ପ୍ରତି ସାହିକୁ ପାଣି ଯୋଗାଣ ହେବ ବୋଲି କହିଥିଲେ। ପ୍ରତିଶ୍ରୁତି ପାଇବା ପରେ ମହିଳା, ପୁରୁଷମାନେ ଧାରଣାରୁ ଓହରିଥିଲେ ।
