ନୂଆଦିଲ୍ଲୀ,୨୪।୯: ସେପ୍ଟେମ୍ବର ୨୪ ତାରିଖ ଭାରତୀୟ କ୍ରିକେଟ ପାଇଁ ସ୍ବର୍ଣ୍ଣିମ ଦିନ। ଠିକ୍ ୧୪ ବର୍ଷ ତଳେ ଅର୍ଥାତ୍ ୨୦୦୭ରେ ଆଜିର ଦିନରେ ଭାରତ ଟି୨୦ ବିଶ୍ୱକପ୍ ଟ୍ରଫି ହାତେଇଥିଲା। ଫାଇନାଲରେ ଚିରପ୍ରତିଦ୍ୱନ୍ଦ୍ୱୀ ପାକିସ୍ତାନକୁ ହରାଇ ଇତିହାସ ରଚିଥିଲା ମହେନ୍ଦ୍ର ସିଂ ଧୋନୀଙ୍କ ନେତୃତ୍ୱାଧୀନ ଟିମ୍ ଇଣ୍ଡିଆ।
ଜୋହାନ୍ସବର୍ଗରେ ଖେଳାଯାଇଥିବା ପାକିସ୍ତାନ ବିପକ୍ଷ ଫାଇନାଲ ମ୍ୟାଚ୍ରେ ଭାରତ ଟସ୍ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲା। ଆହତ ସମସ୍ୟା କାରଣରୁ ଫାଇନାଲ ପାଇଁ ଅଭିଜ୍ଞ ଓପନର ବୀରେନ୍ଦ୍ର ସେହ୍ବାଗ ଉପଲବ୍ଧ ନ ଥିଲେ। ତାଙ୍କ ବଦଳରେ ଗୌତମ ଗମ୍ଭୀରଙ୍କ ସହ ଓପନିଂ କରିଥିଲେ ୟୁସୁଫ ପଠାନ। ଗୋଟେଏ ପଟେ ଗମ୍ଭୀର (୭୫ ରନ୍, ୮ ଚୌକା ଓ ୨ ଛକା) ଆଟାକିଂ ଶଟ୍ ଖେଳୁଥିବା ବେଳେ ଅନ୍ୟ ପଟେ କୌଣସି ବ୍ୟାଟ୍ସମ୍ୟାନ ତିଷ୍ଠି ପାରି ନ ଥିଲେ। ଶେଷ ଆଡ଼କୁ ଧୂଆଁଦାର ୩୦ ରନ୍ର ପାଳି ଖେଳିଥିଲେ ରୋହିତ ଶର୍ମା । ଫଳରେ ଭାରତୀୟ ଦଳ ଧାର୍ଯ୍ୟ ୨୦ ଓଭରରେ ୫ ଉଇକେଟ ହରାଇ ୧୫୭ ରନ୍ କରିବାକୁ ସକ୍ଷମ ହୋଇଥିଲା।
୧୫୮ ରନ୍ର ଟାର୍ଗେଟ ନେଇ ଓହ୍ଲାଇଥିବା ପାକିସ୍ତାନର ବ୍ୟାଟ୍ସମ୍ୟାନଙ୍କୁ ଲଗାତାର ହଇରାଣ କରିଥିଲେ ଆର ପି ସିଂ ଓ ଇର୍ଫାନ ପଠାନ। ଦୁହେଁ ୩ ଲେଖାଏ ଉଇକେଟ ନେଇ ପାକିସ୍ତାନର ବ୍ୟାଟିଂ ଲାଇନ୍ ଅପ୍ ବିଗାଡ଼ି ଦେଇଥିଲେ। ହେଲେ ଶେଷ ପର୍ଯ୍ୟନ୍ତ ଲଢ଼େଇ ଜାରି ରଖିଥିଲେ ମିଶ୍ବା ଉଲ ହକ୍।
୧୯ ଓଭରରେ ୯ ଉଇକେଟ ହରାଇ ୧୪୫ ରନ୍ କରିଥାଏ ପାକିସ୍ତାନ। ଶେଷ ଓଭରରେ ମ୍ୟାଚ୍ ଜିତିବା ପାଇଁ ଦଳକୁ ଦରକାର ଥାଏ ୧୩ ରନ୍। ସମସ୍ତ ପେସରଙ୍କ ଓଭର ଶେଷ ହୋଇଯାଇଥିବାରୁ ହରଭଜନ ସିଂଙ୍କ ବଦଳରେ ଯୋଗେନ୍ଦର ଶର୍ମାଙ୍କୁ ବାଛିଥିଲେ ଧୋନୀ। ଚାପ ଏତେ ଥିଲେ ଯେ, ପ୍ରଥମ ବଲରେ ବଡ଼ ଓ୍ବାଇଡ୍ ପକାଇଥିଲେ ଯୋଗେନ୍ଦର। ତା’ ପର ବଲରେ ସେ କୌଣସି ରନ୍ ଦେଇ ନ ଥିଲେ। କିନ୍ତୁ ଦ୍ୱିତୀୟ ବଲ ଫୁଲଟଜ ପକାଇଥିଲେ, ଯାହାକୁ ଛକା ଲଗାଇଥିଲେ ମିଶବା। କିନ୍ତୁ ପରବର୍ତ୍ତୀୟ ବଲରେ ସ୍କୁପ ଶଟ୍ ଖେଳିବାକୁ ଯାଇ ମିଶବା ଧରାପଡ଼ିଥିଲେ ଏସ୍ ଶ୍ରାସାନ୍ଥଙ୍କ ହାତରେ। ଫଳରେ ୫ ରନ୍ରେ ଭାରତ ଜିତି ନେଇଥିଲା ପ୍ରଥମ ଟି୨୦ ବିଶ୍ୱକପ୍।
