ପାରାଦୀପ,୧୦ା୬(ସ୍ବ.ପ୍ର.): ପରିଚାଳନାଗତ ତ୍ରୁଟି, ଦଣ୍ଡ ବ୍ୟବସ୍ଥା ଉଚ୍ଛେଦ, ଗୁଣାତ୍ମକ ପାଠ୍ୟକ୍ରମର ଅଭାବ ଓ ଶିକ୍ଷା କ୍ଷେତ୍ରରେ ରାଜନୈତିକ ହସ୍ତକ୍ଷେପ ଆଦି କାରଣରୁ ସରକାରୀ ବିଦ୍ୟାଳୟଗୁଡିକ ରୁଗ୍ଣ ଅବସ୍ଥାକୁ ଚାଲିଯାଉଥିବା କୁହାଯାଉଛି। ଏଥିଯୋଗୁ ବିଦ୍ୟାଳୟରେ ଛାତ୍ରୀଛାତ୍ରଙ୍କ ଉପସ୍ଥାନ ହ୍ରାସ ପାଇବାରେ ଲାଗିଛି। ଫଳରେ ପ୍ରତିବର୍ଷ ସାରା ରାଜ୍ୟରେ ବହୁ ସରକାରୀ ସ୍କୁଲ ସବୁଦିନ ପାଇଁ ବନ୍ଦ ହେଉଥିବା ଦେଖିବାକୁ ମିଳୁଛି। ଶିକ୍ଷାର ଏଭଳି ଦୁରାବସ୍ଥା ଯୋଗୁ ଚଳିତବର୍ଷ କୁଜଙ୍ଗ ଶିକ୍ଷାଜିଲାରେ ୧୧ଟି ସରକାରୀ ବିଦ୍ୟାଳୟ ବନ୍ଦ ହୋଇଛି। ସେହି ସବୁ ସ୍କୁଲରେ ଥିବା ୧୦ରୁ କମ୍ ଛାତ୍ରୀଛାତ୍ରଙ୍କୁ ନିକଟସ୍ଥ ସ୍କୁଲରେ ପଢିବା ପାଇଁ ବ୍ୟବସ୍ଥା ହୋଇଛି। ସେହି ୧୧ ସ୍କୁଲ ହେଲା ଚାନ୍ଦପୁର, ହରିପୁର, ଧୂସଳ, କୋଷ୍ଟିମୁଣ୍ଡା, କୋରିଲୋ, ରାଣୀପଡ଼ା, ତେନ୍ତୁଳିଆ, ମଠସାହି, ବିବଚ୍ଛପୁର ଓ ବୀଣାପାଣି ପ୍ରାଥମିକ ବିଦ୍ୟାଳୟ। ଏଥିରେ ପାରାଦୀପ ପୌରାଞ୍ଚଳରେ ଥିବା ୧୨ ସରକାରୀ ସ୍କୁଲ ମଧ୍ୟରୁ କେବଳ ଶୁଖୁଆଖଳାରେ ଥିବା ବୀଣାପାଣୀ ବିଦ୍ୟାଳୟ ରହିଛି। ଉକ୍ତ ସ୍କୁଲର ୯ ଛାତ୍ରୀଛାତ୍ର ନିକଟସ୍ଥ ଘୋଲାପଡ଼ା ପ୍ରାଥମିକ ବିଦ୍ୟାଳୟରେ ପଢିବେ ବୋଲି ଶିକ୍ଷା ବିଭାଗ ପକ୍ଷରୁ ସମ୍ପୃକ୍ତ ସ୍କୁଲର ପ୍ରଧାନଶିକ୍ଷକଙ୍କ ପାଖକୁ ଚିଠି (ନଂ.୯୪୦) ଆସିଛି। ଉକ୍ତ ଚିଠି ପାଇବା ପରେ ଗତ ଗୁରୁବାର ବିଧିବଦ୍ଧ ଭାବେ ସ୍କୁଲ ବନ୍ଦ ବିଜ୍ଞପ୍ତି ପ୍ରକାଶ ପାଇବା ସହ ଦାୟିତ୍ୱ ବଣ୍ଟନ କରାଯାଇଛି ବୋଲି ସିଆରସିସି ପ୍ରମୋଦ ମହାନ୍ତି କହିଛନ୍ତି। ସୂଚନାଯୋଗ୍ୟ, ୨୦୦୮ରେ ଶୁଖୁଆଖଳା ସମେତ ପାରାଦୀପର ୧୨ଟି ସ୍ଥାନରେ ସର୍ବଶିକ୍ଷା ଯୋଜନା ଅଧୀନରେ ୧୨ଟି ବିଦ୍ୟାଳୟ ଖୋଲିଥିଲା। ସେତେବେଳେ ୧୨ ସ୍କୁଲରେ ୪୭୦୦ ଛାତ୍ରୀଛାତ୍ର ପଢୁଥିଲେ। କିନ୍ତୁ ବିଭିନ୍ନ କାରଣରୁ ଏବେ ଛାତ୍ରୀଛାତ୍ର ସଂଖ୍ୟା ହ୍ରାସ ପାଇ ୯୪୦ରେ ପହଞ୍ଚତ୍ଛି। ଶୁଖୁଆଖଳାରେ ଖୋଲାଯାଇଥିବା ସ୍କୁଲର ନାମ ବିୟରଫ୍ୟାକ୍ଟ୍ରି ବିଦ୍ୟାଳୟ ରଖାଯାଇଥିଲା। ଏହି ନାମକୁ ବିରୋଧ ହେବା ସମ୍ପର୍କରେ ଧରିତ୍ରୀରେ ଖବର ପ୍ରକାଶ ପାଇବା ପରେ ୨୦୧୫ ପରିବର୍ତ୍ତନ କରାଯାଇ ବୀଣାପାଣି ରଖାଯାଇଥିଲା। ଏହି ସ୍କୁଲ ବନ୍ଦ ହେବାବେଳକୁ ସରକାରୀ ଭାବେ ୯ଜଣ ପିଲା ଥିବା ଦର୍ଶାଯାଇଛି। ବାସ୍ତବରେ ଉକ୍ତ ସ୍କୁଲରେ ୪ରୁ ୫ ଜଣ ପିଲା ପ୍ରଥମରୁ ପଞ୍ଚମ ଶ୍ରେଣୀ ମଧ୍ୟରେ ପଢୁଥିଲେ। ସେମାନଙ୍କୁ ପଢାଇବା ପାଇଁ ୨ ଜଣ ଲେବଲ ୪ ଶିକ୍ଷୟିତ୍ରୀ ଥିଲେ। ଏ ସମ୍ପର୍କରେ ଏକାଧିକଥର ଖବର ପ୍ରକାଶ ପାଇବା ପରେ ଏବେ ଉକ୍ତ ବିଦ୍ୟାଳୟ ବନ୍ଦ ହୋଇଛି। ସେହିପରି ଆଉ ଏକ ସ୍କୁଲ ହେଉଛି ନୂଆବଜାରରେ ଥିବା ମୁକ୍ତେଶ୍ୱର ପ୍ରାଥମିକ ବିଦ୍ୟାଳୟ। ତାହା ମଧ୍ୟ ବନ୍ଦ ହୋଇ ସଞ୍ଜୟ ଗାନ୍ଧୀ ସ୍କୁଲରେ ମିଶ୍ରଣ ହେବା କଥା। କିନ୍ତୁ ସେଥିରେ ୨୫ଜଣ ପିଲା ପଢୁଥିବା ଦର୍ଶାଯାଇ ମିଶ୍ରଣରୁ ବାଦ୍ ଦିଆଯାଇଛି। ବାସ୍ତବରେ ଉକ୍ତ ସ୍କୁଲରେ ୧୦ରୁ କମ୍ ପିଲା ପଢୁଛନ୍ତି। ସଞ୍ଜୟ ଗାନ୍ଧୀ ସ୍କୁଲଠାରୁ ମୁକ୍ତେଶ୍ୱର ସ୍କୁଲର ଦୂରତା ମାତ୍ର ୫୦୦ ମିଟର। ଶିକ୍ଷୟିତ୍ରୀ ଶିକ୍ଷକ ଥଇଥାନ ନୀତିରେ ଉକ୍ତ ସ୍କୁଲକୁ ବାଦ୍ ଦିଆଯାଇଥିବା ଅଭିଯୋଗ ହେଉଛି। ଏ ସମ୍ପର୍କରେ ଜଗତ୍ସିଂହପୁର ଜିଲା ଶିକ୍ଷା ଅଧିକାରୀ ପ୍ରତିଭା ମଞ୍ଜରୀ ଦାଶଙ୍କୁ ପଚାରିବାରେ ସେ କହିଲେ ଯେ ମୁକ୍ତେଶ୍ୱର ବିଦ୍ୟାଳୟ ମିଶ୍ରଣ ତାଲିକା ବିଳମ୍ବରେ ପହଞ୍ଚତ୍ବା ଓ ସେଥିରେ କେତେଜଣ ଲୋକ ଅଭିଯୋଗ ଉଠାଇବା ଯୋଗୁ ତାହା ଚଳିତଥର ମିଶ୍ରଣ ହୋଇପାରିନାହିଁ। ଏହା ପରବର୍ତ୍ତୀ ପର୍ଯ୍ୟାୟରେ ମିଶ୍ରଣ କରାଯିବ ବୋଲି ସେ ପ୍ରକାଶ କରିଛନ୍ତି।
