କୁଜଙ୍ଗ,୨୫ା୭(ସ୍ବ.ପ୍ର): ସରକାର ଗରିବ ଭୂମିହୀନମାନଙ୍କୁ ପଟା ସହ ଜମି ଓ ବାସଗୃହ ଯୋଗାଇଦେବାକୁ ଯୋଜନା କରିଛନ୍ତି। ଏ କ୍ଷେତ୍ରରେ ଆଦିବାସୀମାନଙ୍କୁ ଅଗ୍ରାଧିକାର ଦେବାର ବ୍ୟବସ୍ଥା ମଧ୍ୟ ରହିଛି। କିନ୍ତୁ ଦୁର୍ଭାଗ୍ୟର ବିଷୟ କୁଜଙ୍ଗ ବ୍ଲକ ତାଳପଡ଼ା ଗ୍ରାମର ଜଣେ ଆଦିବାସୀ ବିଧବା ମହିଳା ସରକାରଙ୍କ ଏହି ଯୋଜନାରୁ ବଞ୍ଚତ୍ତ ହୋଇଛନ୍ତି। ତାଙ୍କୁ ସରକାରୀ ଯୋଜନାରେ ଜମିପଟା ମିଳିଛି, ହେଲେ ଅଦ୍ୟାବଧି ଜମି ମିଳିପାରିନାହିଁ। ସେ ହେଲେ ଏହି ପଞ୍ଚାୟତର ସମିତି ସଭ୍ୟା ସାକ୍ରା ଟୁଡୁ। ଜଣେ ନିର୍ବାଚିତ ଜନପ୍ରତିନିଧି ହୋଇ ମଧ୍ୟ ସେ ସରକାରୀ ଯୋଜନାରୁ ବଞ୍ଚତ୍ତ ହେଉଛନ୍ତି। ଏପରିସ୍ଥଳେ ଜଣେ ସାଧାରଣ ନାଗରିକ ଅବସ୍ଥା କିପରି ହେଉଥିବା ତାହା ସହଜରେ ଅନୁମେୟ।
ସୂଚନା ଅନୁଯାୟୀ, ସେ ତାଳପଡ଼ା ଗ୍ରାମରେ ଅସ୍ଥାୟୀଭାବେ ଗୃହ ନିର୍ମାଣ କରି ଦୀର୍ଘ ୨୦ ବର୍ଷରୁ ଊର୍ଦ୍ଧ୍ୱ ହେବ ବସବାସ କରୁଛନ୍ତି। ତାଙ୍କ ବାପା ମଧ୍ୟ ୫୦ ବର୍ଷରୁ ଊର୍ଦ୍ଧ୍ୱ ହେବ ଏଠାରେ ରହିଆସିଛନ୍ତି। ସ୍ବାମୀଙ୍କ ବିୟୋଗ ପରେ ସେ କୁଜଙ୍ଗ ତହସିଲଦାରଙ୍କ ନିକଟରେ ସରକାରୀ ଜମିପଟା ପାଇଁ ଆବେଦନ କରିଥିଲେ। ତହସିଲଦାର ଆବେଦନକୁ ବିଚାର କରି ତାଙ୍କୁ ତାଳପଡ଼ା ମୌଜାରେ ଖାତା ନଂ-୭୫୫/୫୨୪, ପ୍ଲଟ ନଂ-୨୧୯୨/୨୫୬୩ରେ ୪ ଡେସିମିଲର ଢିଅପଟା ପ୍ରଦାନ କରିଥିଲେ। ସୋମବାର ତାଙ୍କୁ ଉକ୍ତ ସ୍ଥାନ ଦଖଲ ଦେବା ପାଇଁ ତହସିଲଦାର ରମେଶ ଚନ୍ଦ୍ର ପଣ୍ଡାଙ୍କ ନିର୍ଦ୍ଦେଶ କ୍ରମେ ଆରଆଇ ଓ ଅମିନ ଯାଇଥିଲେ। କିନ୍ତୁ ଦଖଲ ପ୍ରଦାନ ପ୍ରକ୍ରିୟା ଆରମ୍ଭ ହେବା ମାତ୍ରେ ଭାଲିଆପାଟଣା ଗ୍ରାମର ୩୦ରୁ ୪୦ ଲୋକ ପହଞ୍ଚତ୍ ଏହାକୁ ବିରୋଧ କରିଥିଲେ। ଏଥିସହ ତାଙ୍କୁ ଜାତିଗତ ଆକ୍ଷେପ କରି ଅଶ୍ରାବ୍ୟ ଭାଷାରେ ଗାଳିଗୁଲଜ କରିଥିବା ଅଭିଯୋଗ ହୋଇଛି। ଖବରପାଇ ତହସିଲଦାର ଘଟଣାସ୍ଥଳରେ ପହଞ୍ଚତ୍ଥିଲେ। ମାତ୍ର ଅଭିଯୁକ୍ତମାନେ ତହସିଲଦାରଙ୍କୁ ମଧ୍ୟ ଗାଳିଗୁଲଜ କରିଥିଲେ। ଉକ୍ତ ସରକାରୀ ପ୍ଲଟରୁ ନ ଓହରିଲେ ତାଙ୍କୁ ସେଠାରେ ସେମାନେ ରଖାଇ ଦେବେନାହିଁ ବୋଲି କହିଥିଲେ। ପରେ ପୋଲିସ ପହଞ୍ଚତ୍ ପରିସ୍ଥିତି ନିୟନ୍ତ୍ରଣ କରିଥିଲା। ଘଟଣା ସମ୍ପର୍କରେ ସାକ୍ରା ମୁଖ୍ୟମନ୍ତ୍ରୀ, ଜିଲାପାଳ, ଏସ୍ପିଙ୍କ ସମେତ କୁଜଙ୍ଗ ତହସିଲଦାର, ଆଦିବାସୀ କଲ୍ୟାଣ ବୋର୍ଡ ଅଧ୍ୟକ୍ଷଙ୍କୁ ଲିଖିତ ଭାବେ ଅବଗତ କରାଇଛନ୍ତି। ଏ ସମ୍ପର୍କରେ ତହସିଲଦାର ପଣ୍ଡା କହିଛନ୍ତି ଯେ, ସେ ଉପଯୁକ୍ତ ପଦକ୍ଷେପ ଗ୍ରହଣ କରିବା ସହିତ ଘଟଣା ସମ୍ପର୍କରେ ତିର୍ତ୍ତୋଲ ଥାନାରେ ଏତେଲା ଦିଆଯାଇଛି। ଆଇନ ଅନୁଯାୟୀ କାର୍ଯ୍ୟନୁଷ୍ଠାନ ଗ୍ରହଣ କରାଯିବ।
