ନୟାଗଡ଼ ଅଫିସ,୧୨ା୧୨: ଆମେ ବ୍ୟବହାର କରୁଥିବା ଅଧିକାଂଶ ଜିନିଷ ପ୍ଲାଷ୍ଟିକରୁ ତିଆରି। ପରିବେଶ ସୁରକ୍ଷା ପାଇଁ ପ୍ଲାଷ୍ଟିକ ବ୍ୟବହାର ନ କରିବାକୁ ବିଭିନ୍ନ ସଚେତନତା କାର୍ଯ୍ୟକ୍ରମ କରାଯାଉଛି। ଏପରି କି ରାଜ୍ୟ ସରକାର ପଲିଥିନକୁ ବ୍ୟାନ୍ ମଧ୍ୟ କରିଛନ୍ତି। ଏ କ୍ଷେତ୍ରରେ ନୟାଗଡ଼ ବନ ବିଭାଗ ଦୁଇପାଦ ଆଗକୁ ଯାଇ ପ୍ଲାଷ୍ଟିକ ବଦଳରେ ବାଉଁଶ ବ୍ୟବହାର କରିବାକୁ ନିଷ୍ପତ୍ତି ନେଇଛି। ପ୍ରତିବର୍ଷ ଲଗାଯାଉଥିବା ଚାରା ପ୍ଲାଷ୍ଟିକ ଜରି ବଦଳରେ ବାଉଁଶ ଖୋଳରେ ଲଗାଇବା ପାଇଁ ଉଦ୍ୟମ ଆରମ୍ଭ କରିଛି। ପ୍ରାଥମିକ ପର୍ଯ୍ୟାୟରେ ନୟାଗଡ଼ ବ୍ଲକ ମୁକ୍ତାପୁର କେନ୍ଦ୍ରୀୟ ନର୍ସରୀ (ଚାରା ଉତ୍ପାଦନ କେନ୍ଦ୍ର)ରେ ଏହି କାର୍ଯ୍ୟକ୍ରମ ପରୀକ୍ଷାମୂଳକ ଭାବେ ଆରମ୍ଭ ହେବାକୁ ଯାଉଛି। ସେଠାରେ ଲଗାଯାଉଥିବା ଚାରା ପ୍ଲାଷ୍ଟିକ ଜରି ବଦଳରେ ବାଉଁଶ ଖୋଳରେ ଲଗାଇବା ପାଇଁ ପ୍ରସ୍ତୁତି ଚାଲିଛି। ବାଉଁଶର ଗଣ୍ଠି ତଳକୁ କାଟି ଏକ ଖୋଳ ପ୍ରସ୍ତୁତ କରାଯାଉଛି। ଗୋଟିଏ ବାଉଁଶରୁ ପାଖାପାଖି ୧୦ରୁ ଅଧିକ ଖୋଳ ପ୍ରସ୍ତୁତ ହେଉଛି। ଏହି ବାଉଁଶ ଖୋଳରେ ମାଟି ଦିଆଯାଇ ମଞ୍ଜି ପୋତାଯାଇ ଚାରା ଉତ୍ପନ୍ନ କରାଯିବ। ଖାଲି ସେତିକି ନୁହେଁ, ଚଳିତବର୍ଷ ଜିଲା ମହୋତ୍ସବକୁ ଜିଲା ପ୍ରଶାସନ ପ୍ଲାଷ୍ଟିକମୁକ୍ତ କରିବା ପାଇଁ ପ୍ରୟାସ କରୁଛି। ଏହି ବାଉଁଶ ଖୋଳରେ ଫୁଲ ସଜାଯାଇ ଅତିଥିମାନଙ୍କୁ ପ୍ରଦାନ କରାଯିବ। ବନ ବିଭାଗର ଏଭଳି ପଦକ୍ଷେପକୁ ସାଧାରଣରେ ପ୍ରଶଂସା କରାଯାଇଛି। ସୂଚନାଯୋଗ୍ୟ ଯେ, ନୟାଗଡ଼ ଜିଲାରେ ଗୋଟିଏ ମେଗା ନର୍ସରୀ ଓ ୬ଟି କେନ୍ଦ୍ରୀୟ ନର୍ସରୀ ରହିଛି। ପ୍ରତିବର୍ଷ ଉକ୍ତ ନର୍ସରୀରେ ପ୍ରାୟ ୮ ଲକ୍ଷ ଚାରା ଉପତ୍ାଦନ କରାଯାଏ। ଏଥିପାଇଁ ପଲିଥିନ ଆବଶ୍ୟକ ହୋଇଥାଏ। ବନ ବିଭାଗ ପଲିଥିନମୁକ୍ତ କରି କିପରି ପରିବେଶ ଅନୁକୂଳ ଭାବେ ଚାରା ଲଗାଯିବ ସେଥିପ୍ରତି ଗୁରୁତ୍ୱ ଦେଇଛି। ଜିଲାର ବିଭିନ୍ନ ନର୍ସରୀରେ ନିମ୍ବ, କରଞ୍ଜ, କୃଷ୍ଣଚୂଡ଼ା, ରାଧାଚୂଡ଼ା, ମହାନିମ୍ବ, ଶାଗୁଆନ, ପଟାସ, ଆମ୍ବ, ପଣସ, ଅଁଳା, ଜାମୁ, ସୁନାରି ଆଦି ଚାରା ଉତ୍ପାଦନ କରାଯାଏ। ଚାରା ପାଇଁ ବ୍ୟବହୃତ ହେଉଥିବା ପଲିଥିନରେ ୨ରୁ ୩ଟଙ୍କା ଖର୍ଚ୍ଚ ହେଉଥିବା ବେଳେ ବାଉଁଶ ଖୋଳରେ ପାଖାପାଖି ୮ରୁ ୯ ଟଙ୍କା ଖର୍ଚ୍ଚ ହେବ। ମୁକ୍ତାପୁରଠାରେ ଏହା ସଫଳ ହେଲେ ଆଗାମୀ ଦିନରେ ଏହି ପଦ୍ଧତି ଅନ୍ୟ ନର୍ସରୀରେ ଆପଣାଯିବ ବୋଲି ନୟାଗଡ଼ ଡିଏଫଓ ଧନରାଜ ଏଚ୍ଡି ପ୍ରକାଶ କରିଛନ୍ତି।
