ନୟାଗଡ଼ ଅଫିସ,୧।୧୨- ନୟାଗଡ଼ ଜିଲା ମତ୍ସ୍ୟ ବିଭାଗ ପକ୍ଷରୁ ନୀଳ ବିପ୍ଲବ ଯୋଜନାରେ ୨୪ ଜଣ ହିତାଧିକାରୀଙ୍କୁ ଶନିବାର ଲୁନା (ମୋପେଡ଼), ମାଛ ରଖିବା ପାଇଁ ବରଫ ବାକ୍ସ ଓ ହେଲମେଟ ସହାୟତା ପ୍ରଦାନ କରାଯାଇଛି। ଜିଲାପାଳଙ୍କ କାର୍ଯ୍ୟାଳୟ ପରିସରରେ ଆୟୋଜିତ କାର୍ଯ୍ୟକ୍ରମରେ ସ୍ଥାନୀୟ ବିଧାୟକ ତଥା କୃଷି ଓ ଉଚ୍ଚଶିକ୍ଷା ମନ୍ତ୍ରୀ ଡ. ଅରୁଣ କୁମାର ସାହୁ ମୁଖ୍ୟ ଅତିଥିଭାବେ ଯୋଗ ଦେଇ ନୀଳ ବିପ୍ଳବ ଯୋଜନା ମାଧ୍ୟମରେ ମତ୍ସ୍ୟ ପରିବହନ ଭିତ୍ତି ସଂରଚନା ସହାୟତାର ଉଦ୍ଘାଟନ କରି ହିତାଧିକାରୀଙ୍କୁ ଜିନିଷଗୁଡ଼ିକ ବଣ୍ଟନ କରିଥିଲେ। ଏହା ମତ୍ସ୍ୟଜୀବୀଙ୍କର ଆୟ ବୃଦ୍ଧି କରିବା ସଙ୍ଗେ ଜୀବନ ଶୈଳୀରେ ପରିବର୍ତ୍ତନ ଘଟିପାରିବ ବୋଲି ମନ୍ତ୍ରୀ ସାହୁ ପ୍ରକାଶ କରିଥିଲେ ା ଗ୍ରାହକମାନଙ୍କୁ ଅଳ୍ପ ସମୟ ମଧ୍ୟରେ ଆଭ୍ୟନ୍ତରୀଣ ଜାଗାରେ ସତେଜ ମାଛ ଯୋଗାଇ ଦିଆଯାଇପାରିବ। ପ୍ରତ୍ୟେକ ମୋପେଡ୍ ଗାଡ଼ିର ମୂଲ୍ୟ ୪୦୬୬୫ ଟଙ୍କା ହୋଇଥିବା ବେଳେ ବରଫ ବାକ୍ସର ମୂଲ୍ୟ ୪୬୦୦ ଟଙ୍କା ା ଏହି ଯୋଜନାରେ ତଫସିଲ ଭୁକ୍ତ ଜାତି ଓ ଉପଜାତିମାନଙ୍କ ପାଇଁ ଶତକଡ଼ା ୬୦ ପ୍ରତିଶତ ରିହାତି ମିଳିବା ସ୍ଥଳେ ସାଧାରଣବର୍ଗର ଲୋକଙ୍କ ପାଇଁ ଶତକଡ଼ା ୪୦ ପ୍ରତିଶତ ରିହାତି ମିଳିିବ । ଅନ୍ୟମାନଙ୍କ ମଧ୍ୟରେ ଏହି କାର୍ଯ୍ୟକ୍ରମରେ କେନ୍ଦ୍ରାଞ୍ଚଳ ରାଜସ୍ବ ଆୟୁକ୍ତ ଅନିଲ କୁମାର ସାମଲ, ଜିଲାପାଳ ଡା. ପୋମା ଟୁଡୁ, ଅତିରିକ୍ତ ଜିଲାପାଳ ବିଧାନ ଚନ୍ଦ୍ର ରାୟ, ପ୍ରକଳ୍ପ ନିର୍ଦ୍ଦେଶକ ସୁବାସ ଚନ୍ଦ୍ର ରାୟ, ଉପଜିଲାପାଳ ଲଗ୍ନଜିତ୍ ରାଉତ, ମତ୍ସ୍ୟ ବିଭାଗର ପଦାଧିକାରୀମାନେ ଉପସ୍ଥିତ ଥିଲେ।
