ଅନୁଗୋଳ ଅଫିସ, ୬।୮
ଅନୁଗୋଳ ସହର ବସ୍ଷ୍ଟାଣ୍ଡ ନିକଟରେ ବଳାତ୍କାରର ଶିକାର ହୋଇଥିବା ମହାରାଷ୍ଟ୍ରର ଏକ ଶ୍ରମିକ ପରିବାରର ୮ ବର୍ଷିୟା ନାବାଳିକା ସୁସ୍ଥ ହୋଇ ରବିବାର କଟକରୁ ଫେରିଥିଲେ। ସୋମବାର ନାବାଳିକାଙ୍କ ୧୬୪ ବୟାନ ରେକର୍ଡ କରାଯାଇଥିବା ଅନୁଗୋଳ ଥାନା ପକ୍ଷରୁ ସୂଚନା ମିଳିଛି। ଏଥିସହ ଅପରାହ୍ନରେ ଅନୁଗୋଳ ଜେଲରେ ଟିଆଇ ପରେଡ଼ କରାଯାଇଥିଲା। ଅଭିଯୁକ୍ତ ଅମଲାପଡାର ଶିବୁ ପଟ୍ଟନାୟକଙ୍କୁ ଥାନାରେ ଦେଖି ନାବାଳିକା ଜଣକ ଡରିଯାଇଥିଲେ। ସାଙ୍ଗରେ ଯାଇଥିବା ସମ୍ପର୍କୀୟଙ୍କୁ ସେ ଜାବୁଡି ଧରିଥିଲେ। ଅଭିଯୁକ୍ତଙ୍କୁ ଚିହ୍ନିବା ପାଇଁ କୁହାଯିବା ପରେ ସେ ଶିବୁ ପଟ୍ଟନାୟକଙ୍କୁ ଚିହ୍ନଟ କରିଥିଲେ ବୋଲି ଜଣାପଡିଛି। ଏହାପରେ ନାବାଳିକାଙ୍କୁ ଅନୁଗୋଳ ପୋଲିସ ଜିଲା ଶିଶୁ ମଙ୍ଗଳ ସମିତକୁ ହସ୍ତାନ୍ତର କରାଇଥିଲା। ପୀଡିତା ଅସୁସ୍ଥ ସହ ସଂକ୍ରମଣ ଆଶଙ୍କା ଥିବାରୁ ଶିଶୁ ମଙ୍ଗଳ ସମିତି ଭାରପ୍ରାପ୍ତ ଅଧ୍ୟକ୍ଷ ତାଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିବା ପାଇଁ ନିର୍ଦ୍ଦେଶ ଦେଇଥିଲେ। ରାତି ୯ଟାରେ ତାଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିବା ସୂଚନା ମିଳିଛି। ନାବାଳିକାଙ୍କୁ ୨୪ ଘଣ୍ଟିଆ କଡ଼ା ସୁରକ୍ଷା ବଳୟ ମଧ୍ୟରେ ରଖିବାକୁ ଜିଲା ଶିଶୁ ମଙ୍ଗଳ ସମିତି ଭାରପ୍ରାପ୍ତ ଅଧ୍ୟକ୍ଷ ଦେବାଶିଷ ପଟ୍ଟନାୟକ ଅନୁଗୋଳ ପୋଲିସକୁ କହିଛନ୍ତି। ସମ୍ପୂର୍ଣ୍ଣ ସୁସ୍ଥ ହୋଇ ଫେରିବା ପରେ ପୀଡିତା କେଉଁଠାରେ ରହିବେ ତାର ନିଷ୍ପତ୍ତି ବୈଠକ ବସାଯାଇ ନିଆଯିବ ବୋଲି ପଟ୍ଟନାୟକ କହିଛନ୍ତି। ସାଇଣ୍ଟିଫିକ୍ ଟିମର ତଦନ୍ତ ରିପୋର୍ଟ ଆସିବା ପରେ ଚାର୍ଜଶିଟ୍ ଦାଖଲ କରାଯିବ ବୋଲି ଅନୁଗୋଳ ଥାନା ଅଧିକାରୀ ରମେଶ ଚନ୍ଦ୍ର ବିଶୋଇ ସୂଚନା ଦେଇଛନ୍ତି।
