ବାଲେଶ୍ୱର ଅଫିସ, ୫।୧-କେନ୍ଦ୍ର ସରକାରଙ୍କ ଦ୍ୱାରା ପ୍ରଣୀତ ନାଗରିକ ସଂଶୋଧନ ଆଇନ (ସିଏଏ), ଜାତୀୟ ନାଗରିକ ପଞ୍ଜୀକରଣ (ଏନ୍ଆରସି), ନୂତନ ପଦ୍ଧତିରେ ଜନଗଣନା (ଏନ୍ଆରପି)କୁ ବିରୋଧ କରି ବାଲେଶ୍ୱର ପ୍ରୋଗ୍ରେସିଭ୍ ସିଟିଜେନ୍ ଫୋରମ୍ ପକ୍ଷରୁ ଶନିବାର ସୁନହଟସ୍ଥିତ ଦରଘା ମଇଦାନରୁ ଶତାଧିକ ଲୋକ ଏକ ନୀରବ ଶୋଭାଯାତ୍ରାରେ ସହର ପରିକ୍ରମା କରି ଜିଲାପାଳଙ୍କ ଫାଟକ ସମ୍ମୁଖରେ ପହଞ୍ଚତ୍ଥିଲେ। ଫୋରମ୍ ସଭାପତି ତଥା ଆଇନଜୀବୀ ସେକ୍ ଅବଦୁଲ୍ ରଫିକ୍ଙ୍କ ସଭାପତିତ୍ୱରେ ସେଠାରେ ଏକ ସମାବେଶ ଅନୁଷ୍ଠିତ ହୋଇଥିଲା।
ଭାଜପା ନେତୃତ୍ୱାଧୀନ କେନ୍ଦ୍ର ସରକାରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହାଙ୍କ ଅପରିଣାମଦର୍ଶୀ କଳା ଆଇନକୁ ଦୃଢ଼ ବିରୋଧ କରିଥିଲେ। ଏହି ଆଇନ କାର୍ଯ୍ୟକାରୀ ହେଲେ ଦେଶରେ ଶହ ଶହ ବର୍ଷ ଧରି ବସବାସ କରିଆସୁଥିବା ପରିବାର ସଦସ୍ୟ ସେମାନଙ୍କର ନାଗରିକତା ହରାଇବେ। କେବଳ ମୁସଲମାନ ନୁହନ୍ତି, ସବୁଧର୍ମର ଲୋକ ଏହି ଆଇନ ଦ୍ୱାରା ପ୍ରଭାବିତ ହେବେ। ନାଗରିକକୁ ପ୍ରମାଣପତ୍ରର ଆଧାର ସଂଗ୍ରହ ପାଇଁ ଦେଶବାସୀ ଯେପରି ନୋଟ୍ବନ୍ଦୀ ବେଳେ ଅସୁବିଧାର ସମ୍ମୁଖୀନ ହୋଇଥିଲେ, ସେହିଭଳି ଏହି ସମସ୍ୟାର ସମାଧାନ ପାଇଁ ବର୍ଷ ବର୍ଷ ଧରି ଏକ ଅରାଜକତା ଦେଶରେ ସୃଷ୍ଟି ହେବ ବୋଲି ବକ୍ତାମାନେ ସୂଚନା ଦେଇଥିଲେ। ସମ୍ବିଧାନରେ ସମସ୍ତ ନାଗରିକଙ୍କୁ ସମାନତାର ଅଧିକାର ଦିଆଯାଇଛି। କିନ୍ତୁ ବର୍ତ୍ତମାନର ସରକାର ଧର୍ମ ନାମରେ ଦେଶକୁ ପୁନଶ୍ଚ ଭାଗ ଭାଗ ପାଇଁ ସଂଘ ପରିବାରର ପରାମର୍ଶରେ ପରିଚାଳିତ ମୋଦି ଓ ଶାହାଙ୍କ ଉଦ୍ୟମ ସଫଳ ହେବନାହିଁ ବୋଲି କଂଗ୍ରେସ, ସିପିଆଇ, ସିପିଏମ୍ ଦଳ ସମେତ ବିଭିନ୍ନ ଧର୍ମନିରପେକ୍ଷ ରାଜନୈତିକ ଦଳ, ସାମାଜିକ ଓ ଗଣ ସଙ୍ଗଠନ ତରଫରୁ ପୂର୍ବତନ ବିଧାୟକ ଅରୁଣ ଦେ, ସଞ୍ଜୀବ ଗିରି, ପ୍ରଦୀପ୍ତ ପଣ୍ଡା, ଜୟନ୍ତ ଦାସ, ଭାଗବତ ସାହୁ, ଗଗନ ସେଠୀ, ଗୌରାଙ୍ଗ ପାଣିଗ୍ରାହୀ, ଅର୍ଚ୍ଚନା ନନ୍ଦୀ, ପଦ୍ମଲୋଚନ ଲେଙ୍କା, ଭାଗବତ ପ୍ରତିହାରୀ ଓ ପ୍ରଜ୍ଞା ପାରମିତା ମହାନ୍ତି ପ୍ରମୁଖ ମତବ୍ୟକ୍ତ କରିଥିଲେ। ଏହି ଆନ୍ଦୋଳନକୁ ଶାନ୍ତିପୂର୍ଣ୍ଣ ଓ ଗଣତାନ୍ତ୍ରିକ ଧାରାରେ ସମଗ୍ର ଦେଶରେ ଚଳାଇ ରଖିବାକୁ ବକ୍ତାମାନେ ଆହ୍ବାନ ଦେଇଥିଲେ। ଆସନ୍ତା ୮ ତାରିଖ କେନ୍ଦ୍ର ସରକାରଙ୍କ ବିରେଧରେ ‘ଭାରତ ବନ୍ଦ’କୁ ଜିଲାରେ ସଫଳ କରିବା ପାଇଁ ନେତାମାନେ ନିବେଦନ କରିଥିଲେ। ଏକ ପ୍ରତିନିଧିଦଳ ଜିଲାପାଳ କେ. ସୁଦର୍ଶନ ଚକ୍ରବର୍ତ୍ତୀଙ୍କ ଜରିଆରେ ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ଏକ ୩ଦଫା ଦାବିପତ୍ର ପ୍ରଦାନ କରି ଏହି ଆଇନର ପୁନର୍ବିଚାର ପାଇଁ ନିବେଦନ କରିଥିଲେ। ହାଜି ସେକ୍ ଉସମାନ, ସଇରୁଲ୍ ହକ୍, ମନୱର ଅଲ୍ଲୀ ଖାନ୍, ସେକ୍ ହମିଦ୍, ଇନ୍ତେକାବ ଅଲ୍ଲୀ ଖାନ୍, ମିର୍ ଅବଦୁଲ ମଜିଦ୍, ଅଜଗର ଅଲ୍ଲୀ, ସେକ୍ ସଫିକ୍, ସେକ୍ ହାଇଦର, ମୋହିନୀମୋହନ ପରିଡ଼ା ଓ ପ୍ରେମରଞ୍ଜନ ପାତ୍ର ପ୍ରମୁଖ କାର୍ଯ୍ୟକ୍ରମ ପରିଚାଳନାର ନେତୃତ୍ୱ ନେଇଥିଲେ।
