ନୂଆଦିଲ୍ଲୀ,୩ା୮: ଦେଶର ନଦୀବନ୍ଧଗୁଡିକର ଅନୁଧ୍ୟାନ, ପରିଚାଳନା ଆଦି ପାଇଁ ଆନୁଷ୍ଠାନିକ ବ୍ୟବସ୍ଥା ନିମନ୍ତେ ନଦୀବନ୍ଧ ନିରାପତ୍ତା ବିଲ୍ ଶୁକ୍ରବାର ଲୋକ ସଭାରେ ଗୃହୀତ ହୋଇଛି। ଏହାଦ୍ୱାରା ରାଜ୍ୟଗୁଡିକର କ୍ଷମତା ଦଖଲ କରିବା ଉଦ୍ଦେଶ୍ୟ କେନ୍ଦ୍ରର ନାହିଁ ବୋଲି ଜଳଶକ୍ତି ମନ୍ତ୍ରୀ ଗଜେନ୍ଦ୍ର ସିଂ ଶେଖାଓ୍ବତ୍ କହିଥିଲେ। ନଦୀବନ୍ଧଗୁଡିକର ନିରାପତ୍ତା ଚିନ୍ତାଜନକ ବୋଲି ବିଜୁ ଜନତା ଦଳ (ବିଜେଡି) କହିବା ସହିତ ଏଥିପାଇଁ ରାଜ୍ୟ ସରକାରମାନଙ୍କୁ କ୍ଷମତା ପ୍ରଦାନ କରିବାକୁ କେନ୍ଦ୍ରକୁ ଅନୁରୋଧ କରିଛି। ଆଲୋଚନାରେ ଭାଗନେଇ ବିଜେଡି ଏମ୍ପି ଭର୍ତ୍ତୃହରି ମହତାବ କହିଥିଲେ, ବିଲ୍ରେ ଅନେକ ଅସଙ୍ଗତି ରହିଛି। ନଦୀବନ୍ଧ ପରିଚାଳନାରେ ବିଫଳତା ବଡ଼ ତ୍ରୁଟି। ଏଥିପାଇଁ ଅନେକ ଲୋକ ଦୁର୍ଦ୍ଦଶାର ସମ୍ମୁଖୀନ ହେଉଛନ୍ତି। ଏହି ସମସ୍ୟାର ସମାଧାନ ଲାଗି ରାଜ୍ୟମାନଙ୍କୁ କ୍ଷମତା ଦିଆଯିବା ଉଚିତ ବୋଲି ସେ ପ୍ରସ୍ତାବ ଦେଇଥିଲେ। ନଦୀବନ୍ଧ ନିରାପତ୍ତା ଦାୟିତ୍ୱ ନେବା ଲାଗି କେନ୍ଦ୍ର ବିଲ୍ ମାଧ୍ୟମରେ କ୍ଷମତା ହାତେଇବାକୁ ଚାହୁଁଛି ବୋଲି ଭର୍ତ୍ତୃହରି କହିଥିଲେ। ଉପା ସରକାର ବେଳେ ଏହି ବିଲ୍ ଆଗତ ହୋଇଥିଲା ଏବଂ ନଦୀବନ୍ଧର ବିଫଳତାରୁ ହେଉଥିବା ବିପର୍ଯ୍ୟୟ ପାଇଁ ବିପନ୍ନ ଲୋକଙ୍କୁ କ୍ଷତିପୂରଣ ଯୋଗାଇଦେବାକୁ ଷ୍ଟାଣ୍ଡିଂ କମିଟି ସୁପାରିସ କରିଥିଲେ। ବର୍ତ୍ତମାନର ବିଲ୍ରେ କ୍ଷତିପୂରଣ ବ୍ୟବସ୍ଥା ନ ଥିବା ବିଜେଡି ଏମ୍ପି କହିଥିଲେ।
