ଗୁଡ଼ଭେଲିପଦର, ୧୧।୧ (ଡି.ଏନ.ଏ)-
ରାଏଜର ଭିନେ ଭିନେ ଜିଲାରେ ଅନେକ ଅଙ୍ଗନଓ୍ବାଡି ଘର ଦଦ୍ରା ହେଇ ବିପଦ୍ ଅବସ୍ତାରେ ଥିବାର ରାଏଜ୍ ସରକାରକଁର ନଜରକେ ଆସିଥିଲା। ସେ ଘରଯାକ ଭାଂଗି ତାର ଜାଗାରେ ନୂତନ କୁଠା ତିଆରବାକେ ରାଏଜ୍ ସରକାର ଅନୁଦାନ ଯୁଗେଇ ଦେଇଥିଲେ। ସେ ହିସାବେ କଣ୍ଟାମାଳ ବ୍ଲକ ଗୁଡ଼ଭେଲିପଦର ଗଁାର ଅଙ୍ଗନଓ୍ବାଡି ୨ରେ ଥିବାର ଆଜ୍ବେଷ୍ଟସ୍ ଘର ଭାଂଗି ସେଠାନେ ନୂତନ କୁଠା ତିଆରି କାମ୍ ଆରମ୍ ହେଇଥିଲା। ହେଲେ ଦୁଖର କଥା ଇ କୁଠା ତିଆରି ମୂଲ ହେବାର ଆଏଜ୍କେ ୨ ବଛର ବିତିଯାଇଥିଲେ ବି ଦରଖଁଡ଼ିଆ ହେଇ ପଡ଼ିରହିଛେ। ଏନ୍ତାଥି ଇ କେନ୍ଦ୍ର ଅଧୀନରେ ଥିବାର ଛାତ୍ରୀଛାତ୍ର ଥାନୀଅ ପ୍ରାଥମିକ ସ୍କୁଲର ଗୁଟେ କୁଠିଥି ବସି ପାଠ୍ପଢ଼ୁଛନ୍। ଇତାକେ ନେଇ ଗଁାବାସୀ ଆର ଅଭିଭାବକମାନକର ଭିତରେ ଅସନ୍ତୋଷ ଭାବ୍ ଦେଖ୍ବାକେ ମିଲିଛେ। ଗଁାବାସୀ ଅଙ୍ଗନଓ୍ବାଡି କୁଠା ତିଆରି କାମ୍ ଯେତେ ଜଲ୍ଦି ହେବା ସାରବାକେ ଦାବି କରିଛନ୍। ନାଇଁହେଲେ ଆଏବାର ଦିନେ ଗଁାବାସୀ ଆଂଦୋଲନକେ ଉତିରମୁ ବଲି ଚେତାବନୀ ଦେଇଛନ୍। ଇ ବାବ୍ଦେ ଗୁଡ଼ଭେଲିପଦର ଗଁାର ଓ୍ବାର୍ଡ ମେମର ବିଷ୍ଣୁ ମହଲାକୁଁ ପଚ୍ରାଲାରୁ ଇ ଅଙ୍ଗନଓ୍ବାଡି କୁଠା ତିଆରି କାମ୍ ସାରବାକେ ବିଭାଗୀୟ କନିଷ୍ଠ ଯନ୍ତ୍ରୀ ଆର ବିଡିଓକୁଁ ଅଭିଯୋଗ କରିଛୁଁ। ସେମାନେ ବି କାମ୍ ଜଲ୍ଦି ସାରବାକେ କଥା ଦେଇଛନ୍ ବଲି ସେ କହିଥିଲେ। ସେନ୍ତା ଇ ବାବ୍ଦେ କନିଷ୍ଠ ଯନ୍ତ୍ରୀ ସେଠୀ ବାବୁକୁଁ ପଚ୍ରାଲାରୁ ମୁଇଁ ଠିକାଦରକେ କହିଛେଁ, ସେ ଯେତେ ଜଲ୍ଦି ହେବା ତିଆରି କାମ୍ ସାରବେ ବଲି ସେ କହିଥିଲେ।
