ଗଞ୍ଜାମ,୧୮।୨(ଡି.ଏନ୍.ଏ.): ଗଞ୍ଜାମ ଜିଲା ହୁମା ବୀରଭଦ୍ର ହାଇସ୍କୁଲ ଦଶମ ଶ୍ରେଣୀ ଛାତ୍ରୀ ଡି. ଲିଲି ରେଡ୍ଡୀ ଚଳିତ ବର୍ଷ ମାଟ୍ରିକ୍ ପରୀକ୍ଷା ପାଇଁ ଫର୍ମ ଫିଲଅପ କରିଥିଲେ ମଧ୍ୟ ଆଡ୍ମିଟ୍ କାର୍ଡ ପାଇ ନ ଥିଲେ । ଉକ୍ତ ସ୍କୁଲ ପ୍ରଧାନ ଶିକ୍ଷକ ଦାୟିତ୍ୱରେ ଥିବା ବିଜ୍ଞାନ ଶିକ୍ଷକଙ୍କ ଅବହେଳା ଯୋଗୁ ଆଡ୍ମିଟ୍ କାର୍ଡ ଆସି ନ ଥିବା ନେଇ ଛାତ୍ରୀଙ୍କ ବାପା ଡି. ଭାସ୍କର ରେଡ୍ଡୀ ଧରିତ୍ରୀ ଖବରଦାତାଙ୍କୁ ଜଣାଇଥିଲେ । ଏ ନେଇ ଗତ ୧୩ ତାରିଖରେ ଦୈନିକ ଖବର କାଗଜ ‘ଧରିତ୍ରୀ’ରେ ପ୍ରଥମେ ପ୍ରକାଶିତ ହୋଇଥିଲା। ଖବର ପ୍ରକାଶିତ ହେବା ପରେ ପ୍ରଶାସନ ପକ୍ଷରୁ ତତ୍ପରତା ଦେଖାଯାଇଥିଲ। ପରେ ଭାସ୍କର ଗଞ୍ଜାମ ବିଇଓ, ଏବିଇଓ, ଗଞ୍ଜାମ ଜିଲାପାଳ ବିଜୟ ଅମୃତା କୁଲାଙ୍ଗେ, ଜିଲା ଶିକ୍ଷାଧିକାରୀ ଅମୂଲ୍ୟ କୁମାର ପ୍ରଧାନଙ୍କୁ ଲିଖିତ ଅଭିଯୋଗ କରିଥିଲେ । ଏଥିସହିତ ସ୍ଥାନୀୟ ବିଧାୟକ ସୁବାସ ଚନ୍ଦ୍ର ବେହେରାଙ୍କୁ ମଧ୍ୟ ଅବଗତ କରାଇଥିଲେ। ପରେ ସ୍କୁଲ ବିଜ୍ଞାନ ଶିକ୍ଷକ ସୁନୀଲ କୁମାର ବେହେରା ଏ ନେଇ କଟକ ବୋର୍ଡ ମାଧ୍ୟମିକ ପରିଷଦ କାର୍ଯ୍ୟାଳୟ ଯାଇଥିଲେ। ମଙ୍ଗଳବାର ଲିଲିଙ୍କୁ ପରୀକ୍ଷା ଦେବାପାଇଁ ଆଡ୍ମିଟ୍ କାର୍ଡ ସ୍କୁଲ କର୍ତ୍ତୃପକ୍ଷ ପ୍ରଦାନ କରିଥିବା ଲିଲିଙ୍କ ବାପା ଭାସ୍କର ସୂଚନା ଦେଇଛନ୍ତି । ଆଡ୍ମିଟ୍ କାର୍ଡ ମିଳିବା ପରେ ଲିଲି ଓ ତାଙ୍କ ପରିବାର ଖୁସି ଥିବା ବେଳେ ଏ ନେଇ ଲିଲି ଧରିତ୍ରୀ ଏବଂ ଜିଲା ପ୍ରଶାସନକୁ ଧନ୍ୟବାଦ ଜଣାଇଛନ୍ତି।
