ଜୋହାନ୍ସବର୍ଗ,୨୫।୫(ପି.ଟି.): ଦକ୍ଷିଣ ଆଫ୍ରିକା ଟେଷ୍ଟ ଅଧିନାୟକ ହେବାକୁ ଓପନର ଡିନ୍ ଏଲ୍ଗାର ଇଚ୍ଛା ଜାହିର କରିଛନ୍ତି। ସ୍ବତଃପ୍ରବୃତ୍ତ ଭାବେ ମୋ ପାଖରେ ନେତୃତ୍ୱ ନେବାର କଳା ରହିଛି। ଯଦି ନେତୃତ୍ୱ ପ୍ରଦାନ କରାଯାଏ ତାହାଲେ କଠିନ ପରିଶ୍ରମ କରିବି ଓ ସଫଳ ହେବି ବୋଲି ସେ ଆଶାପ୍ରକାଶ କରିଛନ୍ତି।
ଗତ ଫେବୃୟାରୀରେ ଟେଷ୍ଟ ଅଧିନାୟକ ପଦରୁ ଫାଫ୍ ଡୁପ୍ଲେସି ଇସ୍ତଫା ଦେଇଥିଲେ। ଉଇକେଟକିପର ବ୍ୟାଟ୍ସମ୍ୟାନ କ୍ୱିଣ୍ଟନ ଡିକକ୍ ତାଙ୍କ ଉତ୍ତରାଧିକାରୀ ହେବେ ବୋଲି ଆଶା କରାଯାଉଥିଲା। ତେବେ କ୍ରିକେଟ ସାଉଥ୍ ଆଫ୍ରିକା (ସିଏସ୍ଏ) ଏହାକୁ ଖଣ୍ଡନ କରିଛି। ଡିକକ୍ଙ୍କ ଉପରେ କାର୍ଯ୍ୟଭାର ବଢ଼ାଇବାକୁ ଆମେ ଚାହୁଁନୁ ବୋଲି ସିଏସ୍ଏ କହିଛି। ଜୁଲାଇରେ ଦକ୍ଷିଣ ଆଫ୍ରିକା ଓ୍ବେଷ୍ଟଇଣ୍ଡିଜ ବିପକ୍ଷରେ ଏକ ୩ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ ଖେଳିବ। ଦକ୍ଷିଣ ଆଫ୍ରିକା ଏପର୍ଯ୍ୟନ୍ତ େଷ୍ଟେ ଅଧିନାୟକ ନେଇ କୌଣସି ଅନ୍ତିମ ନିଷ୍ପତ୍ତି ନେଇନାହିଁ।
ଟେଷ୍ଟରେ ନେତୃତ୍ୱ ନେବା ନିଶ୍ଚିତ ଭାବେ ଏକ ବଡ଼ ଚ୍ୟାଲେଞ୍ଜ୍। କିନ୍ତୁ ଏଥିରେ ସଫଳ ହେବି ବୋଲି ଏଲ୍ଗାର କହିଛନ୍ତି। ପୂର୍ବରୁ ସ୍କୁଲ ଓ ଫ୍ରାଞ୍ଚାଇଜ୍ ସ୍ତରରେ ବିଭିନ୍ନ ଦଳର ନେତୃତ୍ୱ ନେଇଛି। ଯଦି ପ୍ରସ୍ତାବ ଦିଆଯାଏ ତା’ହେଲେ ନେତୃତ୍ୱ ନେବାକୁ ପଛାଇବି ନାହିଁ ବୋଲି ସେ ସ୍ପଷ୍ଟ କରିଛନ୍ତି। ଶ୍ରୀଲଙ୍କାରେ ଅନୁଷ୍ଠିତ ୨୦୦୬ ୧୯ ବର୍ଷରୁ କମ୍ ବିଶ୍ୱକପରେ ବାମହାତୀ ବ୍ୟାଟ୍ସ୍ୟାନ ଏଲ୍ଗାର ନେତୃତ୍ୱ ନେଇଥିଲେ। ୨୦୧୭ରେ ଡୁପ୍ଲେସି ଦଳରେ ସାମିଲ ନ ହେବା କାରଣରୁ ସେ ଇଂଲଣ୍ଡ ବିପକ୍ଷ ପ୍ରଥମ ଟେଷ୍ଟରେ ନେତୃତ୍ୱ ନେଇଥିଲେ। ସେ ମଧ୍ୟ ଗତ ଜାନୁୟାରୀରେ ଡୁପ୍ଲେସିଙ୍କ ଅନୁପସ୍ଥିତିରେ ପାକିସ୍ତାନ ବିପକ୍ଷ ତୃତୀୟ ଟେଷ୍ଟରେ ନେତୃତ୍ୱ ନେଇଥିଲେ। ପୂର୍ବରୁ ଏଡେନ ମାରକ୍ରାମ ଓ କେଶବ ମହାରାଜ ମଧ୍ୟ ଟେଷ୍ଟରେ ନେତୃତ୍ୱ ନେବାକୁ ଇଚ୍ଛା ଜାହିର କରିଥିଲେ।
