କର୍ଲାମୁଣ୍ଡା,୮।୨(ଡି.ଏନ୍.ଏ.): କଳାହାଣ୍ଡି ଜିଲା କର୍ଲାମୁଣ୍ଡା ବ୍ଲକ ଗଜବାହାଲସ୍ଥିତ ପୁରୁଷୋତ୍ତମ ସରକାରୀ ଉଚ୍ଚ ବିଦ୍ୟାଳୟରେ ଶିକ୍ଷକତା କରୁଥିବା ଜଣେ ନକଲି ଶିକ୍ଷକଙ୍କୁ ଗିରଫ କରାଯାଇଛି। ଜାଲ ପ୍ରମାଣପତ୍ର ଦେଇ ଚାକିରି କରିଥିବା ଅଭିଯୋଗରେ ତାଙ୍କୁ ଗିରଫ କରାଯାଇଛି। ଏହି ଘଟଣା ବ୍ଲକରେ ଚର୍ଚ୍ଚାର ବିଷୟ ହୋଇଛି। ସମ୍ପୃକ୍ତ ଶିକ୍ଷକ ହେଲେ ବଲାଙ୍ଗୀର ଜିଲା ସଇଁନ୍ତଳା ଥାନା ଅନ୍ତର୍ଗତ ଧୂମାପାଲି ଗାରଁ ରୋହିତ ନାଗ (୩୦)।
ସୂଚନାଯୋଗ୍ୟ, ଗତ କିଛିଦିନ ତଳେ ରୋହିତଙ୍କ ବିରୋଧରେ ଜାଲ ମାର୍କଶିଟ ଓ ପ୍ରମାଣପତ୍ର ଦେଇ ଚାକିରି କରୁଥିବା ଅଭିଯୋଗ ଆସିଥିଲ। କର୍ଲାମୁଣ୍ଡା ଶିକ୍ଷାଧିକାରୀ ଆଲୁମାଲୁ ଭୀମରାଜ ଗଜବାହାଲ ହାଇସ୍କୁଲକୁ ଯାଇ ଏହାର ତଦନ୍ତ କରିବା ସହ ସଂପୃକ୍ତ ଶିକ୍ଷକଙ୍କୁ ବ୍ଲକ ଶିକ୍ଷାଧିକାରୀଙ୍କ ଅଫିସକୁ ଡାକି ପଚରାଉଚରା କରିଥିଲେ। ସେତେବେଳେ ଶିକ୍ଷକ ଜଣକ ଦାଖଲ କରିଥିବା ପ୍ରମାଣପତ୍ର ଅସଲି ବୋଲି ଦାବି କରିବା ସହ ଏହାର ପ୍ରମାଣ ଦେବେ ବୋଲି କହିଥିଲେ। ତେବେ ପରବର୍ତ୍ତୀ ସମୟରେ ଜିଲା ଶିକ୍ଷାଧିକାରୀ ତଦନ୍ତ ରିପୋର୍ଟ ପାଇ ସମ୍ପୃକ୍ତ ଶିକ୍ଷକଙ୍କ ବିରୋଧରେ ଭବାନୀପାଟଣା ଟାଉନ ଥାନାରେ ଏତଲା ଦେଇଥିଲେ। ପୋଲିସ ସମ୍ପୃକ୍ତ ଶିକ୍ଷକଙ୍କୁ ଗିରଫ କରି କୋର୍ଟଚାଲାଣ କରିଥିବା ବେଳେ ଜାମିନ ନାମଞ୍ଜୁର ହେବାରୁ ଜିଲା କାରାଗାରକୁ ପଠାଇ ଦିଆଯାଇଛି।
