ଚାକିରି କରାଇଦେବା ନାଁରେ ଠକେଇ: ଅଭିଯୁକ୍ତ ଯୁବକ ଗିରଫ
8:02 pmDecember 30, 2019 / 05

ବସ୍ତା, ୩୦।୧୨(ସ୍ବ.ପ୍ର.)-ଫକୀରମୋହନ ମେଡ଼ିକାଲ କଲେଜ ଓ ହସ୍‌ପିଟାଲରେ ଚାକିରି କରାଇଦେବାକୁ କହି ଟଙ୍କା ଠକି ନେଇ ପଳାଉଥିବା ଜଣେ ଯୁବକ ଲୋକଙ୍କ ଦ୍ୱାରା ଧରାପଡ଼ି ଗିରଫ ହୋଇଛନ୍ତି। ଏନେଇ ପୋଲିସ ଏକ ମାମଲା (ନଂ. ୪୪୯/୧୯) ରୁଜୁ କରି ଅଭିଯୁକ୍ତଙ୍କୁ ଗିରଫ କରି ସୋମବାର କୋର୍ଟଚାଲାଣ କରିଛି।
ପ୍ରକାଶ ଯେ, ବସ୍ତା ଥାନା ମୁଣ୍ଡିମାରି ଗ୍ରାମ ନିବାସୀ ପର୍ଶୁରାମ ବେହେରାଙ୍କ ପୁଅ ହିମାଂଶୁଙ୍କୁ ଚାକିରି କରାଇଦେବାକୁ କହି ଖନ୍ତାପଡ଼ା ଥାନା ବାଉଶଁମୁହାଁ ଗ୍ରାମର ମହେଶ୍ୱର ବାରିକଙ୍କ ପୁଅ କାଶୀନାଥ ୨୦ ହଜାର ଟଙ୍କା ଅଗ୍ରିମ ନେଇଥିଲେ। ୪୦ହଜାରରୁ ଅବଶିଷ୍ଟ ୨୦ହଜାର ଟଙ୍କା ନିଯୁକ୍ତିପତ୍ର ପ୍ରଦାନ ବେଳେ ନେବେ ବୋଲି କହିଥିଲେ। ତଦନୁଯାୟୀ ଅଭିଯୁକ୍ତ କାଶୀନାଥ ନିଯୁକ୍ତିପତ୍ର ଦେଇ ଆସନ୍ତା ୨୦୨୦ ଜାନୁୟାରୀ ୨ରେ ଚାକିରିରେ ଯୋଗଦେବାକୁ ହିମାଂଶୁଙ୍କୁ କହିଥିଲେ। ମାତ୍ର ନିଯୁକ୍ତିପତ୍ର ନେଇ ସନ୍ଦେହ ପ୍ରକାଶ ପାଇବାରୁ ହିମାଂଶୁ ତାଙ୍କର ସାଙ୍ଗମାନଙ୍କ ସହ ମିଶି ଖୋଳତାଡ କରିବା ପରେ ନିଯୁକ୍ତି ପତ୍ର ସମ୍ପୂର୍ଣ୍ଣ ଜାଲ ବୋଲି ଜଣାପଡ଼ିଥିଲା। ରବିବାର ସନ୍ଧ୍ୟାରେ ଅଭିଯୁକ୍ତ କାଶୀନାଥ ହିମାଂଶୁଙ୍କଠାରୁ ୨୦ହଜାର ଟଙ୍କା ନେବା ବେଳେ ତାଙ୍କୁ ଅଟକ ରଖାଯାଇଥିଲା। ଏହା ପରେ ତାଙ୍କୁ ଅମର୍ଦ୍ଦା ରୋଡ଼ ଫାଣ୍ଡି ଅଧିକାରୀ ରସାନନ୍ଦ ବେହେରାଙ୍କୁ ହସ୍ତାନ୍ତର କରାଯାଇଥିଲା।