ଖରାଦିନେ ଗରମରୁ ମୁକ୍ତି ପାଇଁ ଅଧିକାଂଶ ଏସି ବ୍ୟବହାର କରନ୍ତି। କିନ୍ତୁ ଅଧିକ ବିଜୁଳି ଖର୍ଚ୍ଚ ହେଉଥିବାରୁ ବିଲ୍ ପାଇଁ ସମସ୍ତଙ୍କର ଚିନ୍ତା ରହିଥାଏ। ତେଣୁ କିପରି ବ୍ୟବହାର କଲେ ଶକ୍ତି ସଂରକ୍ଷଣ କରିହେବ ଜାଣିରଖନ୍ତୁ…
ଆଜିକାଲି ପ୍ରାୟ ସବୁ ପ୍ରକାର ଏସିରେ ବିଭିନ୍ନ ମୋଡ୍ ରହିଛି। ତେଣୁ ଖରାଦିନେ ଏସି କୁଲିଂ ମୋଡ୍ରେ ଅଛି କି ନାହିଁ ନିଶ୍ଚିତ କରନ୍ତୁ। କୁଲିଂ ମୋଡ୍ରେ ରହିଲେ ହିଁ ଥଣ୍ଡା ପବନ ରହିବ।
ବାରମ୍ବାର ଏସିର ତାପମାତ୍ରାକୁ କମ୍ କିମ୍ବା ବେଶି କରନ୍ତୁ ନାହିଁ। ବରଂ ଏକ ନିର୍ଦ୍ଦିଷ୍ଟ ତାପମାତ୍ରା ସେଟ୍ କରି ଦିଅନ୍ତୁ। ଏପରି କରିବା ଫଳରେ ଘର ଭିତର ଥଣ୍ଡା ରହିବ ଓ ଇଲେକ୍ଟ୍ରି ବିଲ୍ ମଧ୍ୟ କମ୍ ରହିବ।
ଏସି ଚଲାଇବା ପୂର୍ବରୁ ପ୍ରଥମେ ଘରର ଝରକା ଓ କବାଟ ସବୁ ଭଲଭାବେ ବନ୍ଦ କରନ୍ତୁ। ନଚେତ୍ ଘର ଭିତରର ଥଣ୍ଡା ପବନ ବାହାରକୁ ବାହାରିଯିବ ଓ ଘରର ତାପମାତ୍ରା ଥଣ୍ଡା ହେବ ନାହିଁ। ଏହାଫଳରେ ଏସିର ଲୋଡ୍ ବଢ଼ିଯିବ ଏବଂ ଅଧିକ ବିଜୁଳି ଖର୍ଚ୍ଚ ହେବ।
ଏସିକୁ ନିର୍ଦ୍ଦିଷ୍ଟ ସମୟ ବ୍ୟବଧାନରେ ସଫାକରନ୍ତୁ। କାରଣ ଲଗାତର ଏସି ବ୍ୟବହାର ଫଳରେ ପବନରେ ଥିବା ଧୂଳିକଣା ସବୁ ଏସି ଭିତରେ ଜମାହୋଇ ରହିଯାଏ। ଏହା ଫଳରେ ଏସିରୁ ଠିକ୍ ଭାବେ ଥଣ୍ଡା ପବନ ବାହାରି ନ ଥାଏ। ଏହା ବ୍ୟତୀତ ଏସିର ଫିଲ୍ଟରକୁ ମଧ୍ୟ ଠିକ୍ ସମୟରେ ବଦଳାଇବା ଜରୁରୀ।
