ଅମରପାଲି, ୮ା୬(ଡି.ଏନ.ଏ.): ସୁବର୍ଣ୍ଣପୁର ଜିଲା ସୁବଳୟା ଥାନାର ଏଏସଆଇ ଗୌରହରି ମେହେରଙ୍କୁ ତିଲେଇମାଲ ଗ୍ରାମର କେତେଜଣ ବ୍ୟକ୍ତି ଆକ୍ରମଣ କରିବା ସହିତ ମାଡ ମାରିଛନ୍ତି। ତେବେ ଗ୍ରାମବାସୀଙ୍କ ଅଭିଯୋଗ ଅନୁଯାୟୀ, ସାଧା ପୋଷାକରେ ତଦନ୍ତ ପାଇଁ ଆସିଥିବା ଏଏସଆଇଙ୍କ ତଦନ୍ତ ନିରପେକ୍ଷ ନ ଥିଲା। ଅପରପକ୍ଷେ ତଦନ୍ତ ବେଳେ ଲୋକେ ଆକ୍ରମଣ କରିଥିବା ପୋଲିସ ଅଭିଯୋଗ କରିଛି ା ପୋଲିସ ଏନେଇ ୭ଜଣ ବ୍ୟକ୍ତିଙ୍କ ସମେତ ଅନ୍ୟ କେତେଜଣ ଗ୍ରାମବାସୀଙ୍କ ନାମରେ ମାମଲା ରୁଜୁ କରିଛି। ପୋଲିସକୁ ଆକ୍ରମଣ କରିବା ଘଟଣାକୁ ନେଇ ପୋଲିସ ତିଲେଇମାଲ ଗ୍ରାମକୁ ଯାଇ ତଦନ୍ତ କରିଛି। ମାତ୍ର ଗ୍ରାମ ପୁରୁଷଶୂନ୍ୟ ହୋଇଯାଇଛି। ଗିରଫ ଭୟରେ ଅଭିଯୁକ୍ତମାନେ ଫେରାର ହୋଇ ଯାଇଛନ୍ତି।
ମିଳିଥିବା ସୂଚନା ଅନୁଯାୟୀ, ଗଛ କଟାକୁ ନେଇ ସୁବଳୟା ଥାନା ଅନ୍ତର୍ଗତ ତିଲେଇମାଲ ଗ୍ରାମର ଦୁଇ ଭାଇ ରତ୍ନମଣି ପଧାନ ଓ ସୁବାସ ପଧାନଙ୍କ ମଧ୍ୟରେ ରବିବାର ଗଣ୍ଡଗୋଳ ହୋଇଥିଲା। ଏନେଇ ରନ୍ତମଣି ସେହିଦିନ ସନ୍ଧ୍ୟାରେ ପ୍ରଥମେ ସୁବଳୟା ଥାନାକୁ ଯାଇ ଅଭିଯୋଗ କରିଥିଲେ। ମାତ୍ର ତାଙ୍କ ଅଭିଯୋଗକୁ ପୋଲିସ ଗ୍ରହଣ କରି ନ ଥିବା ସେ ପ୍ରକାଶ କରିଛନ୍ତି। ପରେ ସୁବାସ ମଧ୍ୟ ସୁବଳୟା ଥାନାରେ ଉକ୍ତ ଗଣ୍ଡଗୋଳକୁ ନେଇ ଅଭିଯୋଗ କରିଥିଲେ। ସୁବାସଙ୍କ ଅଭିଯୋଗ ମତେ କେସ ନଂ ୮୦/୨୩ରେ ଏକ ମାମଲା ରୁଜୁ କରିଥିଲା ପୋଲିସ। ପରେ ପୁଣିଥରେ ସୋମବାର ରତ୍ନମଣି ଥାନାକୁ ଯାଇ ଅଭିଯୋଗ କରିଥିଲେ। ତାଙ୍କ ଅଭିଯୋଗ ଆଧାରରେ କେସ ନଂ ୮୧/୨୩ରେ ମାମଲା ରୁଜୁ କରିଥିବା ପୋଲିସ କହିଛି। ମାତ୍ର ଏନେଇ ରତ୍ନମଣିଙ୍କୁ ସୂଚନା ଦିଆଯାଇ ନ ଥିବା ସେ ଅଭିଯୋଗ କରିଛନ୍ତି। ତେବେ ପୋଲିସ ଏଏସଆଇ ଗୌରହରି ମେହେର ଓ ଗ୍ରାମରକ୍ଷୀ ରବୀଚନ୍ଦ୍ର ବିଭାର ତିଲେଇମାଲ ଯାଇ ତଦନ୍ତ କରିଥିଲେ।
ରତ୍ନମଣି ଗୋଟିଏ ଶାଗୁଆନ ଗଛ କାଟି ତାର ଗଣ୍ଡିକୁ ରଖିଥିଲେ। ତାଙ୍କ ଭାଇ ସୁବାସ ଉକ୍ତ କାଠ ଗଣ୍ଡିକୁ ନେଇ ଯାଇଥିଲେ। ତେଣୁ ରତ୍ନମଣି ଏହାକୁ ନେଇ ଅଭିଯୋଗ କରିଥିଲେ। ପୋଲିସ ଗ୍ରାମକୁ ଯାଇ ଉକ୍ତ କାଠଗଣ୍ଡି ଜବତ କରି ସେମାନଙ୍କ ବାପାଙ୍କ ଜିମା ଦେଇଥିଲେ। ଯେହେତୁ ସୁବାସଙ୍କ ପାଖରେ ତାଙ୍କ ବାପା ରହୁଛନ୍ତି, ତେଣୁ ତାଙ୍କୁ କାଠଗଣ୍ଡି ଦେବାରୁ ଗ୍ରାମବାସୀ ତଦନ୍ତ ନିରପେକ୍ଷ ହେଉ ନ ଥିବା ଅଭିଯୋଗ କରିଥିଲେ। ଏହାକୁ ନେଇ ପୋଲିସ ଓ ଗ୍ରାମବାସୀଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା। ଲୋକେ ଉତ୍ତ୍ୟକ୍ତ ହୋଇ ପୋଲିସ ଏଏସଆଇଙ୍କୁ ଗୋଡାଇ ଗୋଡାଇ ମାଡ ମାରିଥିଲେ। ଏ ସମ୍ପର୍କରେ ଖବରପାଇ ଭାରପ୍ରାପ୍ତ ଥାନା ଅଧିକାରୀ ଦିପ୍ତିରଞ୍ଜନ ଦିଗାଲ ପୋଲିସ ଫୋର୍ସ ଧରି ଘଟଣାସ୍ଥଳରେ ପହଞ୍ଚତ୍ ଏଏସଆଇ ମେହେରଙ୍କୁ ଉଦ୍ଧାର କରିଥିଲେ ା ଅପରପକ୍ଷରେ ରତ୍ନମଣିଙ୍କ ସ୍ତ୍ରୀ ସୁବଳୟା ଥାନା ଅଧିକାରୀ ଦିଗାଲଙ୍କ ନାମରେ ଦୁର୍ବ୍ୟବହାର କରିଥିବା ନେଇ ବୀରମହାରାଜପୁର ଏସଡିପିଓ ଏବଂ ସୁବର୍ଣ୍ଣପୁର ଆରକ୍ଷୀ ଅଧୀକ୍ଷକଙ୍କ ଠାରେ ଅଭିଯୋଗ କରିଛନ୍ତି। ଏନେଇ ବୀରମହାରାଜପୁର ଏସଡିପିଓ ଡୋଳାମଣି ଭୋଇଙ୍କୁ ପଚାରିବାରୁ ତଦନ୍ତ ଚାଲିଛି ା ଖୁବ ଶୀଘ୍ର ଅଭିଯୁକ୍ତଙ୍କୁ ଗିରଫ କରାଯିବ ବୋଲି ସେ ପ୍ରକାଶ କରିଛନ୍ତି।
