କୋଣାର୍କ,୮ା୬(ଡି.ଏନ୍.ଏ.): କରୋନା ଯୋଗୁ ବନ୍ଦ ରହିଛି ବିଶ୍ୱ ଐତିହ୍ୟ ସୂର୍ଯ୍ୟମନ୍ଦିର। ପର୍ଯ୍ୟଟନସ୍ଥଳୀ କୋଣାର୍କ ଶୂନଶାନ। ବନ୍ଦ ହେବାର ଅଢ଼େଇ ମାସ ପରେ ସୋମବାର କୋଣାର୍କରେ ଯାତ୍ରୀନିବାସ ଓ କେତେକ ହୋଟେଲ ଖୋଲାଯାଇଥିବା ଦେଖିବାକୁ ମିଳିଛି। କିନ୍ତୁ ପର୍ଯ୍ୟଟକ ନ ଥିବାରୁ ବେପାର ହୋଇ ନାହଁି। ସମସ୍ତ କର୍ମଚାରୀ ଓ ୩୦ଭାଗ ରୁମକୁ ନେଇ ଯାତ୍ରୀନିବାସ କାର୍ଯ୍ୟକ୍ଷମ ହୋଇଛି। ରେଷ୍ଟୁରାଣ୍ଟରୁ କେବଳ ଖାଦ୍ୟ ପାର୍ସଲ ଦିଆଯିବ। ଗାଇଡଲାଇନ ଅନୁଯାୟୀ ରୁମ ବୁକ ଓ ରେଷ୍ଟୁରାଣ୍ଟ ଚାଲିବ ବୋଲି ପର୍ଯ୍ୟଟନ ଅଧିକାରୀ ସରୋଜକାନ୍ତ ପ୍ରଧାନ ପ୍ରକାଶ କରିଛନ୍ତି। ସୂଚନା ଥାଉକି ମାର୍ଚ୍ଚ ୧୬ରୁ ସୂର୍ଯ୍ୟମନ୍ଦିର ବନ୍ଦ ରହିଛି। ସୂର୍ଯ୍ୟମନ୍ଦିର ବନ୍ଦ ହେବାରୁ ଏହା ଉପରେ ନିର୍ଭର କରି ଚଳୁଥିବା ଫଟୋଗ୍ରାଫର, ଗାଇଡ, ହୋଟେଲ, ଲଜ, ହସ୍ତଶିଳ୍ପ ଓ ଅନ୍ୟ ବ୍ୟବସାୟୀ ହାତବାନ୍ଧି ବସି ରହିଛନ୍ତି। ଅଢ଼େଇ ମାସ ହେବ ହୋଟେଲ ବ୍ୟବସାୟୀମାନେ ଅସହାୟ ହୋଇପଡିଛନ୍ତି। ଘରେ ବସି ରହିବାରୁ ପରିବାର ପ୍ରତିପୋଷଣ କରିବା କଷ୍ଟକର ହୋଇପଡିଥିବା କେତେଜଣ ବ୍ୟବସାୟୀ କହିଛନ୍ତି।
