ଭୁବନେଶ୍ୱର, ୮।୬(ବ୍ୟୁରୋ) – ରାଜ୍ୟରେ ସୋମବାର ବିଭିନ୍ନ ସ୍ଥାନରେ କାଳବୈଶାଖୀ ସହ ବର୍ଷା ହୋଇଛି। ଏହି ସମୟରେ ବଜ୍ରପାତ ଘଟି ୧୦ ଜଣଙ୍କ ଜୀବନ ଯାଇଛି। ନବରଙ୍ଗପୁର ଜିଲା ପାପଡ଼ାହାଣ୍ଡି ବ୍ଲକରେ ଜଣେ ନାବାଳକ, କେନ୍ଦୁଝର ଆନନ୍ଦପୁର ଅଞ୍ଚଳରେ ଜଣେ ଯୁବକ, କେନ୍ଦ୍ରାପଡ଼ାର ମହାକାଳପଡ଼ା, ଜଗତ୍ସିଂହପୁର ବାଲିକୁଦା ବ୍ଲକରେ ଜଣେ ଲେଖାଏ ପ୍ରାଣ ହରାଇଛନ୍ତି। ସେହିଭଳି ଢେଙ୍କାନାଳରେ ୨ଜଣ ମହିଳାଙ୍କ ମୃତ୍ୟୁ ଘଟିଥିବାବେଳେ ଅନୁଗୋଳରେ ଜଣେ ମହିଳା, ଗଞ୍ଜାମର କବିସୂର୍ଯ୍ୟନଗରରେ ଜଣେ, ଗଜପତି ମୋହନରେ ଜଣେ ଓ କଟକ ଚୌଦ୍ୱାରରେ ଜଣଙ୍କର ମୃତ୍ୟୁ ହୋଇଛି। ତେବେ ଏମାନଙ୍କ ମଧ୍ୟରୁ ୩ଜଣ ଚାଷୀ ଥିବା ଜଣାପଡ଼ିଛି। ଅନ୍ୟ ୭ଜଣ ଆହତ ହୋଇଛନ୍ତି।
ମିଳିଥିବା ସୂଚନାନୁସାରେ, ନବରଙ୍ଗପୁର ଜିଲା ପାପଡାହାଣ୍ଡି ବ୍ଲକ ସୁନାଡଙ୍ଗରି ଗ୍ରାମର ନରସିଂହ ମାଝି (୧୩) ଘରକୁ ଫେରୁଥିଲେ। ମାଝିଗୁଡ଼ା ମୁଖ୍ୟ ରାସ୍ତାରେ ତାଙ୍କ ଉପରେ ବଜ୍ରପାତ ହୋଇଥିଲା। ଫଳରେ ତାଙ୍କର ଘଟଣାସ୍ଥଳରେ ହିଁ ମୃତ୍ୟୁ ଘଟିଥିଲା। କେନ୍ଦୁଝର ଜିଲା ଆନନ୍ଦପୁର ଥାନା ଅନ୍ତର୍ଗତ ତରତରା ପଞ୍ଚାୟତ ଦୁଡୁଗାଁ ଗ୍ରାମର ଦିଲୀପ ଚକ୍ର ନାମକ ଜଣେ ଯୁବକଙ୍କର ବ୍ରଜପାତ୍ରରେ ମୃତ୍ୟୁ ହୋଇଛି। ସେ କାଠକଟା ଅଞ୍ଚଳ ବୁଲିବାକୁ ଯାଇଥିବାବେଳେ କାଳବୈଶାଖୀ ପ୍ରଭାବରେ ବର୍ଷା ହେବାରୁ ନିକଟରେ ଥିବା ଏକ ଗଛ ମୂଳରେ ଠିଆ ହୋଇଥିଲେ। ଏହି ସମୟରେ ସେ ବଜ୍ରପାତର ଶିକାର ହୋଇଥିଲେ। ସେହିପରି କାଠକଟା ପଞ୍ଚାୟତ ଯୋଗିଆବନ୍ଧ ଗ୍ରାମର ଚଞ୍ଚଳା ମହାନ୍ତ ଘରେ ଥିବା ସମୟରେ ବଜ୍ରପାତ ହେବାରୁ ସେ ଗୁରୁତର ଆହତ ହୋଇଛନ୍ତି। ତାଙ୍କୁ ଆନନ୍ଦପୁର ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି।
ଢେଙ୍କାନାଳ ସଦର ଥାନା ବାଲିଅମ୍ବା ପଞ୍ଚାୟତ ରାଇଡିହି ଗ୍ରାମର ନିର୍ମଳା ସାହୁ(୫୬) ଘର ନିକଟ ପଡ଼ିଆକୁ ଗାଈ ଆଣିବାକୁ ଯାଇଥିବାବେଳେ ବଜ୍ରପାତ ହେବାରୁ ତାଙ୍କର ମୃତ୍ୟୁ ଘଟିଥିଲା। ସେହିପରି ଢେଙ୍କାନାଳ ସଦର ଥାନା ଭାପୁର ଫାଣ୍ଡି ଅନ୍ତର୍ଗତ ଦଣ୍ଡାରଗଡି ଗାଁର ରଞ୍ଜିତା ପ୍ରଧାନ (୪୦) ନାମକ ଅନ୍ୟଜଣେ ମହିଳାଙ୍କ ବଜ୍ରପାତରେ ମୃତ୍ୟୁ ଘଟିଛି। ଅନୁଗୋଳ ଥାନା କୁମୁରିସିଙ୍ଗା ପଞ୍ଚାୟତ କାବୁଲିପାଳ ଗ୍ରାମର ସୀତା ଭୋଇ (୪୨) ଗାଈ ଚରାଇବାକୁ ଯାଇଥିବାବେଳେ ତାଙ୍କ ଉପରେ ବଜ୍ରପାତ ହେବାରୁ ଘଟଣାସ୍ଥଳରେ ତାଙ୍କର ପ୍ରାଣବାୟୁ ଉଡିଯାଇଥିଲା। ଏଥିସହ ଢେଙ୍କାନାଳ ଓ ଅନୁଗୋଳ ଜିଲାରେ ବଜ୍ରପାତରେ ୫ଜଣ ଗୁରୁତର ହୋଇଥିବା ସୂଚନା ମିଳିଛି।
ଅନ୍ୟପକ୍ଷରେ କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ବାରଡାଙ୍ଗ ପଞ୍ଚାୟତ ମଳାଡିହି ଗ୍ରାମର ସରୋଜ ଜେନା (୩୨) ବିଲରେ ହଳ କରୁଥିବାବେଳେ ବଜ୍ରପାତରେ ମୃତ୍ୟୁ ଘଟିଛି। ଜଗତ୍ସିଂହପୁର ଜିଲା ବୋରିକିନା ପଞ୍ଚାୟତ ଅନ୍ତର୍ଗତ ବରୁଗୁଡିପଡା (ଗୋଡିବେଦୀ) ଗ୍ରାମର ବାଉରିବନ୍ଧୁ ମୁଦୁଲି(୫୦)ଙ୍କ ଉପରେ ବଜ୍ରପାତ ହେବାରୁ ତାଙ୍କର ଜୀବନ ଚାଲିଯାଇଛି। କଟକ ଚୌଦ୍ୱାର ଥାନା ଅନ୍ତର୍ଗତ ସଫା ପଞ୍ଚାୟତ ସୁଆଁରି ଗ୍ରାମର ନିତ୍ୟାନନ୍ଦ ସ୍ବାଇଁ (୨୦)ଙ୍କ ବଜ୍ରପାତରେ ମୃତ୍ୟୁ ଘଟିଥିବାବେଳେ ଏହି ପଞ୍ଚାୟତ ଅନ୍ତର୍ଗତ ଡାହାଣିଗାଡ଼ିଆ ଗ୍ରାମର ଶକୁନ୍ତଳା ମଲ୍ଲିକ(୪୪) ଗୁରୁତର ଆହତ ହୋଇଛନ୍ତି। ସେହିପରି ଗଜପତି ଜିଲା ମୋହନା ବ୍ଲକ ଅନ୍ତର୍ଗତ ବାଘମାରି ଗ୍ରାମ ପଞ୍ଚାୟତର ଅଣ୍ଡିରାଗଡ଼ ଗ୍ରାମର କାର୍ତ୍ତିକ ପାଇକ(୪୫) ଚାଷ କାର୍ଯ୍ୟ କରୁଥିବା ସମୟରେ ବଜ୍ରପାତରେ ମୃତ୍ୟୁ ଘଟିଥିବାବେଳେ ଗଞ୍ଜାମ ଜିଲା କବିସୂର୍ଯ୍ୟନଗର ପାଇକଜମୁନା ଗ୍ରାମର ବଳରାମ ଗୌଡ଼(୧୭) ମଧ୍ୟ ବିଲରେ ଟଳି ପଡିଥିବା ଜଣାପଡିଛି।
