ଭୁବନେଶ୍ୱର,୩୧।୧(ବ୍ୟୁରୋ): ରାଜ୍ୟର ଏକାଧିକ କାରାଗାରରେ ସ୍ବାସ୍ଥ୍ୟସେବା ବିପର୍ଯ୍ୟସ୍ତ ହୋଇପଡିଛି। ସ୍ବୀକୃତିପ୍ରାକ୍ତ ପଦବୀ ଅନୁସାରେ ଆବଶ୍ୟକ ଡାକ୍ତର ନାହାନ୍ତି। ଏପରିକି ଡାକ୍ତର ନିଯୁକ୍ତ ପାଇଁ ଜେଲ ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଉଥିଲେ ମଧ୍ୟ ଗ୍ରାମାଞ୍ଚଳ ଜେଲକୁ ଯିବା ପାଇଁ ଡାକ୍ତର ମଙ୍ଗୁନାହାନ୍ତି। ରାଜ୍ୟରେ ୮୭ ଜେଲ ରହିଛି। ସେଥିରୁ ୧୮ଟି ସର୍କଲ ଜେଲ ରହିଥିବା ବେଳେ ବାକିସବୁ ସବ୍ଜେଲ। ଏହିସବୁ ଜେଲରେ ପ୍ରାୟ ୧୯ହଜାର କଏଦୀ ରହୁଛନ୍ତି।
ପୂର୍ବରୁ ସରକାର ୧୩ ଜିଲାର ୧୩ କାରାଗାର ପାଇଁ ୧୩ ଡାକ୍ତରଙ୍କୁ ନିୟମିତ ଭାବେ ନିଯୁକ୍ତ ଦେଲେ। ପରେ ବିଭିନ୍ନ ଜେଲରେ ମାନସିକ ରୋଗୀ କଏଦୀଙ୍କ ସଂଖ୍ୟା ବଢ଼ିଲା। ସରକାର ସର୍ଭେ କରିବା ପରେ ୪ଟି ଜେଲରେ ସରକାର ୪ଜଣ ମାନସିକ ରୋଗ ଡାକ୍ତରଙ୍କୁ ନିଯୁକ୍ତ ଦେଲେ। ଏହିଭଳି ୧୩ କାରାଗାରରେ ୧୭ ନିୟମିତ ଡାକ୍ତର ନିୟୁକ୍ତି ହେଲେ। ଜେଲ ବଢ଼ିବା ପରେ ସରକାର ଆଉ ନିୟମିତ ଡାକ୍ତର ନିଯୁକ୍ତ କଲେ ନାହିଁ। ଏହାପରେ ସରକାର ଠିକା ଡାକ୍ତରଙ୍କୁ ନିଯୁକ୍ତ ଦେଲେ। ୮୭ ଜେଲ ପାଇଁ ମୋଟ ୭୩ ଡାକ୍ତର ପଦବୀ ରହିଛି। କିନ୍ତୁ ବର୍ତ୍ତମାନ ୮୭ଜେଲରେ ୪୦ ଡାକ୍ତର ଅଛନ୍ତି। ଖାଲି ପଡ଼ିଥିବା ୩୩ ଡାକ୍ତରୀ ପଦବୀ ପୂରଣ ପାଇଁ ନିକଟରେ ଜେଲ ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଥିଲା। କିନ୍ତୁ ବିଭିନ୍ନ ଜିଲାର ସହରାଞ୍ଚଳ ଜେଲର ଡାକ୍ତର ପଦବୀ ପାଇଁ ଏକାଧିକ ପ୍ରାର୍ଥୀ ଆବେଦନ କରିଥିବାବେଳେ ଗ୍ରାମାଞ୍ଚଳ ପଦବୀ ପାଇଁ କେହି ଆବେଦନ କଲେ ନାହିଁ। ଶେଷରେ ୨୦ ଜଣ ଡାକ୍ତରଙ୍କୁ ଚୟନ କରାଯାଇଥିଲା। କିନ୍ତୁ ସେମାନେ ବର୍ତ୍ତମାନ ସୁଦ୍ଧା କାର୍ଯ୍ୟରେ ଯୋଗଦେଇ ନାହାନ୍ତି।
ଜେଲରେ ଆବଶ୍ୟକ ଅନୁସାରେ ଡାକ୍ତର ନ ଥିବାରୁ କଏଦୀଙ୍କ ହଠାତ୍ ଚିକିତ୍ସା ହୋଇପାରୁନାହାନ୍ତି। ଫଳରେ କେତେଜଣ ମୃତ୍ୟୁମୁଖରେ ପଡୁଛନ୍ତି। ଏହାପରେ ଚିକିତ୍ସା ଅବହେଳାକୁ ଭିନ୍ନ ରୂପ ଦିଆଯାଉଛି। ଏନେଇ ଜେଲ ଡିଜି ସନ୍ତୋଷ ଉପାଧ୍ୟାୟ କହିଛନ୍ତି ଯେ, ଖାଲିଥିବା ଡାକ୍ତରୀ ପଦବୀ ଖୁବ୍ଶୀଘ୍ର ପୂରଣ ହେବ। ନିକଟରେ ୨୦ ଜଣ ଡାକ୍ତରଙ୍କୁ ଚୟନ କରାଯାଇଛି। ବାକି ଖାଲି ଥିବା ପଦବୀ ପାଇଁ ପୁଣି ବିଜ୍ଞାପନ ଦିଆଯିବ।
