ଭଦ୍ରକ ଅଫିସ, ୧।୧୨- ଭଦ୍ରକ ଜିଲାରେ ଏଡ୍ସ ନିରାକରଣ ପାଇଁ ଗ୍ରହଣ କରାଯାଉଥିବା କାର୍ଯ୍ୟକ୍ରମ ଠିକ୍ ଭାବେ ରୂପାୟନ ହୋଇପାରୁ ନାହିଁ। ରୋଗୀଙ୍କ ଥଇଥାନ ପାଇଁ ମଧ୍ୟ କୌଣସି ବ୍ୟବସ୍ଥା କରାଯାଉ ନାହିଁ। ପ୍ରଶାସନ ପକ୍ଷରୁ ସଚେତନତା କାର୍ଯ୍ୟକ୍ରମ କାଗଜକଲମରେ ସୀମିତ ରହୁଛି। ସଚେତନତା ଅଭାବରୁ ୨୦୦୩ରେ ଜିଲାରେ ଏଚ୍ଆଇଭି ଆକ୍ରାନ୍ତଙ୍କ ସଂଖ୍ୟା ୨୪ ଥିବାବେଳେ ୨୦୧୯ରେ ଏହି ସଂଖ୍ୟା ୯୭୬ରେ ପହଞ୍ଚିଛି। ଚଳିତବର୍ଷ ନଭେମ୍ବର ସୁଦ୍ଧା ୫୬ ରୋଗୀ ଚିହ୍ନଟ ହୋଇଛନ୍ତି।
ମିଳିଥିବା ତଥ୍ୟ ଅନୁଯାୟୀ, ୨୦୧୪ରେ ୩୩,୯୦୯ ଜଣଙ୍କୁ କାଉନସେଲିଂ କରାଯାଇ ୩୩,୮୧୬ ଜଣଙ୍କ ରକ୍ତ ନମୁନାରୁ ୬୧ ଜଣ ଏଡ୍ସ ଆକ୍ରାନ୍ତ ହୋଇଥିବା ଜଣାପଡ଼ିଥିଲା। ୨୦୧୫ରେ ୫୦, ୨୦୧୬ରେ ୭୨, ୨୦୧୭ରେ ୫୨ ଏବଂ ୨୦୧୮ରେ ୪୮ ଜଣ ଆକ୍ରାନ୍ତଙ୍କୁ ଚିହ୍ନଟ କରାଯାଇଥିଲା। ୨୦୧୯ରେ ୩୯,୭୨୯ଙ୍କୁ କାଉନସେଲିଂ କରାଯାଇ ୩୯,୭୦୧ଙ୍କ ରକ୍ତନମୁନାରୁ ୫୬ ଜଣ ଏଡସ୍ ଆକ୍ରାନ୍ତ ହୋଇଥିବା ଜଣାପଡ଼ିଛି। ୨୦୦୩ରୁ ବର୍ତ୍ତମାନ ସୁଦ୍ଧା ବାସୁଦେବପୁର ବ୍ଲକରେ ୨୧୦, ଧାମନଗରରେ ୧୨୩, ଚାନ୍ଦବାଲିରେ ୭୬, ତିହିଡ଼ିରେ ୧୦୭, ଭଣ୍ଡାରିପୋଖରୀରେ ୩୮, ବନ୍ତରେ ୬୬, ଭଦ୍ରକରେ ୨୧୩ ଓ ଜିଲା ବାହାରୁ ୧୪୩ ଜଣ ଆକ୍ରାନ୍ତଙ୍କୁ ଚିହ୍ନଟ କରାଯାଇଛି। ଏଡ୍ସ ନିରାକରଣ ପାଇଁ ଜିଲା ଏଡ୍ସ ସେଲ୍ ଏବଂ ବିଭିନ୍ନ ସ୍ବେଚ୍ଛାସେବୀ ସଙ୍ଗଠନକୁ ନେଇ ସଚେତନତା କାର୍ଯ୍ୟକ୍ରମ କରାଯାଉଥିଲେ ମଧ୍ୟ ଏ କ୍ଷେତ୍ରରେ ଜିଲା ବହୁ ପଛରେ ପଡ଼ିଛି। ଏଡ୍ସ ଆକ୍ରାନ୍ତ ବ୍ୟକ୍ତି, ମହିଳା ଓ ଶିଶୁଙ୍କୁ ସାମାଜିକ ନ୍ୟାୟ ଓ ସୁରକ୍ଷା ଦେବା ସହ ସରକାରୀ ଯୋଜନାରେ ସାମିଲ କରାଇ ସମାଜର ମୁଖ୍ୟସ୍ରୋତକୁ ଆଣିବା ପାଇଁ ପର୍ଯ୍ୟାପ୍ତ ଉଦ୍ୟମ ହେଉ ନ ଥିବା ଅଭିଯୋଗ ହେଉଛି। କେତେକ ସ୍ଥାନରେ ଆକ୍ରାନ୍ତ ବ୍ୟକ୍ତିଙ୍କୁ ସାମାଜିକ ବାସନ୍ଦର ଶିକାର ହେବାକୁ ପଡୁଛି ତ ଆଉ କେଉଁଠି ମଧୁବାବୁ ପେନ୍ସନ ଯୋଜନାରେ ସାମିଲ ଲାଗି ବାରମ୍ବାର ବ୍ଲକ ଅଫିସ୍କୁ ଧାଇଁ ହଇରାଣ ହେବାକୁ ପଡୁଛି। ଆକ୍ରାନ୍ତମାନଙ୍କୁ ସ୍ବତନ୍ତ୍ର ଆବାସ ଯୋଜନାରେ ସାମିଲ କରି ଅଗ୍ରାଧିକାର ଦେବା ସକାଶେ ସରକାରୀ ବ୍ୟବସ୍ଥା ଥିଲେ ମଧ୍ୟ ଏହା କାର୍ଯ୍ୟକାରୀ ହେଉନାହିଁ। ସେହିଭଳି ବସ୍ ପାସ୍ ବ୍ୟବସ୍ଥା, ରାଶନକାର୍ଡ ପ୍ରଦାନ, ବ୍ୟାଙ୍କରେ ଖାତା ଖୋଲାଇବା, ଉଜ୍ଜ୍ୱଳା ଯୋଜନାରେ ସାମିଲ କରାଇବା, ଏଆର୍ଟି ସେଣ୍ଟର ଆଣି ଉପଯୁକ୍ତ ବ୍ୟବଧାନରେ ରକ୍ତ ପରୀକ୍ଷା କରାଇବା କାର୍ଯ୍ୟରେ ଅଧିକ ସମନ୍ବୟ ରକ୍ଷାର ଆବଶ୍ୟକତା ରହିଥିବା ସମାଜସେବୀମାନେ ମତବ୍ୟକ୍ତ କରିଛନ୍ତି।
ସ୍ବେଚ୍ଛାସେବୀ ସୁନାମଣି ପଣ୍ଡା କହିଛନ୍ତି, ଏଡ୍ସ ଆକ୍ରାନ୍ତଙ୍କୁ ସ୍ବତନ୍ତ୍ର ତାଲିମ ଦିଆଯାଇ ଥଇଥାନ ବ୍ୟବସ୍ଥା ପ୍ରତି ଗୁରୁତ୍ୱ ଦିଆଯିବା ଆବଶ୍ୟକ। ଜିଲାରେ ଥିବା ଯୌନକର୍ମୀଙ୍କୁ ଏଡ୍ସ ଉପରେ ସଚେତନ କରାଯାଇ ଆକ୍ରାନ୍ତଙ୍କୁ ନିୟମିତ ଔଷଧ ଦିଆଯିବା ଦରକାର। ଜିଲା ଏଡ୍ସ ସେଲ୍ କାର୍ଯ୍ୟକ୍ରମ ପ୍ରବନ୍ଧକ ଦେବବ୍ରତ ମହାପାତ୍ର ଲୋକେ ସଚେତନ ହୋଇପାରିଲେ ଏହି ରୋଗ ଅନେକାଂଶରେ ନିୟନ୍ତ୍ରଣ ହୋଇପାରନ୍ତା ବୋଲି କହିଛନ୍ତି।
