ବାଲୁଗଁ।, ୧ା୧୨(ଡି.ଏନ୍.ଏ.)
ଏକ ଆଦର୍ଶ ଓ ପରିବର୍ତ୍ତନଶୀଳ ସମାଜ ଗଠନରେ ଗଣମାଧ୍ୟମର ଭୂମିକା ଗୁରୁତ୍ୱପୂର୍ଣ୍ଣ। ସାମ୍ବାଦିକଙ୍କ ସତ୍ୟ, ନିରପେକ୍ଷ ଏବଂ ନିର୍ଭୀକ ଲେଖନୀ ଚାଳନା ଦ୍ୱାରା ଏକ ଅନ୍ଧାରୀ ମୂଲକ ନିଶ୍ଚିତ ରୂପେ ଆଲୋକିତ ହୋଇପାରିବ। ବାଲୁଗଁାରେ ଶନିବାର ଆୟୋଜିତ ରାଷ୍ଟ୍ରୀୟ ଓ ଅନ୍ତଃରାଷ୍ଟ୍ରୀୟ ସାମ୍ବାଦିକ ସମ୍ମିଳନୀରେ ମୁଖ୍ୟଅତିଥି ଭାବେ ସୂଚନା, ଲୋକସମ୍ପର୍କ ଓ ଜଳସମ୍ପଦ ମନ୍ତ୍ରୀ ରଘୁନନ୍ଦନ ଦାସ ଯୋଗଦେଇ ଏହା କହିଛନ୍ତି।
ଚିଲିକାକୁ ବିଶ୍ୱ ପର୍ଯ୍ୟଟନ କ୍ଷେତ୍ର ମାନ୍ୟତା ଦେବା ଉଦ୍ଦେଶ୍ୟ ନେଇ ଭାରତୀୟ ମିଡିଆ ଜର୍ନାଲିଷ୍ଟ ୟୁନିୟନ, ଓଡ଼ିଶା ମିଡିଆ ଜର୍ନାଲିଷ୍ଟ ଆସୋସିଏଶନ ଓ ଚିଲିକା ପ୍ରେସ୍ କ୍ଲବ୍ର ମିଳିତ ଆନୁକୂଲ୍ୟରେ ଦୁଇଦିନିଆ ସାମ୍ବାଦିକ ସମ୍ମିଳନୀ ଶନିବାର ଉଦ୍ଘାଟିତ ହୋଇଯାଇଛି। ପୂର୍ବାହ୍ନରେ ଚିଲିକା ପ୍ରେସ୍ କ୍ଲବ ସଭାପତି ପ୍ରକାଶ କୁମାର ପ୍ରଧାନଙ୍କ ପୌରୋହିତ୍ୟରେ ପ୍ରଥମେ ମା’ଭଗବତୀଙ୍କ ସ୍ମୃତିଚାରଣ କରାଯାଇ ମଞ୍ଚପୂଜା ସହ ସଭାକାର୍ଯ୍ୟ ଆରମ୍ଭ ହୋଇଥିଲା। ଏହି ଅବସରରେ ଆୟୋଜିତ ସଭାରେ ମୁଖ୍ୟ ଅତିଥିଭାବେ ମନ୍ତ୍ରୀ ଦାସ ଯୋଗଦେଇଥିବା ବେଳେ ମୁଖ୍ୟ ବକ୍ତାଭାବେ ଚିଲିକା ବିଧାୟକ ପ୍ରଶାନ୍ତ କୁମାର ଜଗଦ୍ଦେବ, ସମ୍ମାନିତ ଅତିଥିଭାବେ ପୂର୍ବତନ ମନ୍ତ୍ରୀ ଦେବେନ୍ଦ୍ରନାଥ ମାନସିଂହ ପ୍ରମୁଖ ଯୋଗଦେଇଥିଲେ। ଚିଲିକା ବିଧାୟକ ଜଗଦ୍ଦେବ କହିଥିଲେ ଯେ ବିଶ୍ୱ ଦରବାରରେ ଚିଲିକା ସ୍ଥାନିତ ହେଲେ ଏହି ଅଞ୍ଚଳର ଉନ୍ନତି ହେବା ସହ ଏଠାକୁ ବହୁ ସଂଖ୍ୟାରେ ଦେଶବିଦେଶରୁ ପର୍ଯ୍ୟଟକଙ୍କ ଆଗମନ ହୋଇପାରିବ। ଏଥିପାଇଁ ଚିଲିକା ପର୍ଯ୍ୟଟନ ଭିତ୍ତିଭୂମି ବିକାଶର ଆବଶ୍ୟକତା ରହିବା ସହ ସାମ୍ବାଦିକଙ୍କ ପ୍ରମୁଖ ଭୂମିକା ରହିଛି। ଭାରତୀୟ ମିଡିଆ ଜର୍ନାଲିଷ୍ଟ ୟୁନିୟନର ସଭାପତି ବାଲା ଭାସ୍କର, ରାଜ୍ୟ ମିଡ଼ିଆ ଜର୍ନାଲିଷ୍ଟ ଆସୋସିଏଶନର ସାଧାରଣ ସମ୍ପାଦକ ତ୍ରିଲୋଚନ ବିଶ୍ୱାଳ, ରାଜ୍ୟ ସଂଯୋଜକ ବନମାଳୀ ସାହୁ, ଚିଲିକା ପ୍ରେସ୍ କ୍ଲବର ଉପଦେଷ୍ଟା ନୃସିଂହ ମିଶ୍ର, ଆର୍ତ୍ତତ୍ରାଣ ଜାଲ, ଉପ-ସଭାପତି ହିମାଳୟ ଶତପଥୀ ଓ ଚିଲିକା ବ୍ଲବ ଉପାଧ୍ୟକ୍ଷ ଉତ୍ପତ୍ଳ ପାଇକରାୟ ପ୍ରମୁଖ ଯୋଗଦେଇଥିଲେ। ସ୍ଥାନୀୟ ଅଞ୍ଚଳର ବିଭିନ୍ନ ପ୍ରତିଭାସମ୍ପନ୍ନ ବ୍ୟକ୍ତିଙ୍କୁ ସମ୍ବର୍ଦ୍ଧିତ କରାଯାଇଥିଲା। ଏହା ସହିତ ନାଟ୍ୟ ବିଭୂଷଣ ଉପାଧି ଭାବେ ଅଶୋକ କୁମାର ଜେନା ଓ ନାଟ୍ୟ ଭୂଷଣ ଉପାଧି ଭାବେ ମହେଶ୍ୱର ଜେନାଙ୍କୁ ସମ୍ମାନିତ କରାଯାଇଥିଲା। ସନ୍ଧ୍ୟାରେ ସାଂସ୍କୃତିକ କାର୍ଯ୍ୟକ୍ରମ ସମେତ ଉତ୍କଳ କରାଟେ ସ୍କୁଲ ପକ୍ଷରୁ ଦୁଃସାହସିକ କ୍ରୀଡା କୌଶଳ ପ୍ରଦର୍ଶନ କରାଯାଇଥିଲା। ବିଭିନ୍ନ ରାଜ୍ୟ ଏବଂ ଅନ୍ତର୍ଦେଶୀୟ ସ୍ତରରୁ ପ୍ରାୟ ୮୦ରୁ ଊର୍ଦ୍ଧ୍ୱ ଗଣମାଧ୍ୟମ ପ୍ରତିନିଧି ଏହି ସମ୍ମିଳନୀରେ ଯୋଗଦେଇଛନ୍ତ। ରବିବାର ଅନୁରୂପ ଭାବେ ବଡ଼କୂଳ ପାନ୍ଥନିବାସଠାରେ ସମ୍ମିଳନୀ କରାଯାଇ ରାତ୍ରିରେ ସାଂସ୍କୃତିକ କାର୍ଯ୍ୟକ୍ରମ ସହ ଉଦ୍ଯାପିତ ହେବ। ଚିଲିକା ପ୍ରେସ୍ କ୍ଲବର ସମସ୍ତ ପ୍ରତିନିଧି ବୃନ୍ଦ ଉପସ୍ଥିତ ରହି ଏହି କାର୍ଯ୍ୟକ୍ରମକୁ ପରିଚାଳନା କରିଥିଲେ।
