ବ୍ରହ୍ମପୁର ଅଫିସ୍,୧୭ା୭-ଖଲ୍ଲିିକୋଟ କ୍ଲଷ୍ଟର ବିଶ୍ୱବିଦ୍ୟାଳୟକୁ ବ୍ରହ୍ମପୁର ସହର ବାହାର ତଥା କନିଷିସ୍ଥିତ ଜି-ମ୍ୟାକ୍ସ କଲ୍ୟାଣମଣ୍ଡପକୁ ସ୍ଥାନାନ୍ତର କରାଯିବାକୁୁ ବିଭିନ୍ନ ମହଲରେ ନିନ୍ଦା କରାଯାଉଛି। କଲ୍ୟାଣମଣ୍ଡପ ଭଳି ଏକ ବ୍ୟବସାୟିକ ସ୍ଥାନରେ କିଭଳି ଶିକ୍ଷାଦାନ ହେବ, ତାହାକୁ ନେଇ ମଧ୍ୟ ସମାଲୋଚନା କରାଯାଉଛି। ମାସକୁ ୮ଲକ୍ଷ ୨୫ହଜାର ଟଙ୍କା ଭଡ଼ାକୁ ନେଇ ମଧ୍ୟ ପ୍ରଶ୍ନ ଉଠିଛି। ମଙ୍ଗଳବାର ଅଲ୍ ଇଣ୍ଡିଆ ଡେମୋକ୍ରାଟିକ୍ ଷ୍ଟୁଡେଣ୍ଟ୍ସ ଅର୍ଗାନାଇଜେଶନ୍(ଏଆଇଡିଏସ୍ଓ) ପକ୍ଷରୁ ଏହାକୁ ତୀବ୍ର ବିରୋଧ କରାଯିବା ସହ ବିକ୍ଷୋଭ ପ୍ରଦର୍ଶନ କରାଯାଇଛି। ଶୈକ୍ଷିକ ବାତାବରଣକୁ ରାଜ୍ୟ ସରକାର ନଷ୍ଟ କରୁଛନ୍ତି ବୋଲି ସଂଗଠନ ପକ୍ଷରୁ ଅଭିଯୋଗ ହୋଇଛି । ଅଭିଯୋଗ ଅନୁଯାୟୀ, ଏକକ ବିଶ୍ୱବିଦ୍ୟାଳୟ, ଡିମ୍ଡ ବିଶ୍ୱବିଦ୍ୟାଳୟ ଏବଂ କ୍ଲଷ୍ଟର ବିଶ୍ୱବିଦ୍ୟାଳୟ କଦାପି ଗୁଣାତ୍ମକ ମାନର ଶିକ୍ଷା ପ୍ରଦାନ କରିପାରିବ ନାହିଁ। ଏହା ଦ୍ୱାରା ସରକାର ଶିକ୍ଷାର ଘରୋଇକରଣ ଏବଂ ବ୍ୟବସାୟୀକରଣ ପାଇଁ ରାସ୍ତା ବାହାର କରୁଛନ୍ତି। ଏହାର ପରିଣାମ ଖଲ୍ଲିକୋଟ କ୍ଲଷ୍ଟର ବିଶ୍ୱବିଦ୍ୟାଳୟରେ ଦେଖିବାକୁ ମିଳିଛି । ପାଠପଢ଼ା ଖର୍ଚ୍ଚକୁ ଛାତ୍ରୀଛାତ୍ରଙ୍କ ଉପରେ ଲଦି ଦିଆଯାଉଛି। ବ୍ରହ୍ମପୁର ବିଶ୍ୱବିଦ୍ୟାଳୟରେ ବିଭିନ୍ନ ସମସ୍ୟା ଲାଗି ରହିଛିା ଏହାକୁ ସଜାଡ଼ିବା ବଦଳରେ ୫ ମହାବିଦ୍ୟାଳୟକୁ ନେଇ ଖଲ୍ଲିକୋଟ କ୍ଲଷ୍ଟର ବିଶ୍ୱବିଦ୍ୟାଳୟ ଖୋଲିବା ନିନ୍ଦନୀୟ। ବର୍ତ୍ତମାନ ସୁଦ୍ଧା ଏହି ବିଶ୍ୱବିଦ୍ୟାଳୟର ଏକାଡ଼େମୀ ବ୍ଲକ ପାଇଁ ୫ କୋଟି, କ୍ରୀଡ଼ା ସଂସଦ କାର୍ଯ୍ୟାଳୟ ପାଇଁ ୫କୋଟି ଏବଂ ଶୌଚାଳୟ ନିର୍ମାଣ ପାଇଁ ୧ କୋଟି ଟଙ୍କା ଖର୍ଚ୍ଚରେ ନିର୍ମାଣ କାର୍ଯ୍ୟ ଆରମ୍ଭ ହୋଇସାରିଛି । ଏଣୁ ଭିତ୍ତିଭୂମି ନ ଥିବା ଦର୍ଶାଇ ଏକ କଲ୍ୟାଣମଣ୍ଡପକୁ ସ୍ଥାନାନ୍ତର କାହା ସ୍ବାର୍ଥରେ ବୋଲି ସଂଗଠନ ପ୍ରଶ୍ନ କରିଛି। ଏଣୁ ତୁରନ୍ତ ଏହାକୁ ବାତିଲ କରାଯାଉ ବୋଲି ସଂଗଠନ ପକ୍ଷରୁ ଏକ ଦାବିପତ୍ର ଦକ୍ଷିଣାଞ୍ଚଳ ରାଜସ୍ବ କମିଶନରଙ୍କୁ ପ୍ରଦାନ କରାଯାଇଛି। ରାଜ୍ୟ ଉପସଭାପତି ସୋମନାଥ ବେହେରା, ଶିବାନୀ ଶଙ୍କର ମିଶ୍ର, ନିମାଇଁ ଚରଣ ସାହୁ, ରଞ୍ଜନ ସେଠୀ, କିଶାନ ସାହୁ, ପପୁନ ସାହୁ, କାମରାଜ ସାହୁଙ୍କ ସମେତ ବହୁ ସଦସ୍ୟ ଏହି ବିକ୍ଷୋଭରେ ଭାଗ ନେଇଥିଲେ ।
