ନୂଆଦିଲ୍ଲୀ,୬ା୯: ପ୍ରାୟ ୫୪ ହଜାର କର୍ମଚାରୀଙ୍କ ପାଇଁ ଆସିଛି ବଡ଼ ଖୁସି ଖବର। କେନ୍ଦ୍ର ସରକାରଙ୍କ ଇସ୍ପାତ ମନ୍ତ୍ରଣାଳୟ ଅଧୀନରେ ଥିବା ଷ୍ଟିଲ୍ ଅଥରିଟି ଅଫ୍ ଇଣ୍ଡିଆ ଲିମିଟେଡ୍ (SAIL) ମହଙ୍ଗା ଭତ୍ତା (DA) ବୃଦ୍ଧି ନେଇ ବଡ଼ ଘୋଷଣା କରିଛି। କମ୍ପାନୀ ପକ୍ଷରୁ DAରେ ପ୍ରାୟ ୨.୯ ପ୍ରତିଶତ ବୃଦ୍ଧି କରାଯାଇଛି। ଏହାର ଫାଇଦା SAILର ଅଧିକାରୀ ଓ କର୍ମଚାରୀଙ୍କୁ ମିଳିବ। ଏହି ବୃଦ୍ଧି ପରେ କର୍ମଚାରୀଙ୍କ ମହଙ୍ଗା ଭତ୍ତା ୫୫.୭ ପ୍ରତିଶତରୁ ବଢ଼ି ୫୮.୬ ପ୍ରତିଶତ ହୋଇଯିବ। ଫଳରେ କର୍ମଚାରୀଙ୍କ ମୋଟ ଦରମାରେ ମଧ୍ୟ ବୃଦ୍ଧି ହେବ।
୧ ଅକ୍ଟୋବରରୁ ଲାଗୁ ହେବ ନୂଆ DA- SAIL ପକ୍ଷରୁ ଘୋଷଣା କରାଯାଇଛି ଯେ, DAରେ ଏହି ୨.୯ ପ୍ରତିଶତ ବୃଦ୍ଧି ୧ ଅକ୍ଟୋବର ୨୦୨୬ରୁ ଲାଗୁ ହେବ। ଏହାର ସିଧାସଳଖ ଲାଭ ବୋକାରୋ ଷ୍ଟିଲ୍ ପ୍ଲାଣ୍ଟ ସମେତ SAILର ବିଭିନ୍ନ ୟୁନିଟ୍ରେ କାମ କରୁଥିବା ପ୍ରାୟ ୫୪ ହଜାର କର୍ମଚାରୀ ପାଇବେ।
SAIL ଭାରତର ପ୍ରମୁଖ ଇସ୍ପାତ ଉତ୍ପାଦନକାରୀ କମ୍ପାନୀ ମଧ୍ୟରୁ ଅନ୍ୟତମ। କମ୍ପାନୀକୁ ‘ସର୍ବୋଚ୍ଚ ମହାରତ୍ନ’ ମାନ୍ୟତା ମିଳିଛି। SAILରେ କେନ୍ଦ୍ର ସରକାରଙ୍କ ପ୍ରାୟ ୬୫ ପ୍ରତିଶତ ଅଂଶଧନ ରହିଛି। ସିକ୍କିମ ସରକାର ମଧ୍ୟ ବଢ଼ାଇଛି DA– ଏହା ପୂର୍ବରୁ ସିକ୍କିମ ସରକାର ମଧ୍ୟ ନିଜ ରାଜ୍ୟର ସରକାରୀ କର୍ମଚାରୀ ଓ ପେନ୍ସନଭୋଗୀଙ୍କ ପାଇଁ DA ଓ ମହଙ୍ଗା ରିଲିଫ୍ (DR) ବୃଦ୍ଧି ଘୋଷଣା କରିଥିଲା। ମୁଖ୍ୟମନ୍ତ୍ରୀ ପ୍ରେମ ସିଂହ ତମାଙ୍ଗଙ୍କ ଘୋଷଣା ଅନୁଯାୟୀ, DA ଓ DRରେ ୨ ପ୍ରତିଶତ ବୃଦ୍ଧି କରାଯାଇଛି।
ଏହି ବୃଦ୍ଧି ୧ ଜାନୁଆରୀ ୨୦୨୬ରୁ ପିଛିଲା ତାରିଖରୁ ଲାଗୁ ହେବ। ଏହା ସହ କର୍ମଚାରୀଙ୍କୁ ପୂର୍ବ ମାସଗୁଡ଼ିକର ବକେୟା ରାଶି ବା ଏରିୟର ମଧ୍ୟ ମିଳିବ। ସରକାର ପକ୍ଷରୁ ଦଶହରା ପର୍ବ ପୂର୍ବରୁ ଏରିୟର ଦେବାକୁ କୁହାଯାଇଛି।
