ପ୍ୟାରିସ,୨୫ା୪: ଫ୍ରାନ୍ସରେ ହୋଇଥିବା ଏକ ସଦତ୍ୟମ ଅନୁସନ୍ଧାନ ଅନୁଯାୟୀ, ନିକୋଟିନ ଲୋକଙ୍କୁ କରୋନା ଭାଇରସ୍ରୁ ରକ୍ଷା କରିପାରିବ। ହେଲେ ମହାମାରୀ କରୋନାକୁ ରୋକିବା କିମ୍ବା ଚିକିତ୍ସା ପାଇଁ ନିକୋଟିନ ବ୍ୟବହାର କରାଯାଇପାରିବ କି ନାହିଁ ସେନେଇ ପରବର୍ତ୍ତୀ ପରୀକ୍ଷଣ ନିମନ୍ତେ ଯୋଜନା କରାଯାଇଛି। ପ୍ୟାରିସର ଏକ ପ୍ରମୁଖ ହସ୍ପିଟାଲ ‘ପିଟି-ସାଲ୍ପ୍ରେଟିଅର୍’ରେ ଗବେଷକମାନେ ୩୪୩ କରୋନା ସଂକ୍ରମିତଙ୍କୁ ପରୀକ୍ଷା କରିଥିଲେ, ଯାହାଙ୍କ ମଧ୍ୟରୁ ୧୩୯ ଜଣଙ୍କଠାରେ ରୋଗର ସାମାନ୍ୟ ଲକ୍ଷଣ ଥିଲା। ଏହି ରୋଗୀମାନଙ୍କ ମଧ୍ୟରୁ ମାତ୍ର ୫% ଧୂମପାନ କରିଥାନ୍ତି, ଯାହାକି ଫ୍ରାନ୍ସର ମୋଟ ଜନସଂଖ୍ୟାର ପ୍ରାୟ ୩୫% ଧୂମପାନ ହାର ତୁଳନାରେ ବହୁତ କମ୍। ଗତ ମାସରେ ଇଂଲଣ୍ଡର ଏକ ପତ୍ରିକାରେ ପ୍ରକାଶିତ ଅଧ୍ୟୟନ ରିପୋର୍ଟ ଅନୁଯାୟୀ, ଚାଇନାର ୧୦୦୦ ସଂକ୍ରମିତଙ୍କ ମଧ୍ୟରୁ ୧୨.୬ % ଧୂମପାନକାରୀ ଥିଲେ। ବିଶ୍ୱ ସ୍ବାସ୍ଥ୍ୟ ସଂଗଠନ (ଡବ୍ଲ୍ୟୁଏଚ୍ଓ) ଅନୁଯାୟୀ, ଚାଇନାର ମୋଟ ଜନସଂଖ୍ୟାର ୨୬% ଲୋକ ଧୂମପାନ କରନ୍ତି। ଏହାକୁ ତୁଳନା କଲେ ଚାଇନାର କରୋନାରେ ସଂକ୍ରମିତ ହୋଇଥିବା ଧୂମପାନକାରୀଙ୍କ ସଂଖ୍ୟା ନଗଣ୍ୟ।
ଫ୍ରାନ୍ସର ପାଶ୍ଚର ଇନଷ୍ଟିଚ୍ୟୁଟ୍ର ଜଣାଶୁଣା ସ୍ନାୟୁବିଜ୍ଞାନୀ ତଥା ଗବେଷକ ଦଳର ସଦସ୍ୟ ଜିନ୍-ପିୟରେ ଚେଞ୍ଜକ୍ସଙ୍କ କହିବା ଅନୁଯାୟୀ, ନିକୋଟିନ ଗ୍ରାହୀ କୋଷ(ରିସେପ୍ଟର ସେଲ୍)ଗୁଡ଼ିକରେ ଅଠାଭଳି ଲାଖି ରହିପାରେ। ଫଳରେ ତାହା ଭୂତାଣୁକୁ କୋଷରେ ପ୍ରବେଶ କରିବାରୁ ରୋକିଥାଏ। ତେଣୁ ଶରୀରରେ ତାହା ବ୍ୟାପିପାରେ ନାହିଁ। ଗବେଷକମାନେ ଏବେ ଏହାର କ୍ଲିନିକାଲ ପରୀକ୍ଷା ପାଇଁ ଫ୍ରାନ୍ସର ସ୍ବାସ୍ଥ୍ୟ ବିଭାଗର ଅନୁମୋଦନକୁ ଅପେକ୍ଷା କରିଛନ୍ତି। ସେମାନେ ପିଟି-ସାଲ୍ପ୍ରେଟିଅର ହସ୍ପିଟାଲର ସ୍ବାସ୍ଥ୍ୟ କର୍ମଚାରୀଙ୍କ ଉପରେ ନିକୋଟିନ ପ୍ୟାଚ୍ ବ୍ୟବହାର କରିବାକୁ ଯୋଜନା କରୁଛନ୍ତି। ସେମାନେ ଦେଖିବାକୁ ଚାହାନ୍ତି ଯେ, ଉକ୍ତ ପ୍ୟାଚ୍ ସ୍ବାସ୍ଥ୍ୟକର୍ମୀଙ୍କୁ ଭୂତାଣୁ ସଂକ୍ରମଣରୁ କିଭଳି ରକ୍ଷା କରିପାରୁଛି। ଏପରି କି ଡାକ୍ତରଖାନାରେ ଭର୍ତ୍ତି ରୋଗୀଙ୍କ ଶରୀରରେ ମଧ୍ୟ ଏହି ପ୍ୟାଚ୍ ବ୍ୟବହାର କରିବାକୁ ଗବେଷକମାନେ ଚାହୁଁଛନ୍ତି। ଏହାଦ୍ୱାରା ନିକୋଟିନ୍ ପ୍ୟାଚ୍ ରୋଗର ଲକ୍ଷଣ ହ୍ରାସ କରିବାରେ ସହାୟକ ହେଉଛି କି ନାହିଁ ତାହା ଜାଣିହେବ ବୋଲି ଗବେଷକ ଦଳର ପ୍ରଫେସର ଜାହରି ଆମ୍ୟୁରା କହିଛନ୍ତି।
ଶରୀରର ରୋଗ ପ୍ରତିରୋଧକ ବ୍ୟବସ୍ଥାର ଅତି ତୀବ୍ର ପ୍ରତିିକ୍ରିୟା ବା ‘ସାଇଟୋକାଇନ ଷ୍ଟ୍ରମ୍ସ’ ଯୋଗୁ କୋଭିଡ୍-୧୯ ଏବଂ ଇନ୍ଫ୍ଳୁଏଞ୍ଜା ଭଳି ରୋଗ ସାଂଘାତିକ ହୋଇପାରେ। ହେଲେ ନିକୋଟିନ ‘ସାଇଟୋକାଇନ ଷ୍ଟ୍ରମ୍ସ’କୁ ରୋକିବାରେ ସହାୟକ ହେଉଛି କି ନାହିଁ ତାହା ଜାଣିବା ପାଇଁ ଗବେଷକମାନେ ଅନୁସନ୍ଧାନ କରୁଛନ୍ତି, ଯାହା କୋଭିଡ୍-୧୯ କ୍ଷେତ୍ରରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ ବୋଲି ଆଶା କରାଯାଉଛି। ସେମାନେ ଏ କଥା ବି ସ୍ପଷ୍ଟ କରିଛନ୍ତି ଯେ, ସେମାନଙ୍କ ଅନୁସନ୍ଧାନର ଉଦ୍ଦେଶ୍ୟ ଲୋକଙ୍କୁ ଧୂମପାନ କରିବାକୁ ଉତ୍ସାହିତ କରିବା ନୁହେଁ, ବରଂ ଏହି ମହାମାରୀ ଭୂତାଣୁ ବିରୋଧରେ ସୁରକ୍ଷାତ୍ମକ ଉପାୟ ଭାବେ ନିକୋଟିନକୁ ବ୍ୟବହାର କରାଯାଇପାରିବ। ଅନ୍ୟପକ୍ଷରେ ଆମେ ଭୁଲିବା ଉଚିତ ନୁହେଁ ଯେ, ନିକୋଟିନ ଶରୀରକୁ ମଧ୍ୟ କ୍ଷତି ପହଞ୍ଚାଇଥାଏ ବୋଲି ଫ୍ରାନ୍ସର ଜଣେ ପ୍ରମୁଖ ସ୍ବାସ୍ଥ୍ୟ ଅଧିକାରୀ ଜେରୋମ୍ ସାଲୋମନ କହିଛନ୍ତି। ଧୂମପାନ କରୁ ନ ଥିବା ଲୋକେ କୌଣସି ବିକଳ୍ପ ନିକୋଟିନ ବ୍ୟବହାର କରନ୍ତୁ ନାହିଁ। ତାହାର ପାର୍ଶ୍ୱ ପ୍ରତିକ୍ରିୟା ଦେଖାଦେଇପାରେ ଏବଂ ସେମାନେ ନିଶାରେ ଆସକ୍ତ ହୋଇପାରନ୍ତି ବୋଲି ସାଲୋମନ ସତର୍କ କରାଇ ଦେଇଛନ୍ତି।
ସୂଚନାଥାଉ କି, ପ୍ରତିବର୍ଷ ଫ୍ରାନ୍ସରେ ତମାଖୁ ବ୍ୟବହାର ଯୋଗୁ ପ୍ରାୟ ୭୫ ହଜାର ଲୋକ ପ୍ରାଣହରାନ୍ତି। ଏବେ କରୋନା ଭୂତାଣୁର ପ୍ରକୋପରେ ଫ୍ରାନ୍ସରେ ୨୨ ହଜାରରୁ ଊର୍ଦ୍ଧ୍ୱ ଲୋକଙ୍କ ମୃତ୍ୟୁ ଘଟିସାରିଲାଣି। ୧ ଲକ୍ଷ ୬୦ ହଜାରରୁ ଅଧିକ ଲୋକ ସଂକ୍ରମିତ ହୋଇଛନ୍ତି।
