ନୂଆଦିଲ୍ଲୀ, ୧୨ା୫: ପଶ୍ଚିମବଙ୍ଗରେ କରୋନା ଭାଇରସ୍ ସ୍ଥିତି ଭୟଙ୍କର ହେବାରେ ଲାଗିଛି। ଏକ୍ଷେତ୍ରରେ କେନ୍ଦ୍ର ସରକାର ଆମକୁ ସହଯୋଗ କରୁନାହାନ୍ତି। ରାଜ୍ୟ-ରାଜ୍ୟ ମଧ୍ୟରେ ଭେଦଭାବ କରାଯାଇ ରାଜନୀତି କରାଯାଉଛି। ସଂଘୀୟ ବ୍ୟବସ୍ଥାର ଅବମାନନା କରାଯାଉଛି। ଏଭଳି ସ୍ଥିତିରେ ସହଯୋଗ କରାଯିବା ବଦଳରେ ରାଜନୈତିକ ଆକ୍ରୋଶ ରଖି ଆମକୁ ଅଣଦେଖା କରାଯାଉଛି ବୋଲି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ତଥା ଟିଏମ୍ସି ମୁଖ୍ୟ ମମତା ବାନାର୍ଜୀ ଅଭିଯୋଗ କରିଛନ୍ତି। ସୋମବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପଞ୍ଚମ ଥର ଲାଗି କରୋନା ସ୍ଥିତି ସମୀକ୍ଷା ସହ ରାଜ୍ୟ ମୁଖ୍ୟମନ୍ତ୍ରୀଙ୍କୁ ନେଇ ଭିଡିଓ କନ୍ଫରେନ୍ସିଂ କରିଥିବା ବେଳେ ମମତା ଆପତ୍ତି ଉଠାଇଥିଲେ। ଲକ୍ଡାଉନ୍ କୋହଳ କରିବା, ଦାଦନ ଶ୍ରମିକ ପ୍ରସଙ୍ଗ, ଆର୍ଥତ୍କ ସ୍ଥିତି ସମ୍ପର୍କରେ ଆଲୋଚନା କରିବାକୁ ସେ ଦାବି କରିଥିଲେ। ଗଣମାଧ୍ୟମ ଆଗରେ ସେ କେନ୍ଦ୍ର କୌଣସି ସହାୟତା କରୁ ନ ଥିବା ଅଭିଯୋଗ କରିଛନ୍ତି।
ଏପ୍ରିଲ ୨୦ରେ ଇଣ୍ଟର ମିନିଷ୍ଟରିଆଲ ଟିମ୍ ପଶ୍ଚିମବଙ୍ଗ ଗସ୍ତକରି କରୋନା ସ୍ଥିତି ସମୀକ୍ଷା କରିଥିଲେ। ସ୍ବରାଷ୍ଟ୍ରମନ୍ତ୍ରୀ ଫୋନ୍କରି ଜଣାଇବାର ୩ ଘଣ୍ଟା ପୂର୍ବରୁ ସେମାନେ ପହଞ୍ଚି ଯାଇଥିଲେ। ଗସ୍ତ ପୂର୍ବରୁ ଅବଗତ କରା ନ ଯିବାକୁ ନେଇ ମଧ୍ୟ ମମତା ବର୍ଷିଛନ୍ତି। ହଠାତ୍ କେନ୍ଦ୍ରୀୟ ଟିମ୍ ବେଙ୍ଗଲ ଆସିବା ଓ ହଟ୍ସ୍ପଟ୍ରେ ରାଜ୍ୟର ସହଯୋଗ ନ ପାଇବା କଥା କହିବା ଠିକ୍ନୁହେଁ। କେନ୍ଦ୍ର ସବୁ ରାଜ୍ୟକୁ ଠିକ୍ ଭାବେ ଏଭଳି ସମୟରେ ଦେଖିବା ଉଚିତ୍ ବୋଲି ମମତା କହିଛନ୍ତି।
