କଟକ ଅଫିସ, ୧୯।୯: କଟକ ଏସ୍ସିବି ମେଡିକାଲରେ ଚିକିତ୍ସିତ ହେଉଥିବା ଜଗା- କାଳିଆଙ୍କୁ ବୁଧବାର ଓଡ଼ିଶା ଶିଶୁ ସୁରକ୍ଷା ଆୟୋଗ ଅଧ୍ୟକ୍ଷା ସନ୍ଧ୍ୟାବତୀ ପ୍ରଧାନ ଭେଟିଛନ୍ତି। ଜଗା ସହ କଥା ହୋଇଥିବାବେଳେ ଉଭୟଙ୍କ ସ୍ବାସ୍ଥ୍ୟବସ୍ଥା ସମ୍ପର୍କରେ ଏସ୍ସିବି ସୁପରିଣ୍ଟେଣ୍ଡେଣ୍ଟ ଓ ଦାୟିତ୍ୱରେ ଥିବା ଡାକ୍ତରଙ୍କଠାରୁ ପଚାରି ବୁଝିଥିଲେ। ଏ ସମ୍ପର୍କରେ ପ୍ରଧାନ କହିଛନ୍ତି, ଜଗାର ଅବସ୍ଥା ଏବେ ସମ୍ପୂର୍ଣ୍ଣ ଭଲ ଅଛି। ସେ ଯେତେଦିନ ପର୍ଯ୍ୟନ୍ତ ମେଡିକାଲରେ ଅଛି, ତାକୁ ଘରୋଇ ପରିବେଶ ଯୋଗାଇ ଦିଆଯିବା ସହ ମାନସିକ ସ୍ତରରେ କିପରି ବିକାଶ ଘଟିବ ସେ ଦିଗରେ ଧ୍ୟାନ ରଖିବା ଜରୁରୀ। ଏ ଦିଗରେ ଆମ ପକ୍ଷରୁ ସମ୍ପୂର୍ଣ୍ଣ ସହଯୋଗ କରାଯିବ। ଖେଳିବା ନିମନ୍ତେ ଖେଳ ସରଞ୍ଜାମ ଯୋଗାଇ ଦିଆଯିବ ଓ ମେଡିକାଲରେ ରହି ଯେପରି ପଢିପାରିବ ସେ ଦିଗରେ ଧ୍ୟାନ ଦିଆଯିବ। ଯେପରି ଠିକ୍ ଚିକିତ୍ସା ଦ୍ୱାରା ଦୁଇ ଜଣଙ୍କ ସ୍ବାସ୍ଥ୍ୟାବସ୍ଥାରେ ଉନ୍ନତି ଘଟିବ ସେ ଦିଗରେ ଚେଷ୍ଟା କରାଯିବ। କାଳିଆର ଅବସ୍ଥା ସ୍ବାଭାବିକ ରହିଛି। ତାକୁ ଚଲାବୁଲା କରିବା ପାଇଁ ଆଉ କିଛିଦିନ ଲାଗିବ। ଦୁଇଜଣଙ୍କ ପାଇଁ ନିୟୋଜିତ ହୋଇଥିବା ୧୪ ଜଣିଆ ଡାକ୍ତର ଟିମ୍ ଚିକିତ୍ସା କରୁଛନ୍ତି। ଏଥିରେ ଏମ୍ସର ଡାକ୍ତର ମଧ୍ୟ ସହଯୋଗ କରୁଛନ୍ତି। ଖୁବ୍ଶୀଘ୍ର କାଳିଆ ସୁସ୍ଥ ହେବ ବୋଲି ଆମେ ଭାବୁଛୁ।
