କଟକ ଅଫିସ,୨୪।୩: କରୋନା ମୁକାବିଲା ପାଇଁ ରାଜ୍ୟ ସରକାରଙ୍କ ପକ୍ଷରୁ ବିଭିନ୍ନ ପଦକ୍ଷେପ ନିଆଯାଉଛି। ହେଲେ ଏସ୍ସିବି ମେଡିକାଲରେ କରୋନା ମୁକାବିଲା ଲାଗି ନିୟୋଜିତ ଥିବା ଡାକ୍ତର, ନର୍ସ, ଲ୍ୟାବ୍ ଟେକ୍ନିସିଆନ, ଫାର୍ମାସିଷ୍ଟ ଏବଂ ଚତୁର୍ଥ ଶ୍ରେଣୀ କର୍ମଚାରୀଙ୍କୁ ଗତ ୧୯ ତାରିଖ ପରଠାରୁ ଆବଶ୍ୟକତା ଅନୁଯାୟୀ ସାନିଟାଇଜର, ପିପି କିଟ୍ ଓ ମାସ୍କ ମିଳୁନାହିଁ । ଏ ନେଇ କର୍ମଚାରୀ ଓ ଡାକ୍ତରୀ ଛାତ୍ରମାନେ ଏ ସମ୍ପର୍କରେ ଏସ୍ସିବି ସୁପରିଣ୍ଟେଣ୍ଡେଣ୍ଟଙ୍କୁ ଅବଗତ କରାଇଥିଲେ ମଧ୍ୟ କୌଣସି ସୁଫଳ ମିଳିପାରି ନାହିଁ। ଏହାକୁ ନେଇ ସେମାନଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ଏଭଳି ସ୍ଥିତିରେ ଆମ୍ଭମାନଙ୍କ ସୁରକ୍ଷା ଜରୁରୀ ବୋଲି ଅନେକ କର୍ମଚାରୀ କହିଛନ୍ତି। ଏ ସମ୍ପର୍କରେ ଏସ୍ସିବି ସୁପରିଣ୍ଟେଣ୍ଡେଣ୍ଟ ଡା. ଅନ୍ନଦା ପ୍ରସାଦ ପଟ୍ଟନାୟକ କହିଛନ୍ତି, ଏବେ ସବୁଠି ଆବଶ୍ୟକତା ଅନୁଯାୟୀ ଉତ୍ପାଦନ ନାହିଁ । ତେଣୁ ହଠାତ୍ ଏକକାଳୀନ ଆବଶ୍ୟକତା ପୂରଣ କରିବା କଷ୍ଟକର। ଆମେ ଏ ବାବଦରେ ଆରଡିସିଙ୍କୁ ଅବଗତ କରାଇଛୁ। ତୁରନ୍ତ ଏଥିପ୍ରତି ସରକାର ଦୃଷ୍ଟି ଦେବେ ବୋଲି ଆଶା କରୁଛୁ।
