କଟକ ଅଫିସ୍,୧୧।୫: କରୋନା ପ୍ରଭାବରେ ରୋଜଗାର ହରାଇଥିବା ଆଇନଜୀବୀଙ୍କୁ ୧୦ହଜାର ଟଙ୍କା ପର୍ଯ୍ୟନ୍ତ ଆର୍ଥତ୍କ ସହାୟତା ମିଳିବ। ଓଡ଼ିଶା ରାଜ୍ୟ ଆଇନ୍ଜୀବୀ ପରିଷଦ ପକ୍ଷରୁ ଏ ନେଇ ପଦକ୍ଷେପ ନିଆଯାଇଛି। ପରିଷଦ ଦ୍ୱାରା ପ୍ରସ୍ତୁତ ଜରୁରିକାଳୀନ ଆର୍ଥତ୍କ ସହାୟତା ନିୟମ -୨୦୨୦କୁ ବାର୍ କାଉନସିଲ୍ ଅଫ୍ ଇଣ୍ଡିଆର ସାଧାରଣ ପରିଷଦରେ ଅନୁମୋଦନ ମିଳିଛି। ରାଜ୍ୟରେ ପ୍ରଥମ ଥର ପାଇଁ କାର୍ଯ୍ୟକାରୀ ହେବାକୁ ଥିବା ଏହି ନିୟମ ଅନୁଯାୟୀ ବିଭିନ୍ନ ପ୍ରାକୃତିକ ଦୁର୍ବିପାକ ଦ୍ୱାରା ପ୍ରଭାବିତ ଆଇନ୍ଜୀବୀଙ୍କୁ ସହାୟତା ପ୍ରଦାନ କରାଯିବ।
ଲକ୍ଡାଉନ୍ ପ୍ରଭାବରେ କୋର୍ଟଗୁଡ଼ିକ ବନ୍ଦ ରହିଥିବାରୁ ଆଇନଜୀବୀମାନେ ସାମୟିକ ଭାବେ ରୋଜଗାର ହରାଇଛନ୍ତି। ତେଣୁ ସେମାନଙ୍କୁ ଆର୍ଥତ୍କ ସହାୟତା ପ୍ରଦାନ ପାଇଁ ବିଭିନ୍ନ ଓକିଲ ସଂଘ ତରଫରୁ ଦାବି ହୋଇଥିଲା। ଏ ନେଇ ଏପ୍ରିଲ୍ ୧ରେ ରାଜ୍ୟ ଆଇନଜୀବୀ ପରିଷଦର ସ୍ବତନ୍ତ୍ର କମିଟି ବୈଠକରେ ଆଲୋଚନା ହୋଇଥିଲା। ପରବର୍ତ୍ତୀ ସମୟରେ ‘ଓଡ଼ିଶା ରାଜ୍ୟ ଆଇନଜୀବୀ ପରିଷଦ ଜରୁରିକାଳୀନ ଆର୍ଥତ୍କ ସହାୟତା ନିୟମ-୨୦୨୦’ ପ୍ରସ୍ତୁତ କରାଯାଇଥିଲା। ପ୍ରାକୃତିକ ଦୁର୍ବିପାକ ଦ୍ୱାରା ଆଇନ୍ଜୀବୀଙ୍କ ରୋଜଗାର ପ୍ରଭାବିତ ହେଲେ ସହାୟତା ପ୍ରଦାନ ପାଇଁ ଏହି ନିୟମରେ ବ୍ୟବସ୍ଥା ରହିଛି। ଏଥିପାଇଁ ୭ଜଣିଆ କମିଟି ଗଠନ ହେବ। ଆଇନଜୀବୀ ନିଜ ଓକିଲ ସଂଘ ସଭାପତି କିମ୍ବା ସମ୍ପାଦକଙ୍କଠାରୁ ଆବେଦନପତ୍ରରେ ଅନୁମୋଦନ ଆଣିବେ। ଆବେଦନଗୁଡ଼ିକ ଗଠିତ କମିଟି ପାଖରେ ଉପସ୍ଥାପନ କରାଯିବ। କମିଟି ଆବେଦନଗୁଡ଼ିକର ବିଚାର କରି ତାଲିକା ପ୍ରସ୍ତୁତ ପରେ ରାଜ୍ୟ ଆଇନଜୀବୀ ପରିଷଦ କିମ୍ବା ସ୍ବତନ୍ତ୍ର କମିଟି ପାଖକୁ ପଠାଇବେ। କୌଣସି ଆଇନଜୀବୀ ମିଥ୍ୟା ତଥ୍ୟ ଦେଇଥିଲେ ତେବେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏଥିପାଇଁ ସମ୍ପୃୃକ୍ତ ସଂଘ କର୍ମକର୍ତ୍ତା ମଧ୍ୟ ଦାୟୀ ହେବେ। କୌଣସି ଆବେଦନକୁ ବାତିଲ କରିବାର ସମସ୍ତ କ୍ଷମତା ପରିଷଦ ପାଖରେ ରହିବ।
କେଉଁମାନଙ୍କୁ ମିଳିବ ସହାୟତା
ସହାୟତା ପାଇବାକୁ ଯୋଗ୍ୟ ଆଇନଜୀବୀଙ୍କ ପାଇଁ କେତେକ ସର୍ତ୍ତ ରଖାଯାଇଛି। ସେଗୁଡ଼ିକ ହେଲା ବାର୍ଷିକ ଆୟ ଦେଢ଼ ଲକ୍ଷ ଟଙ୍କାରୁ କମ୍ ହୋଇଥିବ। ସ୍ବାମୀ/ସ୍ତ୍ରୀ ସରକାରୀ/କର୍ପୋରେଟ୍ ସଂସ୍ଥାରେ ଚାକିିରି କରି ନ ଥିବେ କିମ୍ବା ପେନ୍ସନ୍ ପାଉ ନ ଥିବେ। ସହରାଞ୍ଚଳରେ ନିଜର ଘର କିମ୍ବା ଫ୍ଲାଟ୍ ନ ଥିବ, ୧୦ ଏକରରୁ ଅଧିକ ଚାଷ ଜମି ନ ଥିବ, ଅଭିଭାବକଙ୍କ ବ୍ୟକ୍ତିଗତ ଆୟ ନ ଥିବ, ଚାରିଚକିଆ ଯାନ ନ ଥିବ। ସେହିପରି ସେ ନିୟମିତ ଲ’ ପ୍ରାକ୍ଟିସ୍ କରୁଥିବେ, ରାଜ୍ୟ ଆଇନ୍ଜୀବୀ ପରିଷଦର ସଦସ୍ୟ ଥିବେ, ଅଲ୍ ଇଣ୍ଡିଆ ବାର୍ ଏକ୍ସଜାମିନେଶନ୍ରେ ଉତ୍ତୀର୍ଣ୍ଣ ହୋଇଥିବେ, ଜୁନିୟର୍ ଭାବେ କାମ କରୁଥିଲେ ୧୦ ହଜାରରୁ ଅଧିକ ଟଙ୍କା ମାସିକ ନେଉ ନ ଥିବେ, ଅନୁବନ୍ଧିତ ଓକିଲ ସଂଘର ଭୋଟର୍ ଥିବେ, ପେନ୍ସନ୍ ପାଉ ନ ଥିବେ, କେନ୍ଦ୍ର, ରାଜ୍ୟ ସରକାର କିମ୍ବା କୌଣସି ସରକାରୀ କି ଘରୋଇ ଉଦ୍ୟୋଗଠାରୁ ଫି’ ଗ୍ରହଣ କରୁ ନ ଥିବା ଆବଶ୍ୟକ।
