ଇଟାନଗର, ୩୦ା୫(ପି.ଟି.): ଅରୁଣାଚଳ ପ୍ରଦେଶର ଦଶମ ମୁଖ୍ୟମନ୍ତ୍ରୀ ଭାବେ ବରିଷ୍ଠ ଭାଜପା ନେତା ପେମା ଖଣ୍ଡୁ ବୁଧବାର ଶପଥ ଗ୍ରହଣ କରିଛନ୍ତି। ଦୋର୍ଜି ଖଣ୍ଡୁ କନ୍ଭେନଶନ ସେଣ୍ଟରରେ ଅନୁଷ୍ଠିତ ଉତ୍ସବରେ ରାଜ୍ୟପାଳ ବ୍ରିଗେଡିୟର (ଅବସରପ୍ରାପ୍ତ) ବି.ଡି. ମିଶ୍ର ତାଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଥିଲେ। ଉପମୁଖ୍ୟମନ୍ତ୍ରୀ ଚୋନା ମୈନଙ୍କ ସମେତ ୧୧ ଜଣ ମନ୍ତ୍ରୀ ମଧ୍ୟ ଶପଥ ନେଇଛନ୍ତି। ଏହି କାର୍ଯ୍ୟକ୍ରମରେ ଆସାମ ମୁଖ୍ୟମନ୍ତ୍ରୀ ସର୍ବାନନ୍ଦ ସୋନୋଓ୍ବାଲ, ମେଘାଳୟ ମୁଖ୍ୟମନ୍ତ୍ରୀ କନ୍ରାଡ କେ ସଙ୍ଗମା, ନାଗାଲାଣ୍ଡ ମୁଖ୍ୟମନ୍ତ୍ରୀ ନୈଫିଉ ରିଓ, ଓ୍ବାଇ ପାଟନ, ତ୍ରିପୁରା ମୁଖ୍ୟମନ୍ତ୍ରୀ ବିପ୍ଳବ ଦେବ୍, ମଣିପୁର ମୁଖ୍ୟମନ୍ତ୍ରୀ ଏନ୍. ବୀରେନ ସିଂ, ଭାଜପା ସାଧାରଣ ସମ୍ପାଦକ ରାମ ମାଧବ ପ୍ରମୁଖ ଯୋଗଦେଇଥିଲେ। ଖଣ୍ଡୁଙ୍କ ନୂଆ କ୍ୟାବିନେଟରେ ପୂର୍ବ ମନ୍ତ୍ରିମଣ୍ଡଳର ୬ ଜଣ ମନ୍ତ୍ରୀଙ୍କୁ ସାମିଲ କରାଯାଇଛି। ସେମାନେ ହେଲେ ଚୌନା ମୈନ, ଓ୍ବାଙ୍ଗକି ଲୋଓ୍ବାଙ୍ଗ, ହୋନ୍ଚୁନ୍ ଗଣ୍ଡମ୍, କାମଲୁଙ୍ଗ ମୋସାଙ୍ଗ, ଅଲୋ ଲିବାଙ୍ଗ ଏବଂ ବାମାଙ୍ଗ ଫେଲିକ୍ସ। ଏହାବ୍ୟତୀତ ପୂର୍ବରୁ ଉପବାଚସ୍ପତି ଥିବା ଟୁମକେ ବାଗ୍ରାଙ୍କୁ ମଧ୍ୟ ମନ୍ତ୍ରିମଣ୍ଡଳରେ ସ୍ଥାନ ମିଳିଛି।
ପେମା ଖଣ୍ଡୁ ହେଉଛନ୍ତି ଅରୁଣାଚଳ ପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଦୋର୍ଜି ଖଣ୍ଡୁଙ୍କ ପୁଅ। ୨୦୧୧ ହେଲିକପ୍ଟର ଦୁର୍ଘଟଣାରେ ଦୋର୍ଜିଙ୍କ ପରଲୋକ ହୋଇଥିଲା। କ୍ରୀଡା ଓ ସଙ୍ଗୀତ ପ୍ରତି ଆଗ୍ରହୀ ଥିବା ପେମା ଖଣ୍ଡୁ ଅରୁଣାଚଳପ୍ରଦେଶ ରାଜନୀତିରେ ସ୍ବତନ୍ତ୍ର ସ୍ଥାନ ହାସଲ କରିପାରିଛନ୍ତି। ଏହି ଉତ୍ତରପୂର୍ବାଞ୍ଚଳ ରାଜ୍ୟରେ ପଦ୍ମ ଫୁଟାଇବାରେ ତାଙ୍କର ବଡ଼ ଭୂମିକା ରହିଛି। ପେମା ପ୍ରଥମେ ନୋବୁମ ତୁକିଙ୍କ ସରକାରରେ ଜଳସମ୍ପଦ ମନ୍ତ୍ରୀ ଭାବେ ଯୋଗଦେଇଥିଲେ। ୨୦୧୬ ଜୁଲାଇରେ ସେ ପ୍ରଥମେ ମୁଖ୍ୟମନ୍ତ୍ରୀ ଭାବେ ଦାୟିତ୍ୱ ଗ୍ରହଣ କରିଥିଲେ। ୫ ମାସ ମଧ୍ୟରେ ସେ ଓ ତାଙ୍କ ମନ୍ତ୍ରିମଣ୍ଡଳ ଦୁଇ ଥର ଦଳବଦଳ କରି କଂଗ୍ରେସରୁ ପିପୁଲ୍ସ ପାର୍ଟି ଅଫ୍ ଅରୁଣାଚଳ ଏବଂ ପରେ ଭାଜପାକୁ ଯାଇଥିଲେ।
