କଣ୍ଟେଣ୍ଟ କ୍ରିଏଟର ଭାବରେ ନିଜର ଏକ ସ୍ବତନ୍ତ୍ର ପରିଚୟ ସୃଷ୍ଟି କରିଥିବା ନିହାରିକା ଏନଏମ ଅଭିନେତା ରାଘବ ଜୁୟାଲଙ୍କ ସହ ‘ଭାଇ ତେରା ଷ୍ଟାର ହୈ’ ଜରିଆରେ ହିନ୍ଦୀ ଚଳଚ୍ଚିତ୍ରରେ ଡେବ୍ୟୁ କରିବାକୁ ଯାଉଛନ୍ତି। ଏହି ମଧ୍ୟରେ ନିହାରିକା ନିଜ କ୍ୟାରିୟରକୁ ନେଇ ବଡ଼ ଖୁଲସା କରିଛନ୍ତି। ଏହାପୂର୍ବରୁ ତାଙ୍କୁ ଅନେକ ଫିଲ୍ମର ଅଫର୍ ଆସିଥିଲା କିନ୍ତୁ ସେ ଇଣ୍ଟିମେଟ୍ ସିନ୍(ଅନ୍ତରଙ୍ଗ ଦୃଶ୍ୟ)ଯୋଗୁ କରିବାକୁ ମନା କରିଦେଇଥିଲେ। କାରଣ ସେ ବୋଲ୍ଡ ଦୃଶ୍ୟ କରିବା ପାଇଁ ଆରାମଦାୟକ ନୁହନ୍ତି।
ନିହାରିକା ଏନଏମ ତାମିଲ ଚଳଚ୍ଚିତ୍ର ‘ପେରୁସ’ ସହିତ ତାଙ୍କର ଅଭିନୟ ଯାତ୍ରା ଆରମ୍ଭ କରିଥିଲେ। ପରବର୍ତ୍ତୀ ସମୟରେ ସେ ‘ମିତ୍ରା ମଣ୍ଡଳୀ’ ଏବଂ ‘ଇଧାୟମ ମୁରଲୀ’ ଭଳି ପ୍ରୋଜେକ୍ଟରେ କାମ କରିଥିଲେ। ବର୍ତ୍ତମାନ ସେ ତାଙ୍କର ବଲିଉଡ ଡେବ୍ୟୁ ପାଇଁ ପ୍ରସ୍ତୁତ ହେଉଛନ୍ତି।
ନିଜ ବଲିଉଡ ଯାତ୍ରାକୁ ନେଇ ନିହାରିକା କହିଛନ୍ତି, ଜଣେ ନବାଗତଙ୍କ ଭାବେ ମୋର ଏହି ଯାତ୍ରା ଚ୍ୟାଲେଞ୍ଜିଂ ଥିଲା। ଇଣ୍ଟିମେଟ୍ ସିନ୍ ପାଇଁ ମୁଁ ଅନେକ ଫିଲ୍ମ ପ୍ରତ୍ୟାଖ୍ୟାନ କରିଥିଲି। ମୁଁ ତିନି ବର୍ଷ ପାଇଁ ଏକ ପ୍ରଡକ୍ସନ ହାଉସରେ ତାଲିମ ନେଇଥିଲି। ମୁଁ ଜାଣି ନ ଥିଲି ଏହି ଯାତ୍ରା ଏତେ ଲମ୍ବା ହେବ। କିନ୍ତୁ ପଛକୁ ଫେରି ଚାହିଁଲେ, ଏହା ସବୁ ଏବେ ମଜାଦାର ମନେହୁଏ।
ନିହାରିକାଙ୍କ ଆଗାମୀ ଫିଲ୍ମ ‘ଭାଇ ତେରା ଷ୍ଟାର ହୈ’ ଜୁଲାଇ ୩୦ରେ ସିନେମା ଘରେ ମୁକ୍ତିଲାଭ କରୁଛି। ବିବେକ ବି. ଅଗ୍ରୱାଲଙ୍କ ନିର୍ଦ୍ଦେଶିତ ଏହି କମେଡି-ଡ୍ରାମାରେ ସଞ୍ଜୟ କପୁର ଏବଂ ନିକ୍କି ୱାଲିଆ ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକାରେ ଅଛନ୍ତି।
Dharitri – Odisha’s No.1 Odia Daily
