ମୁମ୍ବାଇ: ବଲିଉଡ୍ ନାୟିକା ଅନୁଷ୍କା ଶର୍ମା ଭାରତୀୟ କ୍ରିକେଟ ଦଳର କ୍ୟାପଟେନ ବିରାଟ କୋହଲି ଏବେ ଖୁବ୍ ଚର୍ଚ୍ଚାରେ। କାରଣ ନିକଟରେ ଅନୁଷ୍କା ମା’ ହେବା ଖବର ବିରାଟ ଜଣାଇବା ପରେ ଏବେ ଏମାନଙ୍କୁ ନେଇ ଚର୍ଚ୍ଚା ଜାରି ରହିଛି। ଏମାନଙ୍କ ପ୍ରଶଂସକଙ୍କର ସବୁଠାରୁ ବେଶୀ ଦୃଷ୍ଟି ଆକର୍ଷଣ କରିଛି ଅନୁଷ୍କା ଶର୍ମା ଯେଉଁ ଡ୍ରେସ୍ ପିନ୍ଧି ମା’ ହେବା ଖବରର ଫଟୋଟି ଶେୟାର କରିଛନ୍ତି। ଏହାକୁ ଏକ ଚମତ୍କାରୀ ପୋଷାକ ବୋଲି କୁହାଯାଉଛି। କାରଣ ହେଉଛି ନିକଟରେ ହାର୍ଦ୍ଦିକ ପାଣ୍ଡ୍ୟାଙ୍କ ପତ୍ନୀ ନତାଶା ବି ଏହି ଡ୍ରେସ୍ରେ ନଜର ଆସିଥିଲେ। ସେଥିପାଇଁ ଏହି ଡ୍ରେସକୁ ଚମତ୍କାରୀ ବୋଲି କୁହାଯାଉଛି। କାରଣ ନତାଶା ନିକଟରେ ମା’ ହୋଇଛନ୍ତି। ତେଣୁ ଏହି ପୋଷାକର ଗର୍ଭଧାରଣ ସହ କିଛି ସ୍ବତନ୍ତ୍ର ସମ୍ପର୍କ ରହିଛି ବୋଲି କୁହାଯାଉଛି। ବ୍ଲାକ କଲରରେ ଧଳା ଡଟ୍ସ ଥିବା ଏହି ଡ୍ରେସ ଏବେ ବିରୁଷ୍କାଙ୍କ ପ୍ରଶଂସକଙ୍କୁ ବେଶ୍ ଆକର୍ଷିତ କରିଛି। କେବଳ ଏହାର ଚମତ୍କାରିତା ପାଇଁ ନୁହେଁ ଏବେ ଏହି ପୋଷାକଟି ତା’ର ଦାମକୁ ନେଇ ମଧ୍ୟ ଚର୍ଚ୍ଚାକୁ ଆସିଛି। ଏହା ଏକ ଅଷ୍ଟ୍ରେଲିଆ ବ୍ରାଣ୍ଡ ଲାବେଲ ନିକୋଲସର ହୋଇଥିବା ବେଳେ କୁହାଯାଉଛି କି ଅନୁଷ୍କାଙ୍କ ଏହି ଡ୍ରେସର ଦାମ କୁଆଡେ ୪୫ ହଜାର ଟଙ୍କା। ସୂଚନାଯୋଗ୍ୟ, ନିକଟରେ ଏହି ଡ୍ରେସ ପିନ୍ଧି ଅନୁଷ୍କା ବିରାଟଙ୍କ ସହ ଏକ ଫଟୋ ଶେୟାର କରିବା ସହ ଲେଖିଥିଲେ, ଏବେ ଆମେ ୨ରୁ ୩ ହେବାକୁ ଯାଉଛୁ। ଏହାପରେ ସେମାନଙ୍କ ନିକଟକୁ ପ୍ରଶଂସକଙ୍କ ଶୁଭେଚ୍ଛାର ସୁଅ ଛୁଟୁଛି।
