ସ୍ବାଧୀନତା ମଣିଷର ଜନ୍ମସିଦ୍ଧ ଅଧିକାର। ପରାଧୀନତାର ଅଭିଶପ୍ତ ଜୀବନ ଜିଉଁଥିବା ଲୋକଟିଏ ହିଁ ବୁଝିପାରେ ଏହାର ପ୍ରକୃତ ମୂଲ୍ୟ କେତେ। ପରାଧୀନତା ବେଡିରେ ଅଣନିଃଶ୍ୱାସୀ ହୋଇପଡ଼ିଥିବା ମଣିଷ ଯେତେବେଳେ ସ୍ବାଧୀନତା ଦାବି କରେ, ସେତେବେଳେ ଆରମ୍ଭ ହୁଏ ସଂଗ୍ରାମ। ମୁକ୍ତିର ଆନନ୍ଦ ପାଇଁ ବଳିଦାନ ଦେବାକୁ ପଛାଏ ନାହିଁ ସେ। ସ୍ବାଧୀନତା ସଂଗ୍ରାମର ଲହୁଲୁହର ଇତିହାସ ହିଁ ଏମିତି। ୨୦୦ ବର୍ଷର ବ୍ରିଟିଶ ଶାସନର ଶୃଙ୍ଖଳ ଛିଣ୍ଡାଇବାକୁ ଭାରତବାସୀଙ୍କୁ ଲାଗିଯାଇଥିଲା ଅନେକ ବର୍ଷ। ଭାରତ ସ୍ବାଧୀନ ହୋଇଛି। ୨୦୨୦ ଅଗଷ୍ଟ ୧୫ରେ ଦେଶବାସୀ ପାଳୁଛନ୍ତି ୭୪ତମ ସ୍ବାଧୀନତା ଦିବସ। ହେଲେ କେବଳ ଭାରତ ନୁହେଁ, ଅନ୍ୟ ୫ ଦେଶ ମଧ୍ୟ ଏହି ଦିନ ବାରିଥିଲେ ସ୍ବାଧୀନତାର ସ୍ବାଦ।
ଦକ୍ଷିଣ କୋରିଆ: ୧୯୪୫ ଅଗଷ୍ଟ ୧୫ରେ ଜାପାନଠାରୁ ସ୍ବାଧୀନତା ହାସଲ କରିଥିଲା ଦକ୍ଷିଣ କୋରିଆ। ଏହାପଛରେ ପ୍ରମୁଖ ଭୂମିକା ନିଭାଇଥିଲେ ଆମେରିକା ଏବଂ ରୁଷିଆ। ଏହି ଦିବସକୁ ଦକ୍ଷିଣ କୋରିଆବାସୀ ଛୁଟିଦିନ ଭାବେ ପାଳନ କରିଥାନ୍ତି। ଏହି ଅବସରରେ ନୃତ୍ୟସଙ୍ଗୀତର କାର୍ଯ୍ୟକ୍ରମ ମଧ୍ୟ ଅନୁଷ୍ଠିତ ହୋଇଥାଏ।
ଉତ୍ତର କୋରିଆ: ଜାପାନ ଶାସନାଧୀନ ଉତ୍ତର କୋରିଆ ମଧ୍ୟ ଅଗଷ୍ଟ ୧୫ରେ ପାଳିଥାଏ ସ୍ବାଧୀନତା ଦିବସ। ଏହି ଦିନକୁ ଉତ୍ତର କୋରିଆର ଜନସାଧାରଣ ଜାତୀୟତା ଦିବସ ଭାବେ ପାଳନ କରିଥାନ୍ତି। ଦେଶର ସ୍ବାଧୀନତା ଦିବସକୁ ସ୍ମରଣୀୟ କରିବାକୁ ଏହି ଦିନ ଅନେକେ ବିବାହ ବନ୍ଧନରେ ଆବଦ୍ଧ ହେବା ପରମ୍ପରା ପ୍ରଚଳିତ।
ବାହାରିନ୍: ୧୯୭୧ ଅଗଷ୍ଟ ୧୫ରେ ବିଟିଶ ଶାସନରୁ ନିଜକୁ ମୁକ୍ତ ଘୋଷଣା କରିଥିଲା ଆରବୀୟ ଦେଶ ବାହାରିନ୍। ଯଦିଓ ଏଠାରୁ ୧୯୬୦ ପରବର୍ତ୍ତୀ ସମୟରୁ ହିଁ ବ୍ରିଟିଶ ସେନା ବାହିନୀର ଅପସାରଣ ଆରମ୍ଭ ହୋଇଯାଇଥିଲା ତଥାପି ଅଗଷ୍ଟ ୧୫ରେ ହିଁ ବ୍ରିଟେନ ଏବଂ ବାହାରିନ୍ ମଧ୍ୟରେ ସ୍ବାଧୀନତାର ଚୁକ୍ତ ହୋଇଥିଲା। ତେବେ ବାହାରିନ୍ ନିଜର ନ୍ୟାଶନାଲ ହଲିଡେ’ ଅଗଷ୍ଟ ୧୬ରେ ପାଳନ କରେ। ଏହି ଦିନ ବାହାରିନ୍ ଶାସକ ଇସା ବିନ୍ ସଲମାନ ଅଲ୍ ଖଲିଫାଙ୍କୁ ଶାସନ ଗାଦି ମିଳିଥିଲା।
କଙ୍ଗୋ: ୧୮୮୦ରୁ ଫ୍ରାନ୍ସ ଅଧୀନ ହୋଇ ରହିଥିଲା ଆଫ୍ରିକୀୟ ରାଷ୍ଟ୍ର କଙ୍ଗୋ। କଙ୍ଗୋବସୀଙ୍କ ଦାବି ଆଗରେ ଶେଷରେ ଫ୍ରାନ୍ସକୁ ମଥାନତ କରିବାକୁ ପଡ଼ିଥିଲା। ଦୀର୍ଘଦିନର ସଂଗ୍ରାମ ପରେ ୧୯୬୦ ଅଗଷ୍ଟ ୧୫ରେ କଙ୍ଗୋକୁ ମିଳିଥିଲା ସ୍ବାଧୀନତା। ଏଥିପୂର୍ବରୁ ଏହି ଦେଶ ‘ଫ୍ରାନ୍ସ କଙ୍ଗୋ’ ନାମରେ ପରିଚିତ ଥିଲା। ୧୯୦୩ରେ ଏହାକୁ ‘ମିଡିଲ କଙ୍ଗୋ’ ଏବଂ ସ୍ବାଧୀନତା ହାସଲ କରିବା ପରେ ଏହାର ନାମ ରଖାଯାଇଥିଲା ‘ରିପବ୍ଲିକ୍ ଅଫ୍ କଙ୍ଗୋ’।
ଲିକ୍ଟେନଷ୍ଟାଇନ୍: ପୃଥିବୀର କ୍ଷୁଦ୍ର ରାଷ୍ଟ୍ରମାନଙ୍କ ମଧ୍ୟରେ ଲିକ୍ଟେନଷ୍ଟାଇନ୍ ଅନ୍ୟତମ। ଏହି ଦେଶ ୧୮୬୬ ଅଗଷ୍ଟ ୧୫ରେ ଜର୍ମାନୀଠାରୁ ସ୍ବାଧୀନତା ହାସଲ କରିଥିଲା। ତେବେ ୧୯୪୦ ଅଗଷ୍ଟ ୧୫ରୁ ଲିକ୍ଟେନଷ୍ଟାଇନ୍ ସ୍ବାଧୀନତା ଦିବସ ପାଳନ କରି ଆସୁଛି।
