ପୁରୀ ଅଫିସ,୨୬ା୫: ଆଶ୍ୱସ୍ତି ହୋଇଛନ୍ତି ପୁରୀ ଜେଲ୍ କର୍ତ୍ତୃପକ୍ଷ। ଜଣେ ଅଭିଯୁକ୍ତ ଜେଲ୍କୁ ଆସିବା ପରେ କରୋନା ଆକ୍ରାନ୍ତ ଚିହ୍ନଟ ହେବା ନେଇ ଚିନ୍ତାରେ ପଡ଼ିିଥିଲେ ଅନ୍ୟ ବିଚାରାଧୀନ କଏଦୀ ଏବଂ ଜେଲ୍ କର୍ମଚାରୀ। ତେଣୁ ସମ୍ପୃକ୍ତ ଅଭିଯୁକ୍ତଙ୍କ ସଂସ୍ପର୍ଶରେ ଆସିଥିବା ୭ ବିଚାରାଧୀନ କଏଦୀ ଓ ୫ ଜେଲ୍ କର୍ମଚାରୀଙ୍କ କରୋନା ଟେଷ୍ଟ ଲାଗି ସ୍ବାବ ନମୁନା ସଂଗ୍ରହ କରାଯାଇ ପଠାଯାଇଥିଲା। ସମସ୍ତଙ୍କ ରିପୋର୍ଟ ନେଗେଟିଭ ରହିଥିବା ଜେଲର ଦିଲୀପ କୁମାର ଜେନା କହିଛନ୍ତି। ସମ୍ପୃକ୍ତ ଅଭିଯୁକ୍ତ ଜେଲ୍କୁ ଆସିବା ପରେ ତାଙ୍କୁ ଗେଟ୍ରେ ରିସିଭ କରିଥିବା, ସର୍ଚ୍ଚ କରିଥିବା ଏବଂ ସେଲ୍କୁ ଆଣିଥିବା ୫ କର୍ମଚାରୀଙ୍କ ସ୍ବାବ ସଂଗ୍ରହ କରାଯାଇଥିଲା। ସେହିପରି ଅଭିଯୁକ୍ତ ଯେଉଁ ରୁମ୍ରେ ରହୁଥିଲେ ତାଙ୍କ ସହିତ ଥିବା ଅନ୍ୟ ୭ ବିଚାରାଧୀନ କଏଦୀଙ୍କ ସ୍ବାବ୍ ସଂଗ୍ରହ କରାଯାଇ ପରୀକ୍ଷା ପାଇଁ ପଠାଯାଇଥିଲା। ସୋମବାର ରିପୋର୍ଟ ମିଳିବା ପରେ ସମସ୍ତଙ୍କ ନେଗେଟିଭ ରହିଛି ବୋଲି ସୂଚନା ମିଳିଛି। ସୂଚନାଥାଉ କି, ଏକ ଚୋରି ମାମଲାରେ ଗିରଫ ଯୁବକଙ୍କୁ କୁମ୍ଭାରପଡ଼ା ପୋଲିସ ଗିରଫ କରି କୋର୍ଟ ଚାଲାଣ କରିଥିଲା। ସମ୍ପୃକ୍ତ ଅଭିଯୁକ୍ତଙ୍କ କରୋନା ଆକ୍ରାନ୍ତ ବୋଲି ଜଣାପଡ଼ିିବା ପରେ କୁମ୍ଭାରପଡ଼ା ଆଇଆଇସିଙ୍କ ସମେତ ପ୍ରାୟ ୩୦ କର୍ମଚାରୀ କ୍ବାରାଣ୍ଟାଇନରେ ରହିଥିଲେ। ସମସ୍ତଙ୍କର ସ୍ବାବ୍ ନମୁନା ସଂଗ୍ରହ କରାଯାଇଥିଲା। ସମସ୍ତଙ୍କ ରିପୋର୍ଟ ନେଗେଟିଭ ଆସିଥିଲା।
