ଅନୁଗୋଳ ଅଫିସ, ୧୭।୫- କରୋନା ବିରୋଧରେ ଲଢ଼େଇ କରୁଥିବା ପ୍ରତିଟି ଯୋଦ୍ଧାଙ୍କ ପାଇଁ ସହଯୋଗର ହାତ ବଢ଼ାଇଛି ଅନୁଗୋଳସ୍ଥିତ ଜିନ୍ଦଲ ଷ୍ଟିଲ ଆଣ୍ଡ ପାୱାର ଲିମିଟେଡ (ଜେଏସ୍ପିଏଲ୍)। କମ୍ପାନୀର ସାମାଜିକ ଦାୟିତ୍ୱବୋଧ ବିଭାଗ ଭାବେ କାର୍ଯ୍ୟ କରୁଥିବା ଜେଏସ୍ପିଏଲ୍ ଫାଉଣ୍ଡେଶନ ପକ୍ଷରୁ କୋଭିଡ-୧୯କୁ ପରାସ୍ତ କରିବା ପାଇଁ ଉଦ୍ଦ୍ୟମ ଆରମ୍ଭ କରାଯାଇଛି। ବିଶେଷକରି ଅନୁଗୋଳ ଜିଲାର ତୃଣମୂଳସ୍ତରରେ କାମ କରୁଥିବା ୧୬୫୪ଟି ଅଙ୍ଗନୱାଡି କେନ୍ଦ୍ରର ୩୨୭୬ କର୍ମଚାରୀଙ୍କ ପାଇଁ ମାସ୍କ ସହ ସାନିଟାଇଜ୍ କିଟ୍ ଅନୁଗୋଳ ଜିଲାପାଳ ମନୋଜ କୁମାର ମହାନ୍ତିଙ୍କୁ ପ୍ରଦାନ କରାଯାଇଛି। କମ୍ପାନୀ ପକ୍ଷରୁ କୁହାଯାଇଛି ଯେ, ଜେଏସ୍ପିଏଲ୍ ଫାଉଣ୍ଡେଶନ ପକ୍ଷରୁ ଅନୁଗୋଳ, ବଡବିଲ ଓ ଭୁବନେଶ୍ୱରରେ ୧.୩ ଲକ୍ଷ ଲୋକଙ୍କୁ ମାସ୍କ ବଣ୍ଟନ କରାଯାଇଛି। ଶାଲୁ ଜିନ୍ଦଲଙ୍କ ନେତୃତ୍ୱରେ ଜେଏସ୍ପିଏଲ୍ ଫାଉଣ୍ଡେଶନ ଏହାର ମିଶନ ଜିରୋ ହଙ୍ଗର ଅଧୀନରେ ଏକ ଲକ୍ଷରୁ ଊର୍ଦ୍ଧ୍ୱ ପ୍ରବାସୀ ଶ୍ରମିକ ଓ ଦୁର୍ବଳ ଶ୍ରେଣୀର ବ୍ୟକ୍ତିଙ୍କ ପାଇଁ ରନ୍ଧା, ଶୁଖିଲା ଖାଦ୍ୟ ଯୋଗାଇ ଦେଉଛି। କେବଳ ଅନୁଗୋଳ ଜିଲାରେ ୫୦ ହଜାର ଭୋଜନ ପ୍ରଦାନ କରାଯାଇଛି। ଜେଏସ୍ପିଏଲ୍ ଅଧ୍ୟକ୍ଷ ନବୀନ ଜିନ୍ଦଲଙ୍କ ପ୍ରେରଣାରେ ପ୍ଲାଣ୍ଟର ଆଖପାଖରେ ଯେପରି କେହି ଭୋକିଲା ନ ରୁହନ୍ତି ସେଥିପାଇଁ ଏହି ମିଶନ ଜିରୋ ହଙ୍ଗର କାର୍ଯ୍ୟକାରୀ କରାଯାଉଥିବା କମ୍ପାନୀ ପକ୍ଷରୁ ସୂଚନା ଦିଆଯାଇଛି।
