୨ ଲୁଟେରା ଗିରଫ, ବ୍ୟାଗ ଜବତ
7:32 amJanuary 17, 2020 / 21

ବ୍ରହ୍ମପୁର ଅଫିସ,୧୭ା୧- ସରକାରୀ ରେଳବାଇ ପୋଲିସ (ଜିଆରପି)ଟ୍ରେନ ଯାତ୍ରୀଙ୍କ ବ୍ୟାଗ ଲୁଟ ଘଟଣାରେ ୨ ଲୁଟେରାଙ୍କୁ ଗିରଫ କରିଛି। ସେମାନେ ହେଲେ ସଦର ଥାନା ଅନ୍ତର୍ଗତ ଲୋଚାପଡାର ଶଙ୍କର ପାତ୍ର (୨୩) ଓ ଶେରଗଡ ଥାନା ଅନ୍ତର୍ଗତ ପନ୍ନାଡ଼ ଗ୍ରାମର ବବ୍ରୁବାହନ ବେହେରା (୩୨) ବୋଲି ଜିଆରପି ଥାନାଧିକାରୀ ସୁକାନ୍ତ ଭୋଇ ସୂଚନା ଦେଇଛନ୍ତି। ସେମାନଙ୍କ ନିକଟରୁ ଲୁଟ୍‌ ବ୍ୟାଗ ପୋଲିସ ଜବତ କରିଛି। ବ୍ୟାଗ ଭିତରେ ଗୋଟିଏ ମୋବାଇଲ ଫୋନ ୫୬୪୧ ଟଙ୍କା ଓ କେତେକ ଡ୍ରେସ୍‌ ରହିଥିଲା। ଜବତ ବ୍ୟାଗ ଯାତ୍ରୀଙ୍କୁ ଜିମା ଦେଇଥିବା ପୋଲିସ କହିଛି। ମାମଲା ନମ୍ବର ୮/୨୦ରେ ଅଭିଯୁକ୍ତଙ୍କୁ ଗୁରୁବାର କୋର୍ଟ ଚାଲାଣ କରାଯାଇଛି। ଘଟଣାରୁ ପ୍ରକାଶ, କେ.ନୂଆଗଁା ଥାନା ଅନ୍ତର୍ଗତ ଦେଖାଳି ଗ୍ରାମର ସୀମାଞ୍ଚଳ ପାଇକ ବାଙ୍ଗାଲୋରର ଏକ ଘରୋଇ କମ୍ପାନୀରେ କାମ କରନ୍ତି। ସେ ଘରକୁ ଆସିଥିବା ବେଳେ ବାଙ୍ଗାଲୋର ଯିବା ପାଇଁ ବୁଧବାର ବ୍ରହ୍ମପୁର ରେଳଷ୍ଟେଶନ ଆସିଥିଲେ। ଗୁରୁବାର ସକାଳେ ପ୍ରଶାନ୍ତି ଏକ୍ସପ୍ରେସରେ ଯିବା ପାଇଁ ସ୍ଥିର କରିଥିଲେ। ରାତିରେ ରେଳଷ୍ଟେଶନର ଯାତ୍ରୀ ବିଶ୍ରାମାଗାରରେ ଶୋଇଥିବା ବେଳେ ତାଙ୍କ ବ୍ୟାଗଟିକୁ ୨ ଜଣ ଯୁବକ ଲୁଟି ନେଇଯାଇଥିଲେ। ସୀମାଞ୍ଚଳ ପାଟି କରିଥିବା ବେଳେ ରେଳଷ୍ଟେଶନରେ ପାଟ୍ରୋଲିଂ କରୁଥିବା ଜିଆରପି ଓ ରେଳ ସୁରକ୍ଷା ବଳ ପୋଲିସ ଉଭୟ ଲୁଟେରାଙ୍କୁ କାବୁ କରି ଜିଆରପି ଥାନାରେ ରଖି ଜେରା କରିଥିଲା।