ଭଞ୍ଜନଗର,୧୯।୫(ଡି.ଏନ.ଏ.)- ଭଞ୍ଜନଗର ଉତ୍ତର ଘୁମୁସର ବନଖଣ୍ଡ ଗାଲେରୀ ରେଞ୍ଜ ବେରୁଆବାଡିରୁ ବନ ବିଭାଗ କର୍ମଚାରୀ ରବିବାର ସକାଳେ ୨୫ ଘନଫୁଟ ଶାଳ ଓ ହଳନ୍ଦ କାଠ ଗଣ୍ଡି ଜବତ କରିଛି। ୨ଜଣ ଶ୍ରମିକ ଉକ୍ତ କାଠ ଏକ ତୋଟା ଭିତରେ କରତ ସହାୟତାରେ କାଟୁଥିବା ବେଳେ ବନବିଭାଗ କର୍ମଚାରୀ ଖବର ପାଇ ଚଢାଉ କରି ଗିରଫ କରିଥିଲେ। ଚଢାଉରେ ବନପାଳ ବଶିଂଧର ବିଷୋୟୀ, ମଧୁଛନ୍ଦା ଦାସ, ସୁଶାନ୍ତ ମିଶ୍ର, ପ୍ରଦ୍ୟୁମ୍ନ କୁମାର ବିଷୋୟୀ ପ୍ରମୁଖ ସାମିଲ ଥିଲେ। ପ୍ରକାଶଯେ ବେରୁଆବାଡିର ଏକ ତୋଟାରେ ଚୋରାରେ ବେନିୟମ ଭାବେ କାଠ କଟା ହେଉଥିବା ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କ ନିକଟରେ ଅଭିଯୋଗ ହୋଇଥିଲା। ବନବିଭାଗ କର୍ମଚାରୀ ଘଟଣାସ୍ଥଳରେ ଚଢାଉ କରି ସଫଳତା ପାଇଛନ୍ତି। ଅପରପକ୍ଷେ ଭାଜପା ନେତା ପ୍ରଦ୍ୟୁମ୍ନ ନାୟକ ଏଠାରେ ଅଭିଯୋଗ କରିଛନ୍ତି ଯେ, ତୁରୁମୁର ଶାସକଦଳର ଜଣେ ଯୁବନେତା ଉକ୍ତ କାଠ ଚୋରା ବ୍ୟବସାୟରେ ସାମିଲ ଅଛନ୍ତି। ବନ ବିଭାଗ ଅଧିକାରୀମାନେ ମୁଖ୍ୟ ଅଭିଯୁକ୍ତ ଉକ୍ତ ନେତାଙ୍କୁ ଛାଡ଼ି ଅନ୍ୟ ଲୋକଙ୍କୁ ବାନ୍ଧିଛନ୍ତି। ଢୋଲପିଟା ବନପାଳ ବଶିଂଧର ବିଷୋୟୀଙ୍କ ସହ ଏନେଇ ଯୋଗାଯୋଗ କରିବାରୁ ସେ କହିଛନ୍ତି ଯେ, ଅଭିଯୁକ୍ତମାନେ ଜଙ୍ଗଲରୁ କାଠ କାଟି ଆଣି ତାକୁ ସାଇଜ୍ କରୁଥିଲେ। ତେଣୁ ସେମାନଙ୍କୁ ଗିରଫ କରାଯାଇଛି। ଏହି ମାମଲାରେ ଆଉ କିଏ ଜଡ଼ିତ ନାହାନ୍ତି ବୋଲି ଗିରଫ ଅଭିଯୁକ୍ତଦ୍ୱୟ ତାଙ୍କ ବୟାନରେ କହିଛନ୍ତି। ଉକ୍ତ ମାମଲାରେ କୌଣସି ନେତାଙ୍କ ସମ୍ପୃକ୍ତିକୁ ବନପାଳ ବିଷୋୟୀ ଦୃଢ ଭାବେ ଖଣ୍ଡନ କରିଛନ୍ତି।
