କାମାକ୍ଷାନଗର, ୩ା୪(ଡି.ଏନ.ଏ.) – ଲକ୍ଡାଉନ୍ ସମୟରେ ସମସ୍ୟାରେ ସନ୍ତୁଳି ହେଉଥିବା ଇଟାଭାଟି ଶ୍ରମିକଙ୍କୁ କାମାକ୍ଷାନଗର ତହସିଲ ପ୍ରଶାସନ ପକ୍ଷରୁ ଥଇଥାନ କରାଯାଇଛି। ତହସିଲଦାର ସଞ୍ଜୟ କୁମାର ରାଉତଙ୍କ ଉଦ୍ୟମରେ ୨୪୦ ଜଣ ଶ୍ରମିକଙ୍କୁ ପୃଥକ୍ ସ୍ଥାନରେ ରଖାଯାଇଛି। ସେମାନଙ୍କୁ ଖାଦ୍ୟପାନୀୟ ଦିଆଯିବା ବ୍ୟବସ୍ଥା କରାଯିବା ସହ ଆବଶ୍ୟକ ଯତ୍ନନେବାକୁ ଭାଟି ମାଲିକଙ୍କୁ ନିର୍ଦ୍ଦେଶ ଦିଆଯାଇଛି।
କାମାକ୍ଷାନଗରରେ ଅନେକ ବେଆଇନ ଇଟାଭାଟି ଗଢ଼ିଉଠିଛି। ଇଟାଭାଟିଗୁଡ଼ିକ ଉପରେ ପ୍ରଶାସନ ପକ୍ଷରୁ ବାରମ୍ବାର ଚଢ଼ାଉ କରାଯାଉଥିଲେ ମଧ୍ୟ ଭାଟି ମାଲିକମାନେ ଲୁଚକାଳି ଖେଳ ଖେଳୁଥିଲେ। ଲକ୍ଡାଉନ୍ ପରେ ପ୍ରଶାସନ ପକ୍ଷରୁ ସମସ୍ତ ଭାଟିକୁ ସିଲ୍ କରିଦିଆଯାଇଥିଲା। ଫଳରେ ଏଠାରେ କାର୍ଯ୍ୟରତ ଶ୍ରମିକମାନେ ଦୁଇଓଳି ଖାଇବାକୁ ନ ପାଇ ନାହିଁ ନ ଥିବା ସମସ୍ୟାର ସମ୍ମୁଖୀନ ହେଉଥିଲେ। ଯାନବାହନ ଚଳାଚଳ ବନ୍ଦ ହୋଇଯାଇଥିବାରୁ ସେମାନେ ଘରକୁ ଫେରିପାରୁ ନ ଥିଲେ। ଦୟନୀୟ ଅବସ୍ଥାରେ ଥିବା ସମ୍ପୃକ୍ତ ଶ୍ରମିକଙ୍କ ପାଖରେ ତହସିଲଦାର ପହଞ୍ଚତ୍ ସହାୟତାର ହାତ ବଢ଼ାଇଥିଲେ।
ଉଦ୍ଧାର ହୋଇଥିବା ଶ୍ରମିକଙ୍କ ମଧ୍ୟରୁ ୨୧୦ ଜଣଙ୍କୁ ଆଳତୁମା ଉଚ୍ଚବିଦ୍ୟାଳୟରେ ରଖାଯାଇଛି। ଏଥିଲାଗି ସ୍କୁଲର ୧୦ ଗୃହ ଖୋଲାଯାଇଛି। ପ୍ରତି ପ୍ରକୋଷ୍ଠରେ ସାମାଜିକ ଦୂରତା ରକ୍ଷା କରିବା ଭଳି ବ୍ୟବସ୍ଥା ହୋଇଛି। ସେହିପରି ଜନ୍ତାରିବୋଲ ସେବାଶ୍ରମରେ ୩୦ଜଣ ଶ୍ରମିକଙ୍କୁ ଥଇଥାନ କରାଯାଇଛି। ଶ୍ରମିକମାନେ କାମ କରୁଥିବା ଭାଟି ମାଲିକଙ୍କୁ ସେମାନଙ୍କ ଖାଇବା ପିଇବା ବନ୍ଦୋବସ୍ତ କରିବା ସହ ଆବଶ୍ୟକ ଯତ୍ନ ନେବାକୁ ନିର୍ଦ୍ଦେଶ ଦିଆଯାଇଛି। ଏଥିସହ ଶ୍ରମିକଙ୍କ ନିୟମିତ ସ୍ବାସ୍ଥ୍ୟ ପରୀକ୍ଷା ମଧ୍ୟ କରାଯିବ ବୋଲି ତହସିଲଦାର ସୂଚନା ଦେଇଛନ୍ତି।
