ମୁମ୍ବାଇ, ୯ା୫ (ପି.ଟି.):ଚଳିତବର୍ଷ ପରବର୍ତ୍ତୀ ଭାଗରେ ଅଷ୍ଟ୍ରେଲିଆରେ ଖେଳାଯିବାକୁଥିବା ଟେଷ୍ଟ ସିରିଜରେ ଭାରତ ଯଦି ବିଜୟ ଲାଭ କରିବାକୁ ଚାହୁଛି ତେବେ ବିପକ୍ଷ ଦଳର ରନ୍ ମେସିନ୍ ଷ୍ଟିଭ୍ ସ୍ମିଥ୍ ଓ ଡେଭିଡ୍ ଓ୍ବାର୍ନରଙ୍କୁ ଶୀଘ୍ର ଆଉଟ କରିବାକୁ ପଡ଼ିବ। ଏକଥା କହିଛନ୍ତି ଅଷ୍ଟ୍ରେଲିଆର ମହାନ କ୍ରିକେଟର ଇଆନ ଚାପେଲ। କୋଭିଡ୍-୧୯ ମହାମାରୀ ଯଦି ନିୟନ୍ତ୍ରଣକୁ ଚାଲି ଆସେ ତେବେ ବହୁ ପ୍ରତିକ୍ଷିତ ସିରିଜ
ଠିକଣା ସମୟରେ ହେବ। ଏହି ଦୁଇ ଖେଳାଳିଙ୍କ ଉପସ୍ଥିତି ଯୋଗୁ ଆୟୋଜକ ଫାଇଦାରେ ରହିବ ବୋଲି ପୂର୍ବତନ ଅଷ୍ଟ୍ରେଲିଆ ଅଧିନାୟକ ପ୍ରକାଶ କରିଛନ୍ତି। ଭାରତ-ଅଷ୍ଟ୍ରେଲିଆ ସିରିଜ ଆକର୍ଷଣୀୟ ହେବ ବୋଲି ମୋର ବିଶ୍ୱାସ। ଗତ ଥର ଟୁର୍ରେ ଆସିଥିବା ବେଳେ ବିଜୟ ସହ ଫେରିଥିବାରୁ ଭାରତୀୟ ଦଳ ଆତ୍ମବିଶ୍ୱାସର ସହ ଆସିବ ବୋଲି ଚାପେଲ ଏକ ଟିଭି ଚ୍ୟାନେଲକୁ ସାକ୍ଷାତ୍କାର ଦେଇ କହିଛନ୍ତି। ୭୬ ବର୍ଷୀୟ ପୂର୍ବତନ କ୍ରିକେଟର କହିଛନ୍ତି, ଅଷ୍ଟ୍ରେଲିଆ ଦଳକୁ ସ୍ମିଥ୍ ଓ ଓ୍ବାର୍ନର ଫେରିଥିବାରୁ ଭାରତକୁ ଏଥର ମ୍ୟାଚ ଜିତିବା ସହଜ ହେବ ନାହିଁ। କିନ୍ତୁ ଅଷ୍ଟ୍ରେଲିଆ କଣ୍ଡିଶନରେ କିଭଳି ଖେଳିବାକୁ ହେବ ସେ ସେଥିପାଇଁ ଭାରତ ପ୍ରସ୍ତୁତ ହୋଇ ଆସିବ ନିଶ୍ଚୟ। ୨୦୧୮-୧୯ ଡାଉନ୍ ଅଣ୍ଡରରେ ଭାରତ ବିରାଟ କୋହଲିଙ୍କ ନେତୃତ୍ୱରେ ୭ ଦଶନ୍ଧିରେ ପ୍ରଥମ ଟେଷ୍ଟ ସିରିଜ ଜିତି ଇତିହାସ ସୃଷ୍ଟି କରିଥିଲା। ତେବେ ସେତେବେଳେ ଅଷ୍ଟ୍ରେଲିଆ ଦଳରେ ଏହି ଦୁଇ ବିସ୍ଫୋରକ ବ୍ୟାଟ୍ସମ୍ୟାନ ଓ୍ବାର୍ନର ଓ ସ୍ମିଥ୍ ନ ଥିଲେ। ଦୁଇ ଖେଳାଳି ସେତେବେଳେ ବଲ୍ ଟ୍ୟାମ୍ପରିଂ ଅଭିଯୋଗରେ ବାସନ୍ଦ ଦଣ୍ଡ ଭୋଗୁଥିଲେ। ଅଷ୍ଟ୍ରେଲିଆର ବୋଲିଂ ଆକ୍ରମଣ ବେଶ୍ ଶକ୍ତିଶାଳୀ। ନିଜ ଦେଶରେ ଏହି ଦଳକୁ ପରାସ୍ତ କରିବା ସହଜ ନୁହେଁ ବୋଲି ଚାପେଲ କହିଛନ୍ତି।
