ଜଗତସିଂହପୁର ଅଫିସ,୨୯ା୧୨: ସମ୍ପ୍ରତ୍ତି ପାଠାଗାର ଆନ୍ଦୋଳନକୁ ଗଣ ଆନ୍ଦୋଳନରେ ପରିଣତ କରିବାକୁ ପଡିବ। କାରଣ ପାଠାଗାର ଗରିଷ୍ଠ ହେଲେ ବିଭେଦକାରୀ ଶକ୍ତିଗୁଡିକ ଦୁର୍ବଳ ହେବ। ଯେଉଁ ଦେଶର ସଂସ୍କୃତି ଯେତେ ପରିପୃଷ୍ଠ ସେ ଦେଶ ସେତିକି ସମୃଦ୍ଧ। ଜର୍ମାନୀର ସଂସ୍କୃତି ପାଠାଗାର ଆନ୍ଦୋଳନ ଯୋଗୁ ବିଶ୍ୱରେ ସଶକ୍ତ ହୋଇ ପାରିଛି। ଶନିବାର ସ୍ଥାନୀୟ ସଂସ୍କୃତି ଭବନ ପରିସରରେ ସାରସ୍ବତ ବାତାୟନର ତୃତୀୟ ସାହିତ୍ୟ ଆସରରେ ଯୋଗଦେଇ ବରିଷ୍ଠ ପ୍ରଶାସକ ତଥା ପାଠାଗାର ଆନ୍ଦୋଳନର ଅନନ୍ୟ ପ୍ରବକ୍ତା ପ୍ରସନ୍ନ କୁମାର ଦାସ ଏହା କହିଛନ୍ତି। ସେ କହିଥିଲେ, ହିଟଲର ଯେତେବେଳେ ବିଶ୍ୱର କୌଣସି ଦେଶକୁ ନିଜ ନିୟନ୍ତ୍ରଣକୁ ନେବାକୁ ଚାହୁଁଥିଲେ ପ୍ରଥମେ ସେ ଦେଶର ସଂସ୍କୃତିକୁ ନଷ୍ଟ କରିବାକୁ ଚେଷ୍ଟା କରୁଥିଲେ। ଅପସଂସ୍କୃତି ପୁରାଇ ଲୋକଙ୍କ ମଧ୍ୟରେ ଥିବା ବନ୍ଧନକୁ ତୁଟାଉଥିଲେ। ସେହିପରି ଯିଏ ସାହିତ୍ୟ ରଥି ହେବେ ସେ ମରୁଭୂମିରୁ ମରୁଦ୍ୟାନର ସନ୍ଧାନ କରିଥାନ୍ତି। ବିନା କଷ୍ଟରେ କେହି ସାହିତ୍ୟ କିମ୍ବା କୌଣସିଥିରେ ସଫଳତା ପାଇ ନ ଥାନ୍ତି। ଯେଉଁ ଓଟ କଣ୍ଟାର ଆଘାତରେ କ୍ଷତାକ୍ତ ହୋଇନି ସେ କେବେ ମରୁଝରର ସନ୍ଧାନ ପାଇନାହିଁ। ଓଡ଼ିଶାର ସଂସ୍କୃତି ବଞ୍ଚତ୍ଛି ତାର ରୀତିନୀତି, ଢ଼ଗଢ଼ମାଳି, ପଲ୍ଲୀଗୀତି, ନବବଧୁର ପଣତ କାନିରେ ଓ ନଈ ତୁଠର ଟାହିଟାପରାରେ, ଆଇ ମାର ପଣତ କାନିରେ, ପାନଖିଆ ଅଜାର ବଟୁଆ ଭିତରେ। ଜନଜୀବନର ମୂଳ ଆଧାର ହେଉଛି ଜଗନ୍ନାଥ ସଂସ୍କୃତି। ଓଡ଼ିଆର ଏତିହ୍ୟ, ପରମ୍ପରା, ସଂସ୍କୃତିକୁ ଯେତେବେଳେ କେହି ଅବନତ କରିବାକୁ ଚେଷ୍ଟା କରିଛି ସେତେେବେଳେ ତାହା ନୂଆ ରୂପରେ ନୂଆ ତେଜରେ ପୁନଃ ଆତ୍ମ ପ୍ରକାଶ କରିଛି। କାହିଁକି ନା ଆମ ଅତୀତର ଐତିହ୍ୟ ସୁସଂହତ ଓ ଗରିମାମୟ ବୋଲି ଦାସ କହିଥିଲେ। ଆସର ଉତ୍ସର୍ଗ ହୋଇଥିଲା ଜିଲାର ଯୋଗଜନ୍ମା ଧୂଳି ମାଟିର ସନ୍ଥ ଗୋପବନ୍ଧୁ ଚୌଧୁରୀଙ୍କ ଉଦ୍ଦେଶ୍ୟରେ। ସାରସ୍ବତ ଆସରର ଶୀର୍ଷକ ଥିଲା ସଂସ୍କୃତି ଓ ସ୍ବାଭିମାନ। ଜିଲାପାଳ ସଂଗ୍ରାମ କେଶରୀ ମହାପାତ୍ର ପାଠାଗାର ଆନ୍ଦୋଳନକୁ ଜିଲାରେ ବ୍ୟାପକ କରିବାର ଲକ୍ଷ୍ୟନେଇ ଜିଲାର ସମସ୍ତ ବିଦ୍ୟାଳୟରେ ଲାଇବ୍ରେରିକୁ ସୁସଙ୍ଗଠିତ କରି ପୁସ୍ତକ ପଠନ ପ୍ରତି ଆକର୍ଷଣ ବୃଦ୍ଧି ପାଇଁ ପ୍ରୟାସ ଜାରି ରହିଥିବା କହିଥିଲେ। ଅତିରିକ୍ତ ଜିଲାପାଳ ସଚିଦାନନ୍ଦ ସାହୁ ପାଠାଗାର ଜନଜୀବନକୁ ବହୁ ଭାବରେ ପ୍ରଭାବିତ କରି ଏକ ସଂସ୍କୃତି ସମ୍ପନ୍ନ ଜାତି ଗଠନ କରିଥାଏ ବୋଲି କହିବା ସହ ଶେଷରେ ଧନ୍ୟବାଦ ଦେଇଥିଲେ। ଜିଲା ବିଜ୍ଞାନ ପରିଦର୍ଶକ ସୁଭାଷ ଚନ୍ଦ୍ର ରାଉତଙ୍କ ସଂଯୋଜନାରେ ଆୟୋଜିତ ସଭାରେ ଡିଆରଡିଏ ପ୍ରକଳ୍ପ ନିର୍ଦ୍ଦେଶକ ସରୋଜକାନ୍ତ ମହାନ୍ତି, ଉପଜିଲାପାଳ ମହେନ୍ଦ୍ର ପ୍ରସାଦ ମହାନ୍ତି, ଜିଲା ସୂଚନା ଓ ଲୋକ ସମ୍ପର୍କ ଅଧିକାରୀ କାମିନୀ ରଞ୍ଜନ ପଟ୍ଟନାୟକଙ୍କ ସମେତ ଜିଲାସ୍ତରୀୟ ଅଧିକାରୀ, ସାହିତ୍ୟ ପ୍ରେମୀ, ବୁଦ୍ଧିଜୀବୀ ଓ ଜନସାଧାରଣ ଉପସ୍ଥିତ ଥିଲେ।
