ମୁମ୍ବାଇ: ଏବେ ଦେଶରେ କରୋନା ମହାମାରୀ ଚିନ୍ତାର କାରଣ ପାଲଟିଥିବା ବେଳେ ଏହି ଅଦୃଶ୍ୟ ଯୁଦ୍ଧରେ ଲଢୁଛନ୍ତି ଦେଶବାସୀ। ଏହି ସମୟରେ ବଲିଉଡ୍ ସେଲିବ୍ରିଟିମାନେ ମଧ୍ୟ ସହଯୋଗର ହାତ ବଢାଇଛନ୍ତି। ସୋନୁ ସୁଦ ଓ ସଲମାନଙ୍କ ନାଁ ଆଗରେ ଥିବା ବେଳେ ଅନ୍ୟମାନେ ମଧ୍ୟ କରୋନା ଯୁଦ୍ଧରେ ବିଜୟୀ ହେବାକୁ ସହଯୋଗ ଯୋଗାଇ ଆସିଛନ୍ତି। ୧୯୯୦ରେ ଆସିଥିବା ଫିଲ୍ମ ‘ବୀରଗତି’ରେ ସଲମାନଙ୍କ କୋ-ଷ୍ଟାର ଥିବା ପୂଜା ଡଡଓ୍ବାଲ ଏବେ ସଲମାନଙ୍କ ସାହାଯ୍ୟ ମାଗିଛନ୍ତି। ନିକଟରେ ସେ କାଶ, ସର୍ଦ୍ଦି, ଜ୍ୱର ଆଦିରେ ପୀଡ଼ିତ ଥିବା ସହ ଏସବୁ କରୋନାର ଲକ୍ଷଣ ହୋଇଥିବାରୁ ସେ ଚିନ୍ତାରେ ପଡିଯାଇଛନ୍ତି। ତେବେ କରୋନା ଟେଷ୍ଟ ପାଇଁ ତାଙ୍କ ପାଖରେ ଅର୍ଥର ଅଭାବ ରହିଥିବାରୁ ଏଥିପାଇଁ ସେ ସଲମାନଙ୍କ ସାହାଯ୍ୟ ମାଗିଛନ୍ତି। ପୂର୍ବରୁ ମଧ୍ୟ ଏହି ଅଭିନେତ୍ରୀ କାହାକାହାଠାରୁ ୫ଶହ, ୧ ହଜାର ଭଳି ଅର୍ଥ ଉଧାର ନେଇଥିବା କହିଛନ୍ତି। ଏଥର କିନ୍ତୁ ସଲମାନ ତାଙ୍କୁ ସାହାଯ୍ୟ କରିବେ ବୋଲି ସେ ଆଶା ପୋଷଣ କରିଛନ୍ତି। ପୂଜା ଆହୁରି ମଧ୍ୟ କହିଛନ୍ତି ପୂର୍ବରୁ ସଲମାନ ତାଙ୍କୁ ମୁମ୍ବାଇରେ ୬-୮ ମାସ ରଖି ଚିକିତ୍ସା କରାଇଥିଲେ। ଏହାପରେ ବି ସେ ଗୋଆ ଫେରିବା ପରେ ତାଙ୍କର ସବୁଖବର ସଲମାନ ବୁଝୁଥିଲେ ବୋଲି ସେ କହିଛନ୍ତି। ତେଣୁ ଏବେ ପୁଣିଥରେ ଅସୁବିଧାରେ ପଡିଥିବାରୁ ସେ ସଲମାନଙ୍କ ସାହାଯ୍ୟ ଲୋଡିଥିବା କହିଛନ୍ତି। ପୁଜା ଏବେ ତାଙ୍କ ସ୍ବାମୀଙ୍କ ସହ ମିଶି ଗୋଆରେ ରହୁଛନ୍ତି।
