ଗଣିଆ,୨୦ା୧(ଡି.ଏନ୍.ଏ.): ଗଣିଆ ବ୍ଲକ ପଞ୍ଚୁପଲ୍ଲୀ ପ୍ରଗଣାସ୍ଥିତ ଗୁପ୍ତେଶ୍ୱର ମହାଦେବଙ୍କ ମନ୍ଦିର ପ୍ରାଙ୍ଗଣ ପଞ୍ଚମୁଖୀ ହନୁମାନ ମନ୍ଦିର ସମ୍ମୁଖରେ ରବିବାର ବ୍ଲକ ଶିବଶକ୍ତୀ ପୂଜକ ସମାଜର ଏକ ବୈଠକ ଅନୁଷ୍ଠିତ ହୋଇଯାଇଛି। ସମାଜର ନୟାଗଡ ଜିଲା ସଭାପତି ବିକ୍ରମ ମହାପାତ୍ରଙ୍କ ସଭାପତିତ୍ୱରେ ଆୟୋଜିତ ବୈଠକରେ ଗଣିଆ, ଦଶପଲ୍ଲା, ନୂଆଗାଁ, ଖଣ୍ଡପଡା ଓ ଭାପୁର ବ୍ଲକର ଶତାଧିକ ପୂଜକ ଯୋଗଦେଇଥିଲେ। ଜିଲାସ୍ତରରେ ପୂଜକ ସମାଜର ଏକତ୍ରୀକରଣ ନେଇ ସଭାପତି ସମସ୍ତଙ୍କୁ ଆହ୍ବାନ କରିଥିଲେ। ପୂଜକ ସମାଜର ଜନସାଧାରଣ ସରକାରଙ୍କ ବିଭିନ୍ନ ଯୋଜନାରୁ ବଞ୍ଚିତ ହେଉଛନ୍ତି ବୋଲି ଅନେକ ଅଭିଯୋଗ କରିଥିଲେ। ସେମାନେ ବିଭିନ୍ନ ମନ୍ଦିରରେ ପୂଜା କରୁଥିବା ବେଳେ ଠାକୁରଙ୍କ ନାମରେ ଥିବା ଜମିଗୁଡିକ କେବଳ ଚାଷ କରି ଚଳୁଛନ୍ତି। ନିଜ ନାମରେ ଜମି ପଟ୍ଟା ନ ଥିବାରୁ ପିଲାମାନଙ୍କ ପାଇଁ ଜାତିଗତ ପ୍ରମାଣପତ୍ର ପାଇଁ ବହୁ ହଇରାଣ ହେବାକୁ ପଡୁଛି। ସେହିପରି ଘରଡିହ ପଟ୍ଟା ନ ଥିବାରୁ ବହୁ ପୂଜକ ସରକାରଙ୍କ ଇନ୍ଦିରାଆବାସରୁ ବଞ୍ଚିତ ହେଉଥିବା ନେଇ ବୈଠକରେ ଉଦ୍ବେଗ ପ୍ରକାଶ ପାଇଥିଲା। ତେବେ ଆଗାମୀ ଦିନରେ ପୂଜକ ସମାଜର ବିଭିନ୍ନ ସମସ୍ୟା ସମାଧାନ ପାଇଁ ସରକାରଙ୍କ ନିକଟରେ ଦାବି ଉପସ୍ଥାପନ କରାଯିବ ବୋଲି ସମାଜର ଜିଲା ସଭାପତି ସୂଚନା ଦେଇଛନ୍ତି। ଏହି ଅବସରରେ ସମାଜର ଜିଲା ସମ୍ପାଦକ ପ୍ରଫୁଲ୍ଲ କୁମାର ମହାପାତ୍ରଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ବ୍ଲକ ଶିବଶକ୍ତୀ ପୂଜକ ସମାଜର କର୍ମକର୍ତ୍ତା ମନୋନୟନ କରାଯାଇଥିଲା। ସଭାପତି ଭାବେ ପ୍ରଶନ୍ନ କୁମାର ରଣା, ସମ୍ପାଦକ ଯଶୋବନ୍ତ ମହାପାତ୍ର, କୋଷାଧ୍ୟକ୍ଷ ଭାବେ ବୀରେନ କୁମାର ରଣାଙ୍କ ସମେତ ୮ଜଣିଆ ପରିଚାଳନା କମିଟି ସଭ୍ୟଙ୍କୁ ମନୋନୀତ କରାଯାଇଥିଲା। ସେହିପରି ଗୁପ୍ତେଶ୍ୱର ମହାଦେବ ମନ୍ଦିର ପୂଜକ ସମାଜ ପଞ୍ଚୁପଲ୍ଲୀ ପ୍ରଗଣାର ନୂତନ କର୍ମକର୍ତ୍ତା ଚୟନ କରାଯାଇଥିଲା। ସଭାପତି ଭାବେ ଆନନ୍ଦ ଚନ୍ଦ୍ର ରଣା, ସମ୍ପାଦକ ଗଙ୍ଗାଧର ରଣାଙ୍କୁ ମନୋନୀତ କରାଯାଇଥିଲା।
