ହାଇଦ୍ରାବାଦ: ଅନ୍ୟକୁ ଦାନ କରିବା କି ସାହାଯ୍ୟ ସହଯୋଗ କରିବା ପାଇଁ ପାଖରେ ପ୍ରଚୁର ଅର୍ଥର ଆବଶ୍ୟକତା ନ ଥାଏ। ବିଶାଳ ହୃଦୟ ଥିବା ଲୋକେ ହିଁ ଅନ୍ୟକୁ ସାହାଯ୍ୟ କରିବା ପାଇଁ ଆଗେଇ ଆସିଥାନ୍ତି। ଏହାର ଏକ ଉଦାହରଣ ହେଉଛନ୍ତି ତେଲେଙ୍ଗାନା ଉଟନୁର୍ର ସଫେଇ କର୍ମଚାରୀ ବୋନ୍ଥା ସାଇ କୁମାର। କରୋନା ପୀଡ଼ିତଙ୍କୁ ସାହାଯ୍ୟ କରିବା ପାଇଁ ସେ ତାଙ୍କର ଦୁଇ ମାସର ଦରମା ମୁଖ୍ୟମନ୍ତ୍ରୀଙ୍କ ରିଲିଫ୍ ପାଣ୍ଠିକୁ ଦାନ କରିଛନ୍ତି। ସାଇ କୁମାରଙ୍କ ଏଭଳି ବଦାନ୍ୟତାକୁ ନେଇ ଏବେ ସବୁଆଡେ ଚର୍ଚ୍ଚା ହେଉଥିବା ବେଳେ ନିଜେ ମୁଖ୍ୟମନ୍ତ୍ରୀଙ୍କ ପୁଅ କେ. ଟି ରାମାରାଓ ଟ୍ବିଟ୍ କରି ତାଙ୍କର ପ୍ରଶଂସା କରିଛନ୍ତି।
କରୋନା ଲଢେଇରେ ଏଭଳି ମହାନ ଦାନ କରିଥିବା ଲୋକଙ୍କୁ ମୁଖ୍ୟମନ୍ତ୍ରୀ ଲଗାତାର ଟୁଇଟକରି ଉତ୍ସାହିତ କରୁଛନ୍ତି। ସାଇ କୁମାରଙ୍କ ଭଳି ସଫେଇ କର୍ମଚାରୀ ଦୁଇମାସର ଦରମା ଦାନ କରି ଏବେ ସମସ୍ତଙ୍କ ପାଇଁ ପ୍ରେରଣା ପାଲଟିଛନ୍ତି। ସେଇଭଳି ସିଲେଇ କରି ପରିବାର ଚଳାଉଥିବା ଗଡ଼ୱାଲ୍ ଜିଲାର ମହିଳା ଉମା ଦେବୀ ପ୍ରତିଦିନ ବିଭିନ୍ନ ଅଞ୍ଚଳର ଲୋକଙ୍କୁ ୩୫୦ରୁ ଅଧିକ ମାସ୍କ ତିଆରି କରି ବାଣ୍ଟୁଛନ୍ତି। ସେହିଭଳି ପ୍ରତିଦିନ ୪୦ଜଣ ଭୋକିଲାଙ୍କୁ ଖାଇବାକୁ ଦେଉଛନ୍ତି ତେଲେଙ୍ଗାନାର ସମାରିଥାନ୍। ମୁଖ୍ୟମନ୍ତ୍ରୀଙ୍କ ପକ୍ଷରୁ ଏଭଳି ଲୋକଙ୍କୁ ପ୍ରଶଂସା କରାଯାଇଛି।
