ପାଟନା,୨୬।୧: ବିହାର ଶିକ୍ଷା ବ୍ୟବସ୍ଥା ସବୁବେଳେ ଚର୍ଚ୍ଚାରେ ରହୁଥିବା ବେଳେ ଏବେ ସେଠାକାର ଜଣେ ଶିକ୍ଷୟିତ୍ରୀଙ୍କ ପାଠପଢା ଶୈଳୀ ଭାଇରାଲ ହେବାରେ ଲାଗିଛି। ସରକାରୀ ସ୍କୁଲର ଜଣେ ଶିକ୍ଷୟିତ୍ରୀଙ୍କ ପାଠପଢାଇବା ଶୈଳୀକୁ କେବଳ ସାଧାରଣ ଜନତା ନୁହେଁ ବଲିଉଡ୍ ଅଭିନେତା ଶାହାରୁଖ ଖାଁ ଓ ଶିଳ୍ପପତି ଆନନ୍ଦ ମହିନ୍ଦ୍ରା ମଧ୍ୟ ବେଶ୍ ପ୍ରଶଂସା କରିଛନ୍ତି। ବାଙ୍କା ଜିଲାର ବୌଶି ସ୍ଥିତ ଏକ ଉଚ୍ଚ ମାଧ୍ୟମିକ ସ୍କୁଲର ଶିକ୍ଷୟିତ୍ରୀ ରୁବି କୁମାରୀଙ୍କ ଏକ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଇଂରାଜୀରେ ସ୍ନାତକ ଡିଗ୍ରୀ ହାସଲ କରିଥିବା ରୁବି କୁମାରୀ ଇଂରାଜୀ ପଢାଇବା ସହ ପିଲାମାନଙ୍କୁ ଗଣିତ ମଧ୍ୟ ପଢାଉଛନ୍ତି। ତାଙ୍କର ଗଣିତ ପଢାଇବାର ଏକ ଭିଡିଓ ଏବେ ଭାଇରାଲ ହୋଇଛି। ୭ ଜାନୁୟାରୀ ୨୦୨୦ରେ ରୁବି କୁମାରୀ ଏହି ଭିଡିଓଟିକୁ ନିଜ ଫେସବୁକରେ ଅପଲୋଡ କରିଥିଲେ। ଏହାପରେ ଏହି ଭିଡିଓକୁ ବିଶିଷ୍ଟ ଶିଳ୍ପପତି ଆନନ୍ଦ ମହିନ୍ଦ୍ରା ଟୁଇଟ୍ କରିଥିଲେ। ମହିନ୍ଦ୍ରାଙ୍କର ଟୁଇଟ୍ ଭିଡିଓକୁ ବଲିଉଡ୍ ଅଭିନେତା ଶାହାରୁଖ ଖାଁ ରିଟୁଇଟ୍ କରବା ଫଳରେ ଏବେ ଏହା ଭାଇରାଲ ହୋଇଛି। ଉକ୍ତ ଭିଡିଓରେ ରୁବି ପିଲାମାନଙ୍କୁ ୯ର ଗୁଣନ ସମ୍ପର୍କରେ ପଢାଉଛନ୍ତି। ସେ କହିଛନ୍ତି ଆମ ହାତରେ ରହିଛି କାଲକୁଲେଟର। ତେବେ ରୁବିଙ୍କର ପାଠପଢାଇବାର ଶୈଳୀ ଏବେ ଭାଇରାଲ ହେବାରୁ ସେ କହିଛନ୍ତି, ତାଙ୍କୁ ଆଦୌ ଜଣା ନ ଥିଲା କି ଭିଡିଓଟି ଭାଇରାଲ ହେବ ବୋଲି। ପିଲାଟି ଦିନରୁ ତାଙ୍କର କିଛି ନୂଆ କରିବାର ଇଚ୍ଛା ଥିବାରୁ ସେ ଏହାକୁ ନେଇ ସବୁ ସମୟରେ ଚେଷ୍ଟା ଜାରି ରଖିଥାଆନ୍ତି। ତେବେ ରୁବିଙ୍କର ଭାଇରାଲ ଭିଡିଓକୁ ଏପର୍ଯ୍ୟନ୍ତ ପ୍ରାୟ ଏକ ଲକ୍ଷଥର ଶେୟାର କରାଯାଇଥିବା ବେଳେ ୪୨ ଲକ୍ଷ ଲୋକ ଏକାକୁ ଲାଇକ୍ କରି ସାରିଛନ୍ତି।
