ନୂଆଦିଲ୍ଲୀ,୨୫।୬: କଂଗ୍ରେସର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀଙ୍କୁ ପୁଣିଥରେ ଦଳର ଅଧ୍ୟକ୍ଷ ପଦରେ ବସାଇବାକୁ ନିକଟରେ ଅନୁଷ୍ଠିତ କଂଗ୍ରେସ ଓ୍ବାର୍କିଂ କମିଟିରେ କଥା ଉଠିଥିଲା। ଏହାପରେ ଏବେ ଶୁଣିବାକୁ ମିଳିଛି କି ରାହୁଲ ଏବେ ନିଜର ଏକ ଅନ୍ଲାଇନ୍ ଚ୍ୟାନେଲ ଆରମ୍ଭ କରିଛନ୍ତି। ମେସେଜିଂ ଆପ୍ ଟେଲିଗ୍ରାମରେ ଥିବା ତାଙ୍କର ଏହି ଚ୍ୟାନେଲ ମାଧ୍ୟମରେ ସେ ସିଧାସଳଖ ଜନତାଙ୍କ ସହ ସମ୍ପର୍କରେ ରହିପାରିବେ। ଏହି ଚ୍ୟାନେଲ ମାଧ୍ୟମରେ ସେ ତାଙ୍କ କଥା ଜନତାଙ୍କ ନିକଟରେ ପହଞ୍ଚାଇବେ। ଏହାସହ ଏହି ଚ୍ୟାନେଲର ଉଦ୍ଦେଶ୍ୟ ହେଉଛି ଲୋକଙ୍କ ସହ କଥା ହେବା। ଟେଲିଗ୍ରାମରେ ତାଙ୍କର ଏହି ଚ୍ୟାନେଲକୁ ଖୁବ୍ଶୀଘ୍ର ଭେରିଫାଏ କରି ଦିଆଯିବ ବୋଲି ଜଣାପଡିଛି। ତେବେ କିଛି ଗଣମାଧ୍ୟମ କଂଗ୍ରେସର କଥାକୁ ବ୍ଲାକ୍ ଆଉଟ୍ କରି ଦେବା ଓ ବିରୋଧି ରାଜନେତାକୁ କମ୍ ଅବା କୌଣସି ଗୁରୁତ୍ୱ ଦେଉ ନ ଥିବା କୁହାଯାଉଥିବା ବେଳେ ରାହୁଲଙ୍କର ଏହି ଚ୍ୟାନେଲ ଦଳକୁ ବେଶ୍ ସହାୟକ ହେବ ବୋଲି କୁହାଯାଉଛି। ରାହୁଲ ଗାନ୍ଧୀ ବହୁ ପଛରେ ସୋସିଆଲ ମିଡିଆକୁ ଆସିଥିବା ବେଳେ ଏଥିରେ ସଫଳ ହେବାକୁ ଚେଷ୍ଟା କରୁଛନ୍ତି। ତେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ତାଙ୍କ ଦଳ ଭାରତୀୟ ଜନତା ପାର୍ଟି(ଭାଜପା) ସୋସିଆଲ ମିଡିଆ ମାଧ୍ୟମରେ ଅନେକାଂଶରେ ସଫଳତା ପାଇଥିବା ବେଳେ ଏବେ ରାହୁଲ ଏହାକୁ ଆପଣାଇଛନ୍ତି ବୋଲି ଆଲୋଚନା ହେଉଛି।
