ଓଡ଼ଗାଁ, ୫।୪(ସ୍ବ.ପ୍ର.): ମହିଳାଙ୍କ ଅଶ୍ଳୀଳ ଫଟୋ ଭାଇରଲକରି ବ୍ଲାକ୍ମେଲ କରିବା ଅଭିଯୋଗରେ ନୟାଗଡ଼ା ଜିଲା ଆଦର୍ଶ ଥାନା ପୋଲିସ ଅଭିଯୁକ୍ତ ଯୁବକଙ୍କୁ ରବିବାର ଗିରଫକରି କୋର୍ଟ ଚାଲାଣ କରିଥିଲା। ଜାମିନ ନାମଞ୍ଜୁର ହେବାରୁ ସୋମବାର ତାଙ୍କୁ ଜେଲକୁ ପଠାଯାଇଛି। ଅଭିଯୁକ୍ତ ହେଲେ ଉକ୍ତ ଥାନା ଅନ୍ତର୍ଗତ ମସାବରୀ ଗ୍ରାମର ଯୁଗଳ ବେହେରା(୨୮)।
ପ୍ରକାଶ ଯେ, ଯୁଗଳ ଜଣେ ବିବାହିତାଙ୍କ କେତେକ ଫଟୋ ହ୍ବାଟ୍ସାପ୍ ଓ ଫେସ୍ବୁକ୍ରେ ଶେୟାରକରି ଭାଇରଲ କରିଥିଲେ। ପରେ ତାଙ୍କୁ ବ୍ଲାକମେଲ୍ କରି ଏକ ସୁନା ଚେନ୍ ତାଙ୍କଠାରୁ ନେଇଯାଇଥିଲେ। ଏ ସମ୍ପର୍କରେ ମହିଳାଙ୍କ ସ୍ବାମୀ ଥାନାରେ ଅଭିଯୋଗ କରିବାପରେ ପୋଲିସ ମାମଲା ରୁଜୁକରି ଯୁଗଳଙ୍କୁ ଗିରଫ କରିଥିଲା। ଯୁବଳ ସମସ୍ତ ଅଭିଯୋଗ ସ୍ବୀକାର କରିଥିବା ବେଳେ ପୋଲିସ ତାଙ୍କଠାରୁ ମହିଳାଙ୍କ ସୁନା ଚେନ ଉଦ୍ଧାର କରିଛି।
