ନୂଆଦିଲ୍ଲୀ, ୧ା୨(ପି.ଟି.): ଭାରତରେ କରୋନା ଭାଇରସ୍ କାୟା ବିସ୍ତାର କରିବାରେ ଲାଗିଛି। ଶୁକ୍ରବାର ୬ ସନ୍ଦିଗ୍ଧଙ୍କୁ ଚିକିତ୍ସା ଲାଗି ଦିଲ୍ଲୀ ହସ୍ପିଟାଲରେ ଭର୍ତ୍ତି କରାଯାଇଥିବାବେଳେ କେରଳରେ ୧୦୫୩ ଜଣ ବ୍ୟକ୍ତିଙ୍କୁ ଅବ୍ଜରଭେଶନରେ ରଖାଯାଇଛି। ଦିଲ୍ଲୀର ରାମ୍ ମନୋହର ଲୋହିଆ ହସ୍ପିଟାଲର ସ୍ବତନ୍ତ୍ର ଓ୍ବାର୍ଡରେ ୬ ସନ୍ଦିଗ୍ଧଙ୍କ ପରୀକ୍ଷାନିରୀକ୍ଷା କରାଯାଉଥିବା କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ପ୍ରକାଶ କରିଛନ୍ତି। ସେମାନଙ୍କ ମଧ୍ୟରେ ଥିବା ଜଣେ ମହିଳା ୨୦୧୫ରୁ ଚାଇନାରେ ଥିବାବେଳେ ଭାରତ ଫେରିଥିଲେ। ସମସ୍ତଙ୍କ ସାମ୍ପଲ ସଂଗ୍ରହ କରାଯାଇ ପରୀକ୍ଷା ଲାଗି ପଠାଯାଇଥିବା ହସ୍ପିଟାଲ କର୍ତ୍ତୃପକ୍ଷ କହିଛନ୍ତି।
ପରିସ୍ଥିତି ବିଗିଡ଼ିବାରେ ଲାଗିଛି। ଚାଇନାର ହୁବେଇ ପ୍ରଦେଶର ଉହାନ୍ରୁ ଫେରିଥିବା ଜଣେ ଛାତ୍ରୀ ଏଥିରେ ଆକ୍ରାନ୍ତ ହେବା ପରେ କେରଳ ସରକାର କଡ଼ା ପଦକ୍ଷେପ ଗ୍ରହଣ କରିଛନ୍ତି। ରାଜ୍ୟ ସ୍ବାସ୍ଥ୍ୟମନ୍ତ୍ରୀ କେ.କେ. ଶୈଳଜା କହିଛନ୍ତି, ୨୪ ଲୋକଙ୍କ ସାମ୍ପଲ ପୁଣେକୁ ପରୀକ୍ଷା ଲାଗି ପଠାଯାଇଥିବାବେଳେ ୧୫ ଜଣ ହସ୍ପିଟାଲ ଅବ୍ଜରଭେଶନରେ ଅଛନ୍ତି। ଅଧିକାଂଶ ସନ୍ଦିଗ୍ଧଙ୍କୁ ଘରୋଇ ହସ୍ପିଟାଲରେ ଚିକିତ୍ସା କରାଯାଉଥିବା ସେ ମତ ଦେଇଛନ୍ତି। କେରଳ ସରକାର କେତେକ ସରକାରୀ ହସ୍ପିଟାଲ ଡାକ୍ତରଙ୍କ ମୋବାଇଲ ନମ୍ବର ଜାରି କରିଛନ୍ତି। ଥ୍ରିଶୂର୍ ଜିଲା ମେଡ଼ିକାଲ ଅଫିସରେ ୨୪ ଘଣ୍ଟିଆ କଣ୍ଟ୍ରୋଲ ରୁମ୍ ଖୋଲାଯାଇ ଲୋକଙ୍କ ସୁବିଧା ଲାଗି ମୋବାଇଲ୍ ନମ୍ବର ଜାରି କରାଯାଇଛି। ଜନସଚେତନତା ଲାଗି ପ୍ରଚାର ସହ ରୋଗ ପ୍ରତିଷେଧକ ବ୍ୟବସ୍ଥା କରାଯାଉଛି। ଗୁରୁବାର କେରଳରେ ପ୍ରଥମ ଥର ଲାଗି କରୋନା ଭାଇରସ୍ ଆକ୍ରାନ୍ତଙ୍କୁ ଚିହ୍ନଟ କରାଯାଇଥିଲା। ତ୍ରିପୁରାର ଜଣେ ଯୁବକ ଏହି ରୋଗ ସଂକ୍ରମଣ ଯୋଗୁ ମାଲେସିଆରେ ବୁଧବାର ପ୍ରାଣ ହରାଇଥିଲେ। ପଡ଼ୋଶୀ ଚାଇନାରେ ଏହି ଭାଇରସ୍ ୨୧୫ରୁ ଊର୍ଦ୍ଧ୍ୱ ମୁଣ୍ଡ ନେଇଥିବାବେଳେ ପ୍ରାୟ ୧୦ ହଜାର ବ୍ୟକ୍ତିଙ୍କୁ ଆକ୍ରାନ୍ତ କରିଛି। ସେଠାରେ ଥିବା ଭାରତୀୟମାନେ ଏବେ ଭୟଭୀତ ଅବସ୍ଥାରେ ଅଛନ୍ତି। ସେମାନଙ୍କୁ ସ୍ବଦେଶ ଫେରାଇଆଣିବା ଲାଗି ୫ ଜଣିଆ ଡାକ୍ତରୀ ଟିମ୍କୁ ନେଇ ଏୟାର୍ ଇଣ୍ଡିଆର ୪୨୩ ସିଟର୍ ଜୁମ୍ବୋ ବିମାନ ଶୁକ୍ରବାର ଅପରାହ୍ନରେ ଉହାନ୍ ଅଭିମୁଖେ ଯାଇଥିଲା। ସେଠାରୁ ୩୭୦ ଜଣଙ୍କୁ ବିମାନରେ ଅଣାଯାଉଛି। ୨ ଜଣଙ୍କୁ ଜ୍ୱର ହୋଇଥିବାରୁ ସେମାନଙ୍କୁ ଅଣାଯାଇନଥିବା ଜଣାପଡିଛି। ଦକ୍ଷିଣ ଦିଲ୍ଲୀରେ ସଂକ୍ରମଣ ପରୀକ୍ଷା ଲାଗି ଆଇଟିବିପି ପକ୍ଷରୁ ୬୦୦ ବେଡ୍ର ସୁବିଧା କରାଯାଇଛି। ସରକାରଙ୍କ ପକ୍ଷରୁ ସମସ୍ତ ପ୍ରତିଷେଧକ ବ୍ୟବସ୍ଥା ଗ୍ରହଣ କରାଯାଇଛି। ପ୍ରକାଶଥାଉ କି, ଚାଇନାରେ କରୋନା ଭାଇରସ୍ ମୁଣ୍ଡ ନେବା ପରେ ଏବେ ପ୍ରାୟ ୧୭ଟି ଦେଶକୁ ଏହି ରୋଗ ସଂକ୍ରମଣ କରିସାରିଲାଣି। ଭୟାବହତାକୁ ଦୃଷ୍ଟିରେ ରଖି ବିଶ୍ୱସ୍ବାସ୍ଥ୍ୟ ସଂଗଠନ (ଡବ୍ଲ୍ୟୁଏଚ୍ଓ)ପକ୍ଷରୁ ଗ୍ଲୋବାଲ୍ ହେଲ୍ଥ ଇମରଜେନ୍ସି ଘୋଷଣା କରାଯାଇଛି।
