ଯୋଡ଼ା, ୧୧।୧(ଡି.ଏନ.ଏ.)- କେନ୍ଦୁଝର ଜିଲା ଯୋଡା ସହରରେ ଥିବା ଏକ ବ୍ୟାଙ୍କର ଜଣେ ଗ୍ରାହକଙ୍କ ଆକାଉଣ୍ଟରୁ ଫୋନ ପେ ଆପ୍ ମାଧ୍ୟମରେ ଟଙ୍କା ଗାଏବ ଘଟଣାର ପୋଲିସ ପର୍ଦ୍ଦାଫାଶ କରଛି। ଏହି ଠକେଇ ଘଟଣାରେ ଅଭିଯୁକ୍ତ ବାବୁଲ ମହାନ୍ତକୁ ଶୁକ୍ରବାର ଭୁବନେଶ୍ୱରରୁ ପୋଲିସ ଗିରଫ କରି ଯୋଡାକୁ ଆଣିଛି। ସେ ବ୍ୟବହାର କରୁଥିବା ଏକ କାର ଓ ମୋବାଇଲ ଫୋନକୁ ଜବତ କରାଯାଇଛି। ଯୋଡା ଥାନା ଆଇଆଇସି ରାଇସେନ୍ ମୁର୍ମୁ ଏହି ସୂଚନା ଦେଇ କହିଛନ୍ତି, ଅଭିଯୁକ୍ତ ବାବୁଲ ମହାନ୍ତଙ୍କ ଘର ଝାଡଖଣ୍ଡ ରାଜ୍ୟ ସିଲି ଥାନା ଅନ୍ତର୍ଗତ ରଙ୍ଗାମାଟି ଗାଁରେ । ତାଙ୍କ ମା’ ଙ୍କ ଦେହାନ୍ତ ହେବା ପରେ ସେ ରାଉରକେଲାସ୍ଥିତ ଏକ ଅନାଥାଶ୍ରମରେ ରହୁଥିଲେ । ଅନାଥାଶ୍ରମର ଜଣେ ମହିଳା କର୍ମଚାରୀଙ୍କ ମନରେ ସେ ବିଶ୍ୱାସ ଜନ୍ମାଇ ତାଙ୍କ ସହ ପାରିବାରିକ ସମ୍ପର୍କ ସ୍ଥାପନ କରିଥିଲେ। ଏ ପରି କି ସେ ଝୁମ୍ପୁରା ଥାନା ଅନ୍ତର୍ଗତ ଗୁମୁରା ଅଞ୍ଚଳର ତାଙ୍କ ଘରକୁ ଯିବାଆସିବା କରୁଥଲେ। । ୨୦୧୫ରେ ବାବୁଲ ଅନାଥାଶ୍ରମରୁ ଲୁଚି ପଳାଇଯାଇଥିଲେ। କିନ୍ତୁ ସେ ଏହି ମହିଳା କର୍ମଚାରୀଙ୍କ ଘରକୁ ମଝିରେ ମଝିରେ ଯିବାଆସିବା କରୁଥିଲେ। ପାରିବାରିକ ସମ୍ପର୍କ ଥିବାରୁ ବାବୁଲ ତାଙ୍କ ପରିବାରର ଏଟିଏମ୍ କାର୍ଡ ନେଇ ଟଙ୍କା ଉଠାଣ କରିବା ସହ ବ୍ୟାଙ୍କ ସମ୍ବନ୍ଧୀୟ କାର୍ଯ୍ୟରେ ସାହାଯ୍ୟ କରୁଥିଲେ। ମହିଳା କର୍ମଚାରୀଙ୍କ ବାପାଙ୍କ ଆକାଉଣ୍ଟରେ ଲକ୍ଷାଧିକ ଟଙ୍କା ଥିବା ଜାଣି ସେ ତାଙ୍କ ଫୋନ ନମ୍ବର ଓ ବ୍ୟାଙ୍କ ସମ୍ବନ୍ଧୀୟ ତଥ୍ୟ ଚୋରି କରିନେଇଥିଲେ । ପରେ ସେ ‘ଫୋନ ପେ’ ଆପ୍ ମାଧ୍ୟମରେ ଯୋଡାସ୍ଥିତ ଏସବିଆଇ ବ୍ୟାଙ୍କ ଆକାଉଣ୍ଟରେ ଥିବା ତାଙ୍କର ୨ଲକ୍ଷ ୪୦ ହଜାର ଟଙ୍କା ଗାଏବ କରି ନେଇଥିଲେ। ଆକାଉଣ୍ଟରୁ ଟଙ୍କା ଗାଏବ ଘଟଣା ଜଣାପଡିବା ପରେ ସମ୍ପୃକ୍ତ ପରିବାର ଯୋଡା ଥାନାରେ ଲିଖିତ ଅଭିଯୋଗ କରିଥିଲେ ା ଏନେଇ ପୋଲିସ ଏକ ମାମଲା ( ନଂ. ୨୨୪/୨୦।୧୨।୨୦୧୯) ରୁଜୁ କରି ତଦନ୍ତ ଜାରି ରଖିଥିଲା। ଠକେଇ ଘଟଣାର ରହସ୍ୟ ଜାଣିବା ପରେ ଅଭିଯୁକ୍ତ ବାବୁଲଙ୍କୁ ପୋଲିସ ଭୁବନେଶ୍ୱରରୁ ଗିରଫ କରି ଅଧିକ ପଚରାଉଚୁରା କରୁଥିବା ଆଇଆଇସି ମୁର୍ମୁ କହିଛନ୍ତିି ।
