ନୂଆଦିଲ୍ଲୀ,୫।୫ (ପି.ଟି.): ଭାରତୀୟ ପୂର୍ବତନ ମିଡଲଅର୍ଡର ବ୍ୟାଟ୍ସମ୍ୟାନ ସୁରେଶ ରାଇନାଙ୍କ ପ୍ରତ୍ୟାବର୍ତ୍ତନ ନେଇ ମୁହଁ ଖୋଲିଛନ୍ତି ପୂର୍ପତନ ମୁଖ୍ୟ ଚୟନକର୍ତ୍ତା ଏମ୍.ଏସ୍.କେ. ପ୍ରସାଦ। ଚୟନକର୍ତ୍ତାମାନେ ରାଇନାଙ୍କୁ ଅଣଦେଖା କରିଛନ୍ତ ବୋଲି ଚର୍ଚ୍ଚା ହେଉଥିଲେ ମଧ୍ୟ ଏହାକୁ ପ୍ରସାଦ ଖଣ୍ଡନ କରିଛନ୍ତି। ଜାତୀୟ ଦଳକୁ ପ୍ରତ୍ୟାବର୍ତ୍ତନ କରିବା ପାଇଁ ରାଇନା ଘରୋଇ କ୍ରିକେଟରେ ଅଶାନୁରୂପ ପ୍ରଦର୍ଶନ କରିବାରେ ବିଫଳ ହୋଇଥିଲେ ବୋଲି ସେ କହିଛନ୍ତି।
୩୩ ବର୍ଷୀୟ ରାଇନା ୨୨୬ଟି ଦିନିକିଆଓ ୭୮ ଟି୨୦ ଓ ୧୮ଟି ଟେଷ୍ଟ ଖେଳିଛନ୍ତି। ୨୦୧୮ ଜୁଲାଇରେ ସେ ଶେଷଥର ପାଇଁ ଇଂଲଣ୍ଡରେ ଭାରତ ପାଇଁ ଅନ୍ତର୍ଜାତୀୟ ମ୍ୟାଚ୍ ଖେଳିଥିଲେ। ଗତବର୍ଷ ନେଦରଲାଣ୍ଡ୍ସରେ ତାଙ୍କର ଆଣ୍ଠୁରେ ଅସ୍ତ୍ରୋପଚାର କରାଯାଇଥିଲା। ରାଇନା ଏବେ ତାଙ୍କ ଫେଭରାଇଟ ଦଳ ଚେନ୍ନାଇ ସୁପର କିଙ୍ଗ୍ସ ତରଫରୁ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଖେଳି ପ୍ରତ୍ୟାବର୍ତ୍ତନ ଲକ୍ଷ୍ୟରେ ରହିଛନ୍ତି। ତେବେ କରୋନା ଭାଇରସ ସଂକ୍ରମଣ ଓ ଲକ୍ ଡାଉନ୍ କାରଣରୁ ଆଇପିଏଲ୍ ସ୍ଥଗିତ ରହିଛି।
ଭିଭିଏସ୍ ଲକ୍ଷ୍ମଣ ୧୯୯୯ରେ ଜାତୀୟ ଦଳରୁ ବାଦ୍ ପଡିଥିଲେ। ତେବେ ଘରୋଇ କ୍ରିକେଟରେ ସେ ୧୪୦୦ ରନ ସଂଗ୍ରହ କରି ପ୍ରତ୍ୟାବର୍ତ୍ତନ କରିଥିଲେ। କିନ୍ତୁ ରାଇନା ଏଭଳି ପ୍ରଦର୍ଶନ କରି ନ ଥିଲେ ବୋଲି ପ୍ରସାଦ କହିଛନ୍ତି। କିଛି ଦିନ ତଳେ ରାଇନା ସିନିୟର ଖେଳାଳିଙ୍କ ପ୍ରତ୍ୟାବର୍ତ୍ତନ ନେଇ ଚୟନକର୍ତ୍ତା ଅଧିକ ଦାୟିତ୍ୱବାନ ହେବା ଉଚିତ୍ ବୋଲି ମନ୍ତବ୍ୟ ଦେଇଥିଲେ। ୨୦୧୮-୧୯ ସିସେନରେ ୫ଟି ରଣଜୀ ମ୍ୟାଚ୍ ଖେଳି ମାତ୍ର ୨୪୩ ରନ ସଂଗ୍ରହ କରିଥିଲେ। ଏଥିରେ ଦୁଇଟି ଅର୍ଦ୍ଧଶତକ ହାସଲ କରିଥିଲେ।
ଆଇପିଏଲ୍ରେ ତାଙ୍କର ଭଲ ରେକର୍ଡ ରହିଥିଲେ ମଧ୍ୟ ୨୦୧୯ରେ ସେ ୧୭ଟି ମ୍ୟାଚ୍ ଖେଳି ୩୮୩ ରନ ସଂଗ୍ରହ କରିଥିଲେ। ତେଣୁ ରାଇନାଙ୍କ ପ୍ରଦର୍ଶନ ପର୍ଯ୍ୟାପ୍ତ ନ ଥିଲା। ଅନ୍ୟପଟେ ଯୁବ ଖେଳାଳିମାନେ ଅପେକ୍ଷାକୃତ ଭଲ ଖେଳି ପ୍ରଭାବିତ କରିବାରେ ସଫଳ ହୋଇଥିଲେ।
କିଛିଦିନ ତଳେ ରାଇନା ୟୁଟ୍ୟୁବ ଶୋ’ ‘ସ୍ପୋଟର୍ସ ଟକ୍’ରେ ତାଙ୍କୁ କାହିଁକି ବାଦ୍ ଦିଆଗଲା ସେ ନେଇ ଚୟନକର୍ତ୍ତାକୁ ପ୍ରଶ୍ନ ପଚାରିଥିଲେ। ତେବେ ଏଭଳି ଅଭିଯୋଗ ସତ୍ୟ ନୁହଁ । ଏନେଇ ରାଇନାଙ୍କ ସହ ବ୍ୟକ୍ତିଗତ ଭାବେ ଆଲୋଚନା କରିଛି ବୋଲି ସେ କହିଛନ୍ତି। ପୂର୍ବତନ ଅଲରାଉଣ୍ଡର ମହେନ୍ଦ୍ର ଅମରନାଥ ଏକାଧିକ ବାର ଦଳରୁ ବାଦ୍ ପଡିଥିଲେ ମଧ୍ୟ ଘରୋଇ କ୍ରିକେଟରେ ଭଲ ଖେଳି ସବୁଥର ପ୍ରତ୍ୟାବର୍ତ୍ତନ କରିଥିଲେ ବୋଲି ପ୍ରସାଦ କହିଛନ୍ତି। ତେଣୁ ରାଇନାଙ୍କୁ ଅଭିଯୋଗ ଠିକ୍ ନୁହଁ ବୋଲି ସେ ସ୍ପଷ୍ଟ କରିଛନ୍ତି।
