ବେଜିଂ,୯।୬: ଚାଇନାର ଉହାନରେ ଥିବା ଏକ କୁକୁରର କାହାଣୀ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଏହି କୁକୁରର ମାଲିକ ଏକ ପୋଲ ଉପରୁ ନଦୀକୁ ଡେଇଁ ଆତ୍ମହତ୍ୟା କରିଥିଲେ। ଆଉ ସେ ଯେଉଁଠାରେ ନଦୀକୁ ଡେଇଁ ପଡିଥିଲେ ପୋଲର ସେହି ସ୍ଥାନରେ ତାଙ୍କ ପୋଷା କୁକୁରଟି ପାଖାପାଖି ୪ ଦିନ ପର୍ଯ୍ୟନ୍ତ ମାଲିକଙ୍କୁ ଅପେକ୍ଷା କରି ବସି ରହିଥିଲା। ପରେ ଉକ୍ତ ବ୍ୟକ୍ତିଙ୍କର ଜଣେ ବନ୍ଧୁ ବହୁ କଷ୍ଟରେ ସେଠାରୁ କୁକୁରଟିକୁ ନେଇ ଯାଇଥିଲେ। ଡେଲି ମେଲ୍ରେ ପ୍ରକାଶିତ ଏକ ଖବର ଅନୁଯାୟୀ, ମେ’ ୩୦ରେ ଉହାନର ଜଣେ ବ୍ୟକ୍ତି ତାଙ୍କ କୁକୁରକୁ ସାଥିରେ ଧରି ବାହାରକୁ ବୁଲିବାକୁ ଯାଇଥିଲେ। ଏହାପରେ ନିକଟରେ ଥିବା ୟାଂଗାତଜେ ନଦୀର ପୋଲ ଉପରୁ ହଠାତ୍ ବ୍ୟକ୍ତି ଜଣଙ୍କ ପାଣିକୁ ଡେଇଁପଡି ଆତ୍ମହତ୍ୟା କରିଥିଲେ। ଘଟଣା ସମ୍ପର୍କରେ ଜଣାପଡିବା ପରେ ପୋଲିସ ଘଟଣାସ୍ଥଳରେ ପହଞ୍ଚିଥଲା। ଏହାପରେ କୁକୁରଟିକୁ ପୋଲିସ ସେଠାରୁ ହଟାଇବାକୁ ଚେଷ୍ଟା କରି ବିଫଳ ମଧ୍ୟ ହୋଇଥିଲା। କେହି ଜଣେ ପୋଲିସ କୁକୁରଟିର ଫଟୋ ସୋସିଆଲ ମିଡିଆରେ ଅପଲୋଡ କରିବା ପରେ ଏହା ଭାଇରାଲ ହୋଇଥିଲା। ଉହାନର ଏକ ଖବର କାଗଜର ସୂଚନା ମୁତାବକ ଅନେକ ଲୋକ କୁକୁରଟିକୁ ଘରକୁ ନେବାକୁ ଚେଷ୍ଟା କରିଥିଲେ ମଧ୍ୟ ବିଫଳ ହୋଇଥିଲେ। ନିକଟରେ ଲାଗିଥିବା ସିସିଟିଭିରେ ସମସ୍ତ ଘଟଣା ରେକର୍ଡ ହୋଇଥିବା କୁହାଯାଏ।
