ପାଟଣା,୨୦।୬(ସ୍ବ.ପ୍ର.): କେନ୍ଦୁଝର ଜିଲା ପାଟଣା ବ୍ଲକରୁ ପୁଣି ଜଣେ କରୋନା ପଜିଟିଭ୍ ଚିହ୍ନଟ ହୋଇଛନ୍ତି। ଏହାକୁ ମିଶାଇ ବ୍ଲକରେ ଆକ୍ରାନ୍ତଙ୍କ ସଂଖ୍ୟା ୮ରେ ପହଞ୍ଚିଛି। ଚିହ୍ନଟ ଜଣକ ଚେମେଣା ପଞ୍ଚାୟତର ଦିଲ୍ଲୀ ଫେରନ୍ତା ୩୫ ବର୍ଷୀୟ ବ୍ୟକ୍ତି ବୋଲି ଶୁକ୍ରବାର ରାଜ୍ୟ ସୂଚନା ଓ ଲୋକ ସମ୍ପର୍କ ବିଭାଗ ତରଫରୁ ସୂଚନା ଦିଆହୋଇଛି। ସେ ଜଣେ ସିଆର୍ପିଏଫ୍ ଯବାନ ହୋଇଥିବା ବେଳେ ଦିଲ୍ଲୀରୁ ଆସି କ୍ୱାରାଣ୍ଟାଇନ୍ ସେଣ୍ଟରେ ରହିଥିଲେ। ତାଙ୍କୁ କୋଭିଡ ହସ୍ପିଟାଲକୁ ସ୍ଥାନାନ୍ତର କରାଯାଇଛି। ବ୍ଲକର ମୋଟ ୮ ଆକ୍ରାନ୍ତଙ୍କ ମଧ୍ୟରୁ ୪ ଜଣ ସୁସ୍ଥ ହୋଇ ଘରକୁ ଫେରିଛନ୍ତି।
ଅନୁରୂପ ଭାବେ ସାହରପଡା ବ୍ଲକରେ ଶୁକ୍ରବାର ୩ ନୂଆ ପଜିଟିଭ ଚିହ୍ନଟ ହୋଇଛନ୍ତି। ସେମାନଙ୍କ ମଧ୍ୟରୁ ଖୁଣ୍ଟାପଡା ପଞ୍ଚାୟତର ଜଣେ ୩୦ ବର୍ଷୀୟ ବ୍ୟକ୍ତି। ସେ ମହାରାଷ୍ଟ୍ରରୁ ଫେରି କ୍ୱାଣ୍ଟାଇନରେ ରହିଥିଲେ। ଅନ୍ୟ ଦୁଇଜଣଙ୍କ ମଧ୍ୟରୁ ୧୮ ଓ ୨୦ ବର୍ଷୀୟ ଯୁବକ ରହିଛନ୍ତି। ଉଭୟ ମାଛଗଡ଼ ପଞ୍ଚାୟତ କ୍ୱାରାଣ୍ଟାଇନ ସେଣ୍ଟରରେ ରହୁଥିଲେ। ସେମାନେ ଗୁଜୁରାଟ ଫେରନ୍ତା। ଏମାନଙ୍କୁ ମିଶାଇ ସାହରପଡ଼ା ବ୍ଲକରେ ପଜିଟିଭ ସଂଖ୍ୟା ୫ରେ ପହଞ୍ଚିଛି। ସମସ୍ତଙ୍କୁ ଜିଲା କୋଭିଡ ହସ୍ପିଟାଲକୁ ସ୍ଥାନାନ୍ତର କରାଯାଇଛି। ମାଛଗଡ଼ କ୍ୱାରାଣ୍ଟାଇନ ସେଣ୍ଟରରେ ୨ ପଜିଟିଭ୍ ବାହାରିବା ପରେ ସରପଞ୍ଚ ଈଶ୍ୱର ଚନ୍ଦ୍ର ନାଏକ ଶୁକ୍ରବାର ରାତି ୧୨ଟାରୁ ପଞ୍ଚାୟତର ସମସ୍ତ ଗାଁକୁ ୭୨ ଘଣ୍ଟା ପାଇଁ ଶର୍ଟଡାଉନ ଘୋଷଣା କରିଛନ୍ତି।
